ලංකා ව්‍යාපාරික පුවත් - LBN
ශ්‍රී ලංකාවේ කෘෂි ක්ෂේත්‍රය සඳහා විශේෂ මූල්‍ය පහසුකම් සහ මෙහෙයුම් සහාය ලබා දීමට හැටන් නැෂනල් බැංකුව, හේලීස් ඇග්‍රිකල්චර් සමඟ අත්වැල බැඳගෙන ඇත.
මෙම හවුල්කාරිත්වය යටතේ ගොවීන්ට සහ කෘෂි ව්‍යාපාරවලට වඩාත් හොඳ ලීසිං සැලසුම් සහ විශේෂ මිල අඩු කිරීම් ලබා දෙන අතර එමඟින් ඔවුන්ට අවශ්‍ය කෘෂි උපකරණ ලබා ගැනීමට සහ ප්‍රවේශ වීමට උපකාරී වේ. මෙහි ඉලක්කය වන්නේ කෘෂිකර්මාන්තය දිගු කාලීනව වඩාත් දැරිය හැකි, ප්‍රවේශ විය හැකි සහ තිරසාර කර්මාන්තයක් බවට පත් කිරීමයි.
මෙම වැඩසටහනේ කොටසක් ලෙස, HNB ගොවීන්ට අත්‍යවශ්‍ය කෘෂි යන්ත්‍රෝපකරණ මිලදී ගැනීම සඳහා උපකාර කිරීමට නිර්මාණය කර ඇති ගොවි සවිය යෝජනා ක්‍රමය හරහා අමතර ගාස්තු රහිත විශේෂ පොලී අනුපාත ලබා දෙනු ඇත. තවද දිවයින පුරා සිටින කුඩා පරිමාණයේ ගොවීන්ට ඔවුන්ගේ ගොවිතැන් කටයුතු වැඩිදියුණු කිරීම සඳහා මූල්‍ය ආධාර සහ ඉගෙනුම් සම්පත් ලබා දීමෙන් සහාය වන සරුසාර වැඩසටහන හරහා ද HNB ගොවීන්ට අඛණ්ඩව සහයෝගය දක්වයි.
මෙම හවුල්කාරිත්වය මගින් කෘෂිකර්මාන්තය සංවර්ධනය කිරීම, ගොවිතැන සඳහා යන්ත්‍ර භාවිතය ප්‍රවර්ධනය කිරීම සහ ගොවීන් මත ඇති මූල්‍ය පීඩනය අවම කිරීම සඳහා HNB හි කැපවීම පෙන්නුම් කරයි. මේ පිළිබඳව අදහස් දක්වමින් HNB ප්‍රධාන මෙහෙයුම් නිළධාරී සන්ජේ විජේමාන්න මහතා පැවසුවේ කෘෂි කර්මාන්තයට සහාය වීමත් සමඟ ස්මාර්ට් ලීසිං විකල්ප ලබා දීමෙන්, ශ්‍රී ලංකාවේ කෘෂිකර්මාන්තය වැඩිදියුණු කිරීමට සහ රට පුරා ගොවි ප්‍රජාවන් ශක්තිමත් කිරීමට මෙම හවුල්කාරිත්වය මගින් බලාපොරොත්තු වන බවයි.
“හේලීස් ඇග්‍රිකල්චර් හි අපි කෘෂි යන්ත්‍රෝපකරණ හරහා සාම්ප්‍රදායික ගොවිතැන නවීන තාක්ෂණය සමඟ සම්බන්ධ කිරීමට කැපවී සිටිනවා. HNB සමඟ ඇති මෙම හවුල්කාරිත්වය ගොවීන්ට අවශ්‍ය කෘෂි යන්ත්‍රෝපකරණ සහ මූල්‍ය ආධාර ලබා ගැනීමට පහසු ප්‍රවේශයක් සපයනු ලබන අතර ශ්‍රී ලංකාවේ කෘෂිකර්මාන්තය ශක්තිමත් කිරීම සඳහා අපගේ අඛණ්ඩ කැපවීම ද ඉන් පෙන්නුම් කරනවා.” යනුවෙන් හේලීස් ඇග්‍රිකල්චර් හෝල්ඩින්ග්ස් හි කළමනාකාර අධ්‍යක්ෂිකා ජයන්ති ධර්මසේන මහත්මිය පැවසුවාය.
