ලංකා ව්‍යාපාරික පුවත් - LBN
SLT-MOBITEL සහ PEO SPORTS මෙවර ක්ලිෆර්ඩ් කුසලානය සහ යොවුන් බොක්සින් තරගාවලියේ (Clifford Cup & Youth Boxing Tournament 2024) නිල විකාශන හවුල්කරු ලෙස කටයුතු කළේ ය. මෙම තරගාවලිය පසුගියදා මහනුවර සහස් උයනේදී පැවැත්විණි. ශ්‍රී ලංකා බොක්සිං සංගමය සමග එක්ව සංවිධානය කළ මෙම වැඩසටහනට රටේ තරුණ බොක්සිං ක්‍රීඩක ක්‍රීඩිකාවෝ රැසක් සහභාගී වූහ. මෙහිදී ඔවුන්ට තම දක්ෂතා පෙන්නුම් කිරීමට අමතරව ක්‍රීඩාව පිළිබඳව තමන් තුළ ඇති උනන්දුව තවදුරටත් වර්ධනය කරගැනීමටත්, ජාතික තලයේ තරගාවලියක අත්දැකීම් හිමිකර ගැනීමටත් අවස්ථාව ලැබිණි.
මෙම තරගාවලිය ශ්‍රී ලංකාවේ බොක්සිං ක්‍රීඩක ක්‍රීඩිකාවන්ගේ දක්ෂතා මෙන්ම, රටේ යොවුන් පරපුර දිරිගන්වමින් ක්‍රීඩා ක්ෂේත්‍රය ප්‍රවර්ධනය කිරීම සඳහා SLT-MOBITEL දක්වන උනන්දුව හා කැපවීමද මැනැවින් පිළිබිඹු කළ අවස්ථාවක් විය. බොහෝ දෙනෙකු වැඩි කැමැත්තකින් බලා සිටි තරගාවලියක් වූ මෙයට දිවයිනේ පාසල් 100 ක්, ක්‍රීඩා සමාජ 20 ක් සහ ත්‍රිවිධ හමුදාව නියෝජනය කරමින් ක්‍රීඩක ක්‍රීඩිකාවන් 500 කට වැඩි පිරිසක් සහභාගී වූහ. එහිදී එම ක්‍රීඩක ක්‍රීඩිකාවන්ගේ දක්ෂතා දැකබලා ගැනීමට නරඹන්නන්ට අවස්ථාව ලැබුණු අතර, ඒ ඔස්සේ මෙම තරගාවලිය මේ වන විට රටේ විශිෂ්ටතම බොක්සිං කුසලතා දැකගැනීමට ලැබෙන තරගාවලියක් ලෙස පිළිගැනීමට ලක් වී තිබේ.
තරගාවලියේ නිල විකාශන හවුල්කරු වශයෙන් PEO SPORTS එයට විශිෂ්ට මාධ්‍ය ආවරණයක් ලබාදෙමින්, දේශීය හා විදේශීය ප්‍රේක්ෂකයන්ට ඉහළම ප්‍රමිතියෙන් යුතුව එය නැරඹීමට අවස්ථාව සලසා දුන්නේ ය. එය රටේ නව්‍ය ඩිජිටල් විකාශනයේ පුරෝගාමියෙකු වශයෙන් PEO SPORTS සතු පිළිගැනීම තවදුරටත් තහවුරු කළ අවස්ථාවක් විය. ප්‍රේක්ෂක අත්දැකීමෙහි පෙරළියක් සිදුකරමින් PEO SPORTS විසින් ප්‍රථම වරට PEO SPORTS 1 ඔස්සේ HD ප්‍රමිතියෙන් යුතුව තරගාවලිය සජීවීව විකාශය කරන ලදී. ශ්‍රී ලංකාවේ ඕනෑම ස්ථානයක සිට PEO MOBILE App එක ඔස්සේද ප්‍රේක්ෂකයන්ට සජීවීව තරග නැරඹිය හැකි වූ අතර, ජාත්‍යන්තර ප්‍රේක්ෂකයන්ටද PEO SPORTS Facebook පිටුව සහ YouTube නාලිකාව ඔස්සේ තරග නැරඹිය හැකි විය. මේ නිසා බාල තරුණ මහලු භේදයකින් තොරව සියලුම බොක්සිං ලෝලීන්ට සුපැහැදිලි දර්ශන සහිතව සිත් සේ මෙම තරගාවලිය නැරඹීමට අවස්ථාව ලැබිණි. මෙය රටේ පාසල් සිසුන්, පවුල්, දෙමාපියන්, වෘත්තීය බොක්සිං ලෝලීන්, ක්‍රීඩා සමාජ, පුහුණුකරුවන් සහ ජාත්‍යන්තර බොක්සිං ප්‍රජාව එක්තැන් කරමින්, ක්‍රීඩාවේ උණුසුම සහ සැබෑ ක්‍රීඩාශීලීත්වයේ අගය පෙන්නුම් කළ සුවිශේෂී තරගාවලියක් විය.
