ලංකා ව්‍යාපාරික පුවත් - LBN
සමාජ ජාල බැංකුකරණ සේවා මුලින්ම ලබාදුන් දේශීය බැංකුව වන කොමර්ෂල් බැංකුව ශ්රී ලංකාවේ පළමු වරට WhatsApp සහ Viber බැංකුකරණ සේවා භාෂා ති‍්‍රත්වයෙන්ම ලබාදීම ආරම්භ කර තිබේ.
මෙම සේවා භාවිතා කරන කොමර්ෂල් බැංකුවේ ගනුදෙනුකරුවන්ට දැන් තමන් කැමති භාෂාවක් මගින් ගිණුමේ ශේෂය පරීක්ෂා කිරීම, ගිණුමේ ඉතිහාසය බලාගැනීම, චෙක්පොත් ඉල්ලීම්, පොලී අනුපාත තොරතුරු දැනගැනීම, කොම්බෑන්ක් ඩිජිටල් හි ලියාපදිංචි වීම සහ අලූත් ෆ්ලෑෂ් ඩිජිටල් බැංකු ගිණුමක් විවෘත කිරීම සිදුකළ හැකිවේ. මෙම සේවාවන් ලබාගැනීමට ගනුදෙනුකරුවන් පිවිසෙන අවස්ථාවල සිංහල, දෙමළ සහ ඉංග‍්‍රීසි භාෂාවන් අතුරින් තමන් කැමති භාෂාව තෝරාගැනීමට අවකාශය ලබාදී ඇති බව බැංකුව සඳහන් කරයි.
කොමර්ෂල් බැංකුවට මේ වනවිටත් ත‍්‍රිත්ව භාෂා නිළ වෙබ් අඩවියක් තිබෙන අතර දුරකතන ඇමතුම්, ලිඛිත සන්නිවේදන කටයුතු, පාරිභෝගික ඉල්ලීම් සහ පාරිභෝගික ප‍්‍රතිචාර හසුරුවන පාරිභෝගික සේවා නියෝජිතයින්ගෙන් සමන්විත ත්‍රෛයිභාෂික ඒකාබද්ධ ඇමතුම් මධ්‍යස්ථානයක් තිබේ.
ශ්රී ලංකාවේ පරිසරයට කාබන් මුදාහැරීම 100% තුලනය කළ ප‍්‍රථම බැංකුව සහ ලෝකයේ හොඳම බැංකු 1000 අතරට පත්වු පළමු බැංකුව මෙන්ම පිට පිට 11 වතාවක් එසේ තේරී පත්වූ එකම ශ්රී ලාංකේය බැංකුව කොමර්ෂල් බැංකුව වන අතර මේ වනවිට දිවයින පුරා බැංකු ශාඛා 268 ක් සහ ස්වයංක‍්‍රීය යන්ත‍්‍ර 938 ක් ක‍්‍රියාත්මක කරයි. ශී‍්‍ර ලංකාවේ සුළු සහ මධ්‍යම පරිමාණයේ ව්‍යාපාර වලට විශාලතම ණය සම්පාදනය කරන්නා මෙන්ම දේශීය බැංකු ක්ෂේත‍්‍රයේ ඩිජිටල් නව්‍යකරණය සඳහා ප‍්‍රමුඛයෙකු වන කොමර්ෂල් බැංකුව බංග්ලාදේශය තුළ ශාඛා 19 ක් ද මියන්මාරයේ නේ පයිටව් හි, ක්ෂුද්‍ර මූල්‍යන සමාගමක් මෙන්ම මාලදිවයින තුළ බහුතර කොටස් හිමිකාරීත්වයෙන් යුතු පළමු පෙළ බැංකුවකින් සමන්විත විදේශීය මෙහෙයුමක් පවත්වාගෙන යන ශ්රී ලංකාවේ එකම පුද්ගලික වාණිජ බැංකුව ද වේ.
