ලංකා ව්‍යාපාරික පුවත් - LBN
සන්ෂයින් හෝල්ඩින්ග්ස් පීඑල්සී හි මානව සම්පත් අංශය නියෝජනය කළ නායකයින් දෙදෙනෙකු පසුගියදා ඉන්දියාවේ පැවති 2024 ලෝක මානව සම්පත් සම්මේලනයේදී විශිෂ්ට සම්මානයන්ගෙන් පිදුම් ලැබීමට සමත් වූ බව නිවේදනය කරන ලදී. පසුගිය පෙබරවාරි මස මුම්බායිහි Taj Lands Ends හි පැවති 32 වැනි ලෝක මානව සම්පත් සම්මේලනය හා සම්මාන ප‍්‍රධානෝත්සවයේදී සන්ෂයින් හෝල්ඩින්ග්ස් හි මානව හා ආයතනික සන්නිවේදන සමූහ ප්රධාන නිලධාරී මිචෙල් සේනානායක මහත්මිය Most Iconic HR Leaders – Global Listing සම්මානයෙන් පිදුම් ලැබීමට සමත් වූ අතර එහි සේවක ප‍්‍රතිලාභ හා ඒකාබද්ධතා ප‍්‍රධානී තරංගද සිල්වා මහතා ‘Top Most Influential C&B සම්මානයෙන් පිදුම් ලැබුවේ විශිෂ්ට ගෝලීය නායකයින් ලෙස ගෞරවයට පාත‍්‍ර වෙමිනි.
‘’Most Iconic HR Leaders – Global Listing’’ සම්මානයෙන් පිදුම් ලැබූ මිචෙල් සේනානයක මහත්මිය ඒ තුළින් ප‍්‍රදර්ශනය කරනු ලැබුවේ මානව සම්පත් වෘත්තීය වෙනුවෙන් ඇයගේ සුවිසල් දායකත්වයයි. සේවා ස්ථාන මානව කුසලතා සංවර්ධනය සඳහා වූ ඇයගේ කැපවීම සහ කර්මාන්තයේ ඉදිරියට ගෙන යාමේ නායකාවක් ලෙස ඇය ඉටු කළ කාර්යභාරය ගෝලීය වශයෙන් පිළිගැනීමට ලක්ව ඇත.
මෙහිදී ගෞරවයට පාත‍්‍ර වූ තරංගද සිල්වා විවිධ ජාත්‍යන්තර අංශයන් නියෝජනය කළ C&B/Total Rewards අංශයේ වෘත්තීය නියෝජිතයින් 300ක් අතුරෙන් සම්මානය දිනා ගන්නා ලදී. ගෝලීය වශයෙන් වන්දි හා ප‍්‍රතිලාභ ක්ෂේත‍්‍රවල අනාගතය හැඩගැස්වීම උදෙසා ඔහුගේ කැපවීම මනාව පිළිබිඹු කළ එම සම්මානය ක්ෂේත‍්‍රය තුළ ඔහු දැක්වූ සුවිශේෂී දක්ෂතා හා ආභාසය පිළිබඳ කදිම සාක්ෂියක් ලෙසද සඳහන් කළ හැකිය.
සම්මානයට පාත‍්‍ර මිෂෙල් සේනානායක මහත්මිය Global HR 2.0: A back-to-the-future dialogue on shaping the tomorrow’s Workforce dynamics’ යන තේමාව යටතේ එහි පවත්වනු ලැබූ විද්වත් සාකච්ඡුාවෙහි සාමාජිකාවක් ලෙසද කටයුතු කරන ලදී. තවද Great Place to Work® හි ස්වාධීන විශ්ලේෂණයන් තුළින් අඛණ්ඩව තෙවන වරටත් Great Place to Work® විශිෂ්ටත්වය දිනා ගැනීමටද සන්ෂයින් හෝල්ඩින්ග්ස් පසුගිය වසරේ සමත් විය.
මෙම සුවිශේෂී පිළිගැනීම් සම්බන්ධයෙන් අදහස් දැක්වූ සන්ෂයින් හෝල්ඩිංග්ස් සමූහ ව්‍යාපාරයේ ප්රධාන විධායක නිලධාරී ශ්‍යාම් සතාසිවම් මහතා සඳහන් කර සිටියේ ‘’ලෝක මානව සම්පත් සම්මේලනයේදී තමන් විසින් හිමිකරගත් ගෞරවය වෙනුවෙන් මිෂෙල්ට සහ තරංගට මාගේ උණුසුම් සුභ පැතුම් එක් කර සිටිනවා. ඔවුන් ලද මේ ජයග‍්‍රහණය තුළින් සන්ෂයින් හෝල්ඩින්ග්ස්හි මානව සම්පත් සංවර්ධනය කෙරෙහි දක්වන කැපවීම මනාව ප‍්‍රදර්ශනය වනවා. එසේම මෙය අපගේ ආයතනය වෙනුවෙන් ඔවුන් සිදුකරන කැපවීම සම්බන්ධයෙන් කදිම සාක්ෂියක් ලෙසද සඳහන් කළ හැකියි. සන්ෂයින් හෝල්ඩින්ග්ස් ආයතනයක් ලෙස මානව සම්පත අප සතු වටිනාම සාධකය ලෙස නිරන්තරයෙන් සලකන අතර මිෂෙල් සහ තරංග එය මනාව අවධාරණය කර තිබෙනවා. විශිෂ්ට මානව සම්පතක් වෙනුවෙන් ඔවුන් සිදු කරන කැපවීම සන්ෂයින්හි තිරසාරත්ව හා වර්ධන උපාය මාර්ගයන්ට මනාව ගැලපෙන අතර එය විශිෂ්ට හා පුද්ගල කේන්ද්‍රීය සේවා ස්ථානයක් නිර්මාණය වෙනුවෙන් කදිම පිටිවහලක් වන බව මෙහිදී මතක් කළ යුතුයි.’’ යනුවෙනි.