තරුණ සංවර්ධනය හා ක්‍රීඩා ක්ෂේත්‍රයේ ප්‍රවර්ධනය උදෙසා SLT-MOBITEL සහ SLT PEOTV සතු නොසැලෙන කැපවීම මෙම තරගාවලිය තුළදී මැනැවින් ප්‍රදර්ශනය විය. තරුණ ක්‍රීඩක ක්‍රීඩිකාවන්ට ජාත්‍යන්තර තලයේ වේදිකාවකදී තම දක්ෂතා දැක්වීමට අවස්ථාව සලසා දීම තුළින් අනාගත පරපුරේ ශූරයන්ගේ දක්ෂතා වැඩිදියුණු කිරීම සහ රටේ බොක්සිං ක්‍රීඩාව නගාසිටුවීම සඳහා SLT PEOTV කේන්ද්‍රීය භූමිකාවක් ඉටු කරන ලදී.
මෙම තරගාවලිය සංවිධානය කිරීමේදී ඉටු කළ මෙහෙවර වෙනුවෙන් ශ්‍රී ලංකා බොක්සිං සම්මේලනයට (BASL) විශේෂ ස්තූතියක් හිමි විය යුතු ය. ඔවුන්ගේ උනන්දුව හා කැපවීම හේතුවෙන් ශ්‍රී ලංකාවේ විශිෂ්ටතම බොක්සිං ශූරයන් පිරිසක් එකම වේදිකාවකට ගෙන ආ තරගාවලියක් සාර්ථක ලෙස සංවිධානය කිරීමටත්, ඒ ඔස්සේ තරුණ ක්‍රීඩක ක්‍රීඩිකාවන් දිරිගන්වමින් රටේ බොක්සිං ක්ෂේත්‍රය සතු පිළිගැනීම ඉහළ නැංවීමටත් හැකියාව ලැබිණි. ක්‍රීඩාව දියුණු කරමින් තරුණ ක්‍රීඩක ක්‍රීඩිකාවන්ට ජාතික තලයේදී දස්කම් පෙන්වීමට අවස්ථාව සලසා දීම සඳහා සංගමය දක්වන උනන්දුව මෙමගින් මැනැවින් නිරූපණය විය. මේ ආකාරයට තරුණ පරපුරේ දක්ෂතා වැඩිදියුණු කරමින් බොක්සිං ක්‍රීඩාවට වැඩි ප්‍රචාරයක් ලබාදීම සඳහා ඉදිරියේදීත් මෙවැනි තරගාවලි සංවිධානය කිරීමට ශ්‍රී ලංකා බොක්සිං සංගමය බලාපොරොත්තු වෙයි.
2024 ක්ලිෆර්ඩ් කුසලානය සහ තරුණ බොක්සින් තරගාවලිය ශ්‍රී ලංකාවේ ක්‍රීඩා ඉතිහාසයේ සුවිශේෂී සන්ධිස්ථානයක් ලෙස ඉතිහාසගත වනු ඇත. SLT-MOBITEL සහ PEO SPORTS මගින් ලබාදෙන ලද විශිෂ්ට මාධ්‍ය ආවරණය හේතුවෙන් ප්‍රේක්ෂකයන් විශාල පිරිසකට තරගාවලිය නැරඹීමට හැකි විය. එහිදී බොක්සින් ක්‍රීඩාව ජනතාවට යහපත් ආදර්ශයක් සපයමින් ඔවුන් එකමුතු කරවන ආකාරය දැකබලා ගැනීමට කාටත් අවස්ථාව ලැබුණු අතර, එය ශ්‍රී ලංකාවේ බොක්සිං ක්‍රීඩක ක්‍රීඩිකාවන් වෙනුවෙන් වඩාත් යහපත් අනාගතයක් නිර්මාණය කිරීමටද මහෝපකාරී වනු නිසැක ය.
