ලංකා ව්‍යාපාරික පුවත් - LBN
ශී‍්‍ර ලාංකේය බැංකුකරණයේ නව පෙරළියක් සනිටුහන් කරන බැංකුකරණ සේවා අන්තර්ගත පැළදිය හැකි තාක්ෂණය (Wearable technology) හඳුන්වා දෙමින් කොමර්ෂල් බැංකුව ඩිජිටල් නවෝත්පාදනය නව තලයකට රැගෙන ගොස් ඇත.
මේ අනුව, කොමර්ෂල් බැංකුව විසින් මෙරට පළමු ‘Wearable banking’ නිපැයුම සඳහා ෆ්ලෑෂ් ඩිජිටල් බැංකු ගිණුමේ තෝරාගත් පහසුකම් ඇපල් ස්මාර්ට් වොච් සමඟ අන්තර්ගත කිරීමට ඩිජිටල් පේමන්ට් සර්විසස් ප‍්‍රයිවට් ලිමිටඞ් සමාගම සමඟ ඒකාබද්ධ වී ඇත.
iPhone දුරකථන වලට සම්බන්ධ ඇපල් ස්මාර්ට් වොච් පළඳින ෆ්ලෑෂ් ඩිජිටල් බැංකු ගිණුම් හිමියන්ට එම අත් ඔරලෝසුවල ස්කී‍්‍රන් එකෙන් තම ගිණුමේ ශේෂය, ගෙවීම් සඳහා ඉල්ලීම් සහ අරමුදල් හුවමාරු කිරීමේ ඉල්ලීම් නැරඹිය හැකි බව බැංකුව සඳහන් කරයි.
‘අසීමිත නවෝත්පාදන අවස්ථා සහිත ගමනක මුල් පියවර මෙය වන නිසා අපි මේ නවතම නවෝත්පාදනය ගැන උද්දාමයට පත්වෙනවා,’ යනුවෙන් මේ පිළිබඳව අදහස් දක්වමින් කොමර්ෂල් බැංකුවේ කළමනාකාර අධ්‍යක්ෂ සහ ප්රධාන විධායක නිළධාරී, සනත් මනතුංග මහතා පැවසීය. ‘තාක්ෂණික ලෝකයේ ස්මාර්ට් වොච් අමුතු දෙයක් නෙවෙයි. විශාල පාරිභෝගික කාණ්ඩයක පහසුව උදෙසා මෙවැනි තාක්ෂණයන් භාවිතය වර්ධනය වෙමින් පවතිනවා. ඉදිරියේදී මෙම අංශය තවදුරටත් වර්ධනය වනු ඇතැයි අපි අපේක්ෂා කරනවා. මෙරට ඩිජිටල් බැංකුකරණයේ නායකයෙකු ලෙස තවත් නව්‍ය වූ බැංකුකරණ ක‍්‍රමයක් වන Wearable banking මෙරටට හඳුන්වාදීමට හැකිවීම පිළිබඳව කොමර්ෂල් බැංකුව සතුටට පත් වෙනවා.’
මෙම වැඩසටහනේ මුල් අදියරේදී ගිණුමේ ශේෂය පරීක්ෂා කිරීමට සහ අරමුදල් හුවමාරු ඉල්ලීම් පිළිගැනීමට පමණක් අවස්ථාව ලබාදුන්නත් ඉදිරියේදී මේ සඳහා බිල්පත් ගෙවීම් සහ තමන්ගේම ගිණුම් වලට පේ‍්‍රෂණය කිරීම වැනි පහසුකම්ද ඇතුළත් කිරීමට බැංකුව අවධානය යොමු කරමින් තිබේ. එවැනි පහසුකම් වර්ධනය වීමත් සමග පළඳින බැංකුකරණයේ ප‍්‍රයෝජනවත් බව ඉදිරියේදී තවත් වැඩි වනු ඇති බව මනතුංග මහතා පැවසීය.
ශ්රී ලංකාවේ පරිසරයට කාබන් මුදාහැරීම 100% තුලනය කළ ප‍්‍රථම බැංකුව සහ ලෝකයේ හොඳම බැංකු 1000 අතරට පත්වු පළමු බැංකුව මෙන්ම පිට පිට 12 වතාවක් එසේ තේරී පත්වූ එකම ශ්රී ලාංකේය බැංකුව කොමර්ෂල් බැංකුව වන අතර මේ වනවිට දිවයින පුරා බැංකු ශාඛා 268 ක් සහ ස්වයංක‍්‍රීය යන්ත‍්‍ර 940 ක් ක‍්‍රියාත්මක කරයි. ශී‍්‍ර ලංකාවේ සුළු සහ මධ්‍යම පරිමාණයේ ව්‍යාපාර වලට විශාලතම ණය සම්පාදනය කරන්නා මෙන්ම දේශීය බැංකු ක්ෂේත‍්‍රයේ ඩිජිටල් නව්‍යකරණය සඳහා ප‍්‍රමුඛයෙකු වන කොමර්ෂල් බැංකුව බංග්ලාදේශය තුළ ශාඛා 19 ක් ද මියන්මාරයේ නේ පයිටව් හි, ක්ෂුද්‍ර මූල්‍යන සමාගමක් මෙන්ම මාලදිවයින තුළ බහුතර කොටස් හිමිකාරීත්වයෙන් යුතු පළමු පෙළ බැංකුවකින් සමන්විත විදේශීය මෙහෙයුමක් පවත්වාගෙන යන ශ්රී ලංකාවේ එකම පුද්ගලික වාණිජ බැංකුව ද වේ.