ශක්තිමත්ව, කැපවීමෙන් කටයුතු කරන ශ‍්‍රම බලකායක් නිර්මාණය කිරීම සඳහා වන සන්ෂයින් හෝල්ඩිංග්ස් හි උත්සාහය එහි මානව සම්පතෙහි සාර්ථකත්වයට ඉවහල් වී ඇති ඇති බව නිසැක වශයෙන් සඳහන් කළ හැකිය. විශේෂයෙන් මානව සම්පතෙහි කුසලතා සංවර්ධනය වෙනුවෙන් සුවිසල් අවස්ථාවක් නිර්මාණය කර ඇති සන්ෂයින් හෝල්ඩිංග්ස් නිරන්තරයෙන් අධ්‍යයන හා සංවර්ධන වැඩසටහන් සඳහා ප‍්‍රමුඛත්වයක් ලබා දීමට කටයුතු කරයි. ඒ තුළින් සිය විශිෂ්ට ව්‍යාපාරයේ ස්වභාවය පිළිබඳ එහි සේවක ප‍්‍රජාවට අවබෝධ කර ගැනීමේ අවස්ථාව සළසා දෙන සමාගම ඒ තුළින් සිය සේවක ප‍්‍රජාව නවෝත්පාදන හා කණ්ඩායම් සංස්කෘතිය අනුගමනය කරන බවටත් හා කාලෝචිත හැකියාවන්ගෙන් සමන්විත වන බවටත් තහවුරු කිරීමට සමත්ව ඇත. විවිධත්වය, සමානාත්මතාව හා ආයතනික ප‍්‍රතිපත්ති අනුව කටයුතු කරන ශ‍්‍රම බලකායකගේ ශක්තිය පිළිබඳ නිරන්තර විශ්වාසය කිරීම කේන්ද්‍ර කොටගත් සන්ෂයින් සෑම සේවකයකුටම සමානාත්මතාව, ගරුත්වය හා සංස්කෘතික වටිනාකමක් ලබා දෙමින් ඔවුන්ගේ අනාගත අභිවෘද්ධිය වෙනුවෙන් හිතකාමී සේවා ස්ථානයක් පවත්වා ගැනීමට කටයුතු කරනු ලබයි.
1992 වසරේදී ආරම්භ කරන ලද වාර්ෂික ලෝක මානව සම්පත් සම්මේලනය මානව සම්පත් කළමනාකරණය වෙනුවෙන් වූ වර්ධනය වන ප‍්‍රවණතාවන් සමාලෝචනය කරන අතරම වේගවත් ව්‍යාපාරික පරිසරයක් තුළ සුවිශේෂී හැකියාවන් සලසා ගැනීම හා දක්ෂතාවන් ඉහළ නැංවීමට වෘත්තිකයින් හට උපරිම අවස්ථාවන් ලබා දෙයි. රටවල් 133කට වැඩි සංඛ්‍යාවක මානව සම්පත් වෘත්තිකයින් 1800කට අධික සංඛ්‍යාවක් ලෝක මානව සම්පත් සම්මේලනය නියෝජනය කරනු ලබයි.
සන්ෂයින් හෝල්ඩින්ග්ස් පීඑල්සී යනු ශ්රී ලංකා ආර්ථිකයේ සුව සේවා, පාරිභෝගික සහ කෘෂි ව්‍යාපාර යන අංශවල උපායමාර්ගික ආයෝජන සමඟ වටිනාකමක් ඇති කරමින් ‘’ජාතිය ගොඩනැගීමට’’ දායකත්වයක් දක්වන සමූහ ව්‍යාපාරයකි.
වසර 57 කට පෙර 1967 දී ආරම්භ කරන ලද මෙම සමූහය සේවකයින් 2,000 කට අධික සංඛ්‍යාවකින් සහ ත්‍ශ23 සඳහා රු. බිලියන 51ක ආදායමක් සමඟින් මේ වන විට Zesta Tea, Watawala Tea, Ran Kahata, Daintee Confectionary සහ Healthguard Pharmacy වැනි ප්රමුඛ පෙළේ ශ්රී ලාංකේය සන්නාමවලට නිවහන සපයයි. සමූහයේ ව්‍යාපාරික ඒකකවලට Sunshine Healthcare Lanka, Sunshine Consumer Lanka සහ Watawala Plantations PLC ඇතුළත් වන අතර, ඒවා අදාළ අංශවල පුරෝගාමීන් වේ. ඒවායින් බොහොමයක් ආයතන 2023 දී ද “Great Place to Work” සහතිය හිමි කරගෙන තිබීම විශේෂත්වයකි.
අපගේ දැක්ම වන ”යහපත් දේ ජීවිතයට ගෙන ඒම” යටතේ අපි සියලූ ශ්රී ලාංකිකයින්ට ගුණාත්මක ඖෂධ සහ පාරිභෝගික නිෂ්පාදන දැරිය හැකි මිලකට ලබා දීමට කටයුතු කරන අතර එමගින් සැමට වඩා හොඳ ජීවන තත්වයක් සහතික කිරීමට හැකියාව ලැබී ඇත. අපගේ අඛණ්ඩ වර්ධනයට පදනම වී ඇත්තේ අපගේ ව්‍යාපාරය තුළ පවත්වා ගෙන යන සදාචාරාත්මක වටිනාකම් සහ දිනා ඇති පාරිභෝගික විශ්වාසයයි.
