ලංකා ව්‍යාපාරික පුවත් - LBN
ලෝක බැඩ්මින්ටන් සම්මේලනයේ සහ ආසියානු බැඩ්මින්ටන් සංගමයේ අනුමැතිය යටතේ ශ්‍රී ලංකා බැඩ්මින්ටන් ආයතනය විසින් මෙහෙයවනු ලබන ‘HUNDRED ශ්‍රී ලංකා‘ ජාත්‍යන්තර තරගමාලාවේ පිරිමි ඒකල අවසන් පූර්ව වටයට සුදුසුකම් ලැබීමට බුවනෙක ගුණතිලක සමත් විය. කොළඹ 10, සාන්ත ජෝශප් විදුහල් ගෘහස්ත ක්‍රීඩා සංකීර්ණයේ පැවැත්වෙන මෙම තරගමාලාවේ අර්ධ අවසන් පූර්ව වටයේදී ලෝක ශ්‍රේණිගත කිරිම්වල 243 වැනි ස්ථානයේ පසුවන ඉන්දියාවේ නරේන් අයියර් තරග වට 2-1 කින් පරාජය කළ බුවනෙක ගුණතිලක දැනටමත් ලෝකඩ පදක්කම තහවුරු කරගැනීමට සමත් වී සිටී. එය එහු වසර 2019න් පසු අත්කර ගන්නා පළමු ජාත්‍යන්තර බැඩ්මින්ටන් පදක්කම බවටද පත්වනු ඇත.
‘HUNDRED ශ්‍රී ලංකා‘ ජාත්‍යන්තර තරගමාලාවේ පිරිමි ඒකල අවසන් 32 දෙනාගේ වටයේදී ලකුණු 21-7ක් සහ 21-15ක් ලෙස ඉන්දුනීසියාවේ හෙන්රිකෝ කෝ පරාජය කිරීමට බුවනෙක සමත් වූ අතර, 64 දෙනාගේ වටයේදී ඔහු වෙතින් ඉන්දියාවේ සිද්ධාර්ථ මිෂ්රා තරග වට 2-1කින් පරාජයට පත්විය.
‘HUNDRED ශ්‍රී ලංකා‘ ජාත්‍යන්තර තරගමාලාවේ පිරිමි ඒකල තරග අංශයේ අවසන් 32දෙනාගේ වටයට එක්වීමට සමත් වූ රසිඳු හෙන්දහේවා එහිදී ඉන්දියාවේ ජින්පෝල් සොනා සමඟ තරග වැදුණු අතර, දෙවැනි වටයේදී ඔහු තරගයෙන් ඉවත් විය.
ශ්‍රී ලංකාව ඇතුළුව රටවල් 16ක ක්‍රීඩක ක්‍රීඩිකාවන් 260 දෙනකුට ආසන්න සංඛ්‍යාවක් තරග වදින ‘HUNDRED ශ්‍රී ලංකා‘ ජාත්‍යන්තර තරගමාලාව 7 වැනිදා නිමාවට පත්වීමට නියමිතය. කාන්තා හා පිරිමි ඒකල, යුගල සහ මිශ්‍ර යුගල තරග ඉසව් ඇතුළත් මෙම තරගාවලියේ ජයග්‍රාහක ජයග්‍රාහිකාවන්ට අමෙරිකානු ඩොලර් 5,000ක මුදල් ත්‍යාග පිරිනැමීමට නියමිත අතර, තරගාවලිය සඳහා HUNDRED, Mobil, McFoil, 3M සහ LI-NING අනුග්‍රාහකත්වය ලැබී තිබේ.
