බැංකු ක්ෂේත්‍රයේ ප්‍රවීණයෙකු වන ඩෙල්වින් පෙරේරා මහතා අමානා බැංකුවේ අධ්‍යක්ෂ මණ්ඩලයට එක්වෙයි

බැංකු ක්ෂේත්‍රයේ දශක 3 කට අධික පළපුරුද්දක් ඇති ප්‍රවීණ වෘත්තිකයෙකු වන ඩෙල්වින් පෙරේරා මහතා අමානා බැංකුවේ විධායක නොවන ස්වාධීන අධ්‍යක්ෂවරයෙකු ලෙස පත්කර ඇත. 2024 මාර්තු 28 දින සිට මෙම පත්වීම වලංගු වේ.

කොමර්ෂල් බැංකුවෙන් සිය බැංකුකරණ වෘත්තීය ජීවිතය ආරම්භ කළ ඩෙල්වින් පෙරේරා මහතා, සිය වසර 35 කට අධික වෘත්තීය ජීවිතය තුළ තනතුරු රාශියක් දරා ඇත. විශ්‍රාම යන අවස්ථාවේදී ඒ මහතා සෙලාන් බැංකුවේ නියෝජ්‍ය සාමාන්‍යාධිකාරීවරයෙකු ලෙස කටයුතු කරමින් සිටියේ ය.

ඩෙල්වින් පෙරේරා මහතා සතු අත්දැකීම් සම්භාරය පාරිභෝගික බැංකුකරණය, ව්‍යාපාරික බැංකුකරණය, ණය කළමනාකරණය, අවදානම් කළමනාකරණය සහ වෙළඳ මූල්‍ය සේවා ඇතුළු ක්ෂේත්‍ර රාශියක විහිදී පවතී. ඕස්ට්‍රේලියාවේ ‘වෙස්ටර්න් සිඩ්නි’ විශ්ව විද්‍යාලයෙන් ව්‍යාපාර පරිපාලනය පිළිබඳ පශ්චාත් උපාධියක් ලබා ඇති ඒ මහතා ඕස්ට්‍රේලියාවේ සහතිකලත් කළමනාකරණ ගණකාධිකාරී සුදුසුකම්ද සපුරා ඇත.

සමාජය සේවය සඳහාද කැපවී සිටින ඩෙල්වින් පෙරේරා මහතා 1994 වසරේ සිටම රොටරි සමාජයේ සාමාජිකයෙකු ලෙස කටයුතු කර ඇත. ජාත්‍යන්තර රොටරි සමාජයේ ශ්‍රී ලංකාව සහ මාලදිවයින ඇතුළත් දිස්ත්‍රික් අංක 3220 හි නායකත්ව තනතුරු රැසක් දරා ඇති ඒ මහතා 2025/26 කාලසීමාව තුළ ශ්‍රී ලංකාව සහ මාලදිවයින සඳහා දිස්ත්‍රික් ප්‍රධානී ලෙස කටයුතු කිරීම සඳහා ඒකමතිකව තෝරාගෙන ඇත.

මෙම පත්වීම සම්බන්ධයෙන් අදහස් දක්වමින් අමානා බැංකුවේ සභාපති අස්ගි අක්බරලි මහතා මෙසේ තම අදහස් දැක්වී ය. “ඩෙල්වින් පෙරේරා මහතා අමානා බැංකුවේ අධ්‍යක්ෂ මණ්ඩලයට අප පිළිගන්නේ ඉතාමත් සතුටිනි. බැංකු ක්ෂේත්‍රය සම්බන්ධයෙන් ඒ මහතා සතු දැනුම සහ පළපුරුද්ද අපගේ ක්‍රමෝපායික අරමුණු ඉටුකරගැනීමේ උත්සාහයන් තුළ අපට අතිශයින් වැදගත් වේවි. බැංකු ක්ෂේත්‍රය තුළ ඔහු ගතකළ සාර්ථක වෘත්තීය ජීවිතය සහ අත්කරගත් ජයග්‍රහණ නිසා ඔහු අපගේ කණ්ඩායමට වටිනා සම්පතක් වනු ඇතැයි කියා මා සිතනවා. ඔහුගේ අදහස් හා මගපෙන්වීම් අමානා බැංකුවේ සාර්ථකත්වයට මහෝපකාරී වනු ඇති බව අපට විශ්වාසයි.”

නව පත්වීමත් සමග අමානා බැංකුවේ අධ්‍යක්ෂ මණ්ඩලයේ සංයුතිය පහත පරිදි වේ:

අස්ගි අක්බරලි (සභාපති), මොහොමඩ් අස්මීර් (කළමනාකාර අධ්‍යක්ෂ/ප්‍රධාන විධායක නිලධාරී), ටිශාන් සුබසිංහ (විධායක නොවන ජ්‍යෙෂ්ඨ ස්වාධීන අධ්‍යක්ෂ), මුහම්මද් අතාවුර් රහ්මාන් චෞද්රි (විධායක නොවන ස්වාධීන නොවන අධ්‍යක්ෂ), ඩිල්ශාන් හෙට්ටිආරච්චි (විධායක නොවන ස්වාධීන නොවන අධ්‍යක්ෂ), සයිඩ් මුහම්මද් ආසිම් රාසා (විධායක නොවන ස්වාධීන නොවන අධ්‍යක්ෂ), මොහොමඩ් හසන් (විධායක නොවන ස්වාධීන නොවන අධ්‍යක්ෂ), ඕමාර් කාසිම් (විධායක නොවන ස්වාධීන නොවන අධ්‍යක්ෂ), මොහොමඩ් ආදම්අලී (විධායක නොවන ස්වාධීන නොවන අධ්‍යක්ෂ), කයිරුල් මුසම්මිල් පෙරේරා බින් අබ්දුල්ලා (විධායක නොවන ස්වාධීන අධ්‍යක්ෂ), සහ ඩෙල්වින් පෙරේරා (විධායක නොවන ස්වාධීන අධ්‍යක්ෂ).

 අමානා බෑන්ක් පීඑල්සී යනු ශ්‍රී ලංකා මහ බැංකුවේ බලපත්‍රලාභී, කොළඹ කොටස් හුවමාරුවේ ලියාපදිංචි සමාගමකි. එහි ප්‍රධාන කොටස්කරු වන IsDB සමූහය යනු ‘AAA’ ශ්‍රේණිය හිමි, රටවල් 57 ක සාමාජිකත්වයන් සහිත බහුපාර්ශ්වීය සංවර්ධන මූල්‍ය ආයතනයකි. පොලී රහිත බැංකුකරණ ක්ෂේත්‍රයේ ප්‍රමුඛ පෙළේ ආයතනයක් ලෙස සිය ස්ථාවරය සනාථ කරමින් අමානා බැංකුව ආසියානු බැංකුකරුවන්ගේ ආයතනය වෙතින් ලොව ප්‍රබලතම ඉස්ලාමීය බැංකු 100 අතරින් එකක් ලෙස අඛණ්ඩව පිළිගැනීමට ලක් වී ඇත.

අමානා බැංකුව සතුව වෙනත් උප සමාගම්, හවුල්කාර සමාගම් හෝ අනුබද්ධ සමාගම් නොමැති අතර, එය OrphanCare භාරයේ ආරම්භක අනුග්‍රාහකයා ලෙස කටයුතු කරයි.