ලංකා ව්‍යාපාරික පුවත් - LBN
සෙලාන් බැංකුව, මෙරට සාක්ෂරතාව ඉහළ නැංවීම අරමුණු කරමින් ක්‍රියාත්මක කරන පැහැසර පුස්තකාල ව්‍යාපෘතියේ 280 වන පැහැසර පුස්තකාලය විවෘත කිරීම 2025 අප්‍රේල් 09 වන දින කොළඹ ප්‍රෙස්බිටේරියන් බාලිකා විදුහලේ දී සිදු කෙරිණි.
2026 වසර වන විට සෙලාන් පැහැසර පුස්තකාල 300 ක් විවෘත කිරීම සෙලාන් බැංකුවේ ඉලක්කයයි. කොළඹ ප්‍රෙස්බිටේරියන් බාලිකා විදුහලේ දී විවෘත කෙරුණු මෙම නව පුස්තකාලය හරහා සිසුවියන් 672 දෙනෙකු ප්‍රතිලාභ ලබන අතර, ඊට සමගාමී ව අදාළ විදුහල වෙත නවතම ලැප්ටොප් පරිගණක 2 ක්, බහුමාධ්‍ය ප්‍රොජෙක්ටරයක් සහ තිරයක් ලබා දීම ද විශේෂිත ය. 
මෙම 280 වන සෙලාන් පැහැසර පුස්තකාලය විවෘත කිරීමේ අවස්ථාවට සෙලාන් බැංකුවේ අධ්‍යක්ෂ/ප්‍රධාන විධායක නිලධාරී රමේෂ් ජයසේකර මහතා, අධ්‍යාපන අමාත්‍යාංශයේ නියෝජිතයෝ, ප්‍රෙස්බිටේරියන් බාලිකා විදුහලේ විදුහල්පතිනි ඩී.ටී.ඒ.ටී.කේ. දිසානායක මහත්මිය, උප විදුහල්පතිනි බී.කේ.ටී. රත්නකාන්ති මහත්මිය,ප්‍රධාන ශිෂ්‍ය නායිකා ෆාතිමා රුකයියා මෙනවිය, ආචාර්ය මණ්ඩලය, ශිෂ්‍ය නායක මණ්ඩලයේ සාමාජිකාවෝ, පාසලේ ශිෂ්‍යාවන් සහ දෙමාපියෝ රැසක් සහභාගී වූහ.
සෙලාන් පැහැසර වැඩසටහන අධ්‍යාපන අමාත්‍යාංශය සමඟ එක් ව වසර 10 කට ආසන්න කාලයක් අඛණ්ඩව ක්‍රියාත්මක වෙමින් පවතින අතර, මෙරට සිසු දරු දැරියන්ගේ සාක්ෂරතාව වර්ධනය කිරීම සහ යහපත් ඉගෙනුම් වටපිටාවක් නිර්මාණය කිරීම අරමුණු කර ගත් මෙම වැඩසටහන හරහා සහයෝගය අවශ්‍ය පාසල් හඳුනා ගනිමින් එම පාසල් සඳහා පුස්තකාල ඇතුළු අත්‍යවශ්‍ය අධ්‍යාපනික උපාංග ලබා දීම සිදු කෙරෙයි. කොළඹ ප්‍රෙස්බිටේරියන් බාලිකා විද්‍යාලය එවැනි පාසලක් ලෙස හඳුනා ගනිමින් සෙලාන් පැහැසර පුස්තකාලයක් ලබා දීම හරහා එම විද්‍යාලයේ ශිෂ්‍යාවන් වෙත ගුණාත්මක අධ්‍යාපනයක් ලබා දීම සඳහා අවශ්‍ය පහසුකම් වැඩි දියුණු කිරීම සෙලාන් බැංකුවේ අරමුණයි.
මේ පිළිබඳ ව අදහස් දක්වමින් සෙලාන් බැංකුවේ අධ්‍යක්ෂ/ප්‍රධාන විධායක නිලධාරී රමේෂ් ජයසේකර මහතා පැවසුවේ, “මෙම ව්‍යාපෘතිය හරහා 2026 වසර වන විට පුස්තකාල 300 ක් ප්‍රදානය කිරීම අපගේ ප්‍රධානතම අරමුණයි. මෙම සෑම විවෘත කිරීමක් ම අද්විතීය ජයග්‍රහණ ලෙස සැමරීමට ලැබීම ගැන අපි නිරන්තරයෙන් ආඩම්බර වෙනවා. මෙම සෑම පුස්තකාලයක් හරහා ම දරුවන්ගේ කියවීමේ හා ඉගෙනීමේ ආශාව වර්ධනය කිරීම තුළින් දැනුමින් හා ආකල්පවලින් සන්නද්ධ අනාගත පරපුරක් නිර්මාණය කිරීමට අපි බලාපොරොත්තු වෙනවා. සෙලාන් පැහැසර පුස්තකාල ව්‍යාපෘතිය හරහා බිම් මට්ටමේ සාක්ෂරතාව වර්ධනය කරමින් දැනුමින් පොහොසත් ශ්‍රී ලංකාවක් නිර්මාණය කිරීමට සැලකිය යුතු දායකත්වයක් ලබා දීමට අපට හැකි වනු ඇතැ’යි අපි විශ්වාස කරනවා.” යනුවෙනි.
තාරුණ්‍යයට ලෝකය පිළිබඳ මනා අවබෝධයක් ලබා ගැනීමට පුස්තකාල හරහා වැදගත් කාර්යභාරයක් ඉටු කෙරෙන බව සෙලාන් බැංකුව හඳුනා ගෙන ඇත. ඒ අනුව දරුවන්ගේ සාක්ෂරතාව හා කුසලතා වර්ධනය කිරීම හරහා එක්සත් ජාතීන්ගේ තිරසාර සංවර්ධන ඉලක්ක 17 න් 11 ක් සපුරා ගැනීමට සෙලාන් පැහැසර වැඩසටහන සුවිශේෂී කාර්යභාරයක් ඉටු කරන බවත්, 2013 වසරේ මාර්තු 1 වන දින අනුරාධපුර ස්වර්ණපාලි බාලිකා මහා විද්‍යාලයේ දී ආරම්භ වූ සෙලාන් පැහැසර ගමන් මඟ අධ්‍යාපනයේ නිම් වළලු පුළුල් කරමින් ඉදිරියේ දීත් අඛණ්ඩ ව දියත් වන බවත් අවධාරණය කළ යුතු ය.
