කැනඩාව ශ්‍රී ලංකාවේ අවදානමට ලක්විය හැකි ප්‍රජාවන්ට මානුෂීය ආධාර සපයයි

එක්සත් ජාතීන්ගේ සංවිධානය (UN) සහ අන්තර්ජාතික රතු කුරුස සහ රතු අඩසඳ සම්මේලනය (IFRC) විසින් දියත් කරන ලද මානුෂීය අභියාචනාවලට ප්‍රතිචාර වශයෙන්, ශ්‍රී ලංකාවේ වඩාත් අවදානමට ලක්විය හැකි ප්‍රජාවන්ගේ අවශ්‍යතා සපුරාලීම සඳහා කැනඩාව ඩොලර් මිලියන 3 ක් (දළ වශයෙන් ශ්‍රී ලාංකීය රු. 817 මිලියනයක්) ලබා දෙයි.

මෙම දායකත්වය UN සහ IFRC හරහා ඔවුන්ගේ දේශීය හවුල්කරුවන් සමඟ හදිසි ආහාර ආධාර, සෞඛ්‍ය සහ පෝෂණ සේවා, පිරිසිදු ජලය ලබා ගැනීම සඳහා ප්‍රවේශය සහ අනෙකුත් අත්‍යවශ්‍ය සේවාවන් වඩාත් අවශ්‍ය අයට ලබා දීමට සහාය වනු ඇත.

මීට අමතරව, ශ්‍රී ලංකාවේ ආර්ථික අර්බුදයට ප්‍රතිචාර දැක්වීමට සහ ක්ෂණික අවශ්‍යතා සපුරාලීම සඳහා කැනඩාව දැනට ක්‍රියාත්මක ජාත්‍යන්තර ආධාර ව්‍යාපෘති, අත්‍යවශ්‍ය වෛද්‍ය උපකරණ සහ සැපයුම් ප්‍රසම්පාදනය ඇතුළු දේවල් සඳහා යොමු කර ඇත.

කැනඩාව මෙම දුෂ්කර කාලයේදී සියලුම ශ්‍රී ලාංකිකයන් සමඟ අඛණ්ඩව පෙනී සිටින අතර සියලු දෙනා ඇතුළත්වූ සහ සමෘද්ධිමත් ශ්‍රී ලංකාවකට සහාය වීමට කැපවී සිටී.