ලංකා ව්‍යාපාරික පුවත් - LBN
ජාතික තොරතුරු හා සන්නිවේදන තාක්ෂණ විසඳුම් සම්පාදක SLT-MOBITEL හි ආයතනික විසඳුම් අංශය වන SLT-MOBITEL Enterprise, මෙරට ක්ෂුද්‍ර, සුළු හා මධ්‍යම පරිමාණ ව්‍යාපාර සවිබලගැන්වීම සඳහා නවතම සේවාවන් එකතුවක් හඳුන්වා දී තිබේ. Bizlife package, SLTM DataOne සහ Hosting Cub ලෙස නම්කර ඇති මෙම විශේෂ පැකේජ හඳුන්වා දීම, පසුගියදා කොළඹ ෂැංග්‍රි-ලා හෝටල් පරිශ්‍රයේදී පැවති උත්සවයකදී සිදුකෙරිණි.
SLT සමූහ ප්‍රධාන අලෙවි නිලධාරී ප්‍රභාත් දහනායක මහතා ඇතුළුව SLT-MOBITEL ජ්‍යෙෂ්ඨ කළමනාකාරීත්වයේ නිලධාරීන් පිරිසක් සහ SLT-MOBITEL පාරිභෝගිකයන් පිරිසක් මෙම අවස්ථාවට සහභාගී වූහ.
තම ව්‍යාපාර දියුණු කරගැනීමට මෙම විසඳුම් භාවිතා කළ හැකි ආකාරය දැනගැනීම සඳහා මෙම උත්සවයට සහභාගී වන මෙන්, තෝරාගත් ව්‍යවසායකයන් පිරිසකට ආරාධනා කර තිබිණි. BizLife පැකේජ තුළින් විවිධ තල ඔස්සේ තොරතුරු හා සන්නිවේදන තාක්ෂණ සේවාවන් ලබාගත හැකි අතර, SLTM DataOne මගින් එක් සමාගමක සියලුම ශාඛා හෝ අංශ ආවරණය වන පරිදි දත්ත පහසුකම් ලබාගත හැක. මීට අමතරව සමාගමක අවශ්‍යතාවන් අනුව සහනදායී ගාස්තු යටතේ පොදු හෝ පෞද්ගලික Hosting පදනම මත Hosting Cub පැකේජ ලබාගත හැකි වේ.
