SLT-MOBITEL තිරසර මෙහෙවර අඛණ්ඩව පෙරට

මීරිගමදී රුක් රෝපණ වැඩසටහනක් සහ පුස්තකාල පොත් ප්‍රදානය කිරීමේ වැඩසටහනක් සංවිධානය කරයි

ජාතික තොරතුරු හා සන්නිවේදන තාක්ෂණ විසඳුම් සම්පාදක SLT-MOBITEL, තවත් රුක් රෝපණ වැඩසටහනක් සහ පුස්තකාල පොත් ප්‍රදානය කිරීමේ වැඩසටහනක් මීරිගම තවලම්පිටිය මහා විද්‍යාලයේදී පැවැත්විණි. දරු දැරියන්ගේ මනස පෝෂණය කිරීම, පරිසරය ආරක්ෂා කරගැනීම සහ සියලුම දෙනාගේ යහපත වෙනුවෙන් වඩාත් සුරක්ෂිත ශ්‍රී ලංකාවක් බිහිකිරීම, SLT-MOBITEL හි පාරිසරික, සමාජීය සහ පාලන (Environmental Social Governance – ESG) වැඩසටහනේ මූලික අරමුණු වේ.

SLT-MOBITEL, සාමාන්‍යාධිකාරී (අලෙවි සේවා) අනුරුද්ධ සූරියාරච්චි මහතා සහ එම සමාගමේ නිලධාරීන් පිරිසක්, තවලම්පිටිය මහා විද්‍යාලයේ විදුහල්පතිතුමන් සහ ගුරු මණ්ඩලයේ සාමාජික සාමාජිකාවන් පිරිසක් මෙන්ම පාසලේ දරුවන් සහ දෙමාපියන් පිරිසක් මෙම අවස්ථාවට එක්වූහ.

SLT-MOBITEL ක්‍රියාවට නංවා ඇති ‘රට පුරා හුස්මයි පොහොරයි වගාකරමු’ වැඩසටහන යටතේ ක්‍රියාවට නැංවූ 9 වැනි මී පැළ සිටුවීමේ වැඩසටහන මෙය වේ. වාතයේ ගුණාත්මකභාවය වැඩිදියුණු කිරීම, හරිතාගාර වායු අවම කිරීම සහ පසේ සාරවත්භාවය වැඩි කිරීම මෙම ව්‍යාපෘතියේ මූලික අරමුණු වේ. මේ වනවිට මොණරාගල, උමංදාව, අනුරාධපුර සහ කුණ්ඩසාලේ වැනි ප්‍රදේශවල මෙම වැඩසටහන ක්‍රියාත්මක කර ඇති අතර, මෙවර වැඩසටහනේදී මී පැළ 50 කට අසන්න සංඛ්‍යාවක් රෝපණය කරන ලදි.

නවීකරණය කරන ලද පුස්තකාලය සිසු අයිතියට පැවරිම සහ පුස්තකාල පොත් ප්‍රදානය කිරීමද මෙහිදී සිදුවිය. මෙය දරු දැරියන් 400 කට අධික පිරිසකගේ කියවීමේ පුරුදු වර්ධනය කරවීමට රුකුලක් වනු ඇතැයි අපේක්ෂා කෙරේ. පරිසරය ආරක්ෂා කරමින් දේශගුණ වෙනස්කම් අවම කිරීමට දායක වන අතරම සමාජයේ සහ ජනතාවගේ යහපැවැත්ම තහවුරු කිරීම, SLT-MOBITEL ක්‍රියාවට නංවන මෙම සමාජ සත්කාරයන්හි පරමාර්ථය වී ඇත.