ලංකා ව්‍යාපාරික පුවත් - LBN
ජාතික තොරතුරු හා සන්නිවේදන තාක්ෂණ විසඳුම් සම්පාදකවන SLT-MOBITEL, පසුගියදා පැවති 38 වැනි වාර්ෂික ජාත්‍යන්තර ARC සම්මාන උළෙලේදී (Annual International ARC Awards) රන් සම්මානයක් සහ ගෞරව සහතිකයක් සමගින් ගෝලීය ඇගයීමකට ලක් විය. ලොව දැවැන්තම වාර්ෂික වාර්තා සම්මාන උළෙල ලෙස සැලකෙන ARC සම්මාන උළෙලේදී ලොව පුරා සමාගම් හා ආයතන විසින් ප්‍රකාශයට පත්කරන ලද විශිෂ්ටතම වාර්ෂික වාර්තා මෙලෙස ඇගයීමට ලක් වේ.
මෙවර සම්මාන උළෙලේදී සම්මානයට පාත්‍ර වූයේ, Sri Lanka Telecom PLC විසින් 2023 වසරේදී ‘We are an ‘App’ of Life’ යන තේමාව යටතේ ප්‍රකාශයට පත්කරන ලද වාර්ෂික වාර්තාවයි. එම වාර්තාවට ‘Illustrations: Telecommunications’ කාණ්ඩයේ රන් සම්මානය සහ ‘Specialized AR – Integrated AR & ESG’ කාණ්ඩයේ ගෞරව සහතිකයක් හිමි විය.
වාර්ෂික වාර්තා පිළියෙල කිරීමේදී SLT-MOBITEL ලොව ඉහළම ප්‍රමිතීන් අනුගමනය කරන බව මෙම ජයග්‍රහණ මගින් තහවුරු වන අතර, එය ශ්‍රී ලංකාවේ මෙන්ම ජාත්‍යන්තර තලයේ දුරකථන සන්නිවේදන සේවා ක්ෂේත්‍රය තුළ ප්‍රමුඛයෙකු ලෙස SLT-MOBITEL සතු පිළිගැනීම තවදුරටත් ශක්තිමත් කරයි.
තවද ආයතනික වාර්තාකරණයේදී විනිවිදභාවය, නිර්මාණශීලීත්වය සහ විශිෂ්ටත්වය පවත්වා ගැනීමට SLT-MOBITEL කැප වී සිටින බවද මෙම ජාත්‍යන්තර පිළිගැනීම මගින් නැවත වරක් තහවුරු වේ. ‘We are an ‘App’ of Life” වැනි නව්‍ය තේමාවක් යටතේ වාර්තාව ප්‍රකාශයට පත්කිරීමට SLT-MOBITEL පියවර ගෙන තිබීම සම්මාන උළෙලේ විනිශ්චය මණ්ඩලයේ විශේෂ අවධානයට ලක් වූ අතර, ඒ හේතුවෙන් දුරකථන සන්නිවේදන සේවා කාණ්ඩයේ ඉහළම ජයග්‍රහණ වාර්තා කිරීමට SLT-MOBITEL සමත් විය.
එමෙන්ම ‘Specialized AR – Integrated AR & ESG’ කාණ්ඩයේ ගෞරව සහතිකයක් හිමි කරගැනීම මඟින් SLT-MOBITEL සිය පාරිසරික, සමාජයීය සහ ආයතින යහපාලන වැඩසටහන් පිළිබඳ තොරතුරු පූර්ණ වශයෙන් වාර්තා කිරීමට කටයුතුකරන බවට මනා සාක්ෂියකි.
38 වන වරටත් පැවැත්වුණු ARC සම්මාන උළෙල ලොව වාර්ෂික වාර්තා සම්මාන වැඩසටහන් අතර ‘ඇකඩමි සම්මාන උළෙල’ ලෙස සැලකේ. එය වාර්ෂික වාර්තා පිළියෙල කිරීමේදී ඉහළම තලයේ ප්‍රමිතීන් අනුගමනය කිරීම දිරිගන්වයි. මෙම සම්මාන සඳහා සලකා බැලෙනුයේ ඉහළම ලකුණු ලබාගන්නා වාර්ෂික වාර්තා 30% පමණක් වන අතර, එය SLT-MOBITEL ලද ජයග්‍රහණය කෙතරම් වැදගත්ද යන්න සනාථකරන සාක්ෂියකි. මෙවර සම්මාන උළෙලට රටවල් 32 කින් නාමයෝජනා 1,550 ක් ඉදිරිපත් වී තිබූ අතර ඒ අතරින් Sri Lanka Telecom PLC සම්මානයට පාත්‍ර වීම සුවිශේෂීය.
MerComm, Inc. මගින් පිරිනමනු ලබන ARC සම්මාන සඳහා සුදුස්සන් තීරණය කරනු ලබන්නේ ක්ෂේත්‍රයේ ප්‍රමුඛ පෙළේ ප්‍රවීණයන්ගෙන් සමන්විත විනිශ්චය මණ්ඩලයක් මගිනි. ඉහළම තලයේ වාර්ෂික වාර්තා ඔස්සේ තම ආයතනික තොරතුරු සාර්ථක ලෙස සන්නිවේදනය කරමින් කොටස් හිමිකරුවන්ට උපරිම වටිනාකම් තිළිණ කිරීමට සමත් වූ සමාගම් හා ආයතන මෙවර සම්මාන උළෙලේදීද ඇගයීමට ලක් විය.
