SLT-MOBITEL රාමසාන් සැමරුමට එක්වෙමින් කළුතර ශිෂ්‍ය ප්‍රජාව වෙනුවෙන් ඉෆ්තාර් වැඩසටහනක් සංවිධානය කරයි

ජාතික තොරතුරු හා සන්නිවේදන තාක්ෂණ විසඳුම් සම්පාදක වන SLT-MOBITEL, කළුතර අල් මද්රාසතුල් බද්රියා හිදී ඉෆ්තාර් හමුවක් සංවිධානය කිරීමට පසුගියදා කටයුතු කළේය. එහිදී ශිෂ්‍යයන් 75 දෙනෙකුට ආසන්න පිරිසකට රාමදාන් උපවාස අවසන් කිරීමට අවස්ථාව ලැබිණි. මෙය සමාජයීය වගකීම්සහගත බව සහ ප්‍රජාවන්ගේ සුභසාධනය වෙනුවෙන් SLT-MOBITEL දක්වන කැපවීම තවදුරටත් තහවුරු කළ අවස්ථාවක් විය.
 



 
සාමූහික ප්‍රයත්නයන් මගින් ප්‍රජාවන් අතර අර්ථවත් වෙනසක් ඇති කළ හැකි බව රාමසාන් උත්සවය ප්‍රබල ලෙස සිහිපත් කරයි. එබැවින් විවිධ දුෂ්කරතාවන්ට මුහුණ දී සිටින ප්‍රජාවන් සමඟ එක් වී මෙම පූජනීය මාසය සැමරීම, ඉස්ලාම් ධර්මය තුළ සඳහන් වන ආකාරයට පරිත්‍යාගයේ සැබෑ හරය තවදුරටත් ශක්තිමත් කිරීමක් බව SLT-MOBITEL දැඩි ලෙස විශ්වාස කරයි.

SLT-MOBITEL හි ආයතනික ප්‍රජා සත්කාර ප්‍රයත්නයන් යටතේ මෙම වැඩසටහන සංවිධානය කරන ලදී. එය ආත්මීය පරිකල්පනය, කෘතඥතාව හා පරිත්‍යාගශීලීත්වය යන ගුණාංගවල වැදගත්කම අවධාරණය කරන අවස්ථාවක් ලෙස රාමසාන් උත්සවයේ වැදගත්කම මැනැවින් පෙන්වා දුන් වැඩසටහනක් විය. විශේෂයෙන්ම ලොව පුරා මිලියන ගණනක ජනතාවකට ආහාර සුරක්ෂිතතාව අහිමි වී ඇති මෙවන් යුගයක, කුසගින්න තුරන් කිරීමේ සහ සහයෝගීතාව වර්ධනය කිරීමේ වැදගත්කම රාමසාන් උත්සවය මගින් සංකේතවත් වන බව සමාගම විශ්වාස කරයි.

මේ ආකාරයට අධ්‍යාත්මික ආශිර්වාදයන් සමඟින් සෞඛ්‍ය සම්පන්න ඉෆ්තාර් හමුවක් සඳහා පහසුකම් සැලසීමට අමතරව, සිය පාරිසරික, සමාජීය සහ ආයතනික පාලන (ESG) වැඩසටහන්වල කොටසක් වශයෙන් සිසුන්ට අත්‍යවශ්‍ය පාසල් උපකරණ පරිත්‍යාග කිරීමටද SLT-MOBITEL කටයුතු කළේය. සිසුන්ට සිය අධ්‍යාපනයට හා යහපැවැත්මට අවශ්‍ය සම්පත් පිරිනැමීමට අමතරව තිරසර ප්‍රජා සංවර්ධනයක් සඳහා සමාගම දක්වන කැපවීමද මෙමගින් මැනැවින් පිළිබිඹු විය. මේ ආකාරයට සිසු පරපුරේ කායික හා අධ්‍යාත්මික යහපැවැත්ම තහවුරු කිරීම ඔස්සේ, සමාජයට යහපත් හා දීර්ඝකාලීන බලපෑමක් ඇතිකිරීම සඳහා SLT-MOBITEL දිගින් දිගටම කැප වී සිටී.