ශ්‍රී ලංකාවේ ඔලිම්පික් බලාපොරොත්තුව විරේන් නෙත්තසිංහ ඩාවෝ සයිපන් ජාත්‍යන්තර ශූරතාවලියේ අවසන් පූර්ව වටයට

අමෙරිකාවේ මරියානා දූපත් සමූහයේ සයිපන් හී පැවැත්වෙන ඩාවෝ සයිපන් ජාත්‍යන්තර බැඩ්මින්ටන් ශූරතාවලියේ පිරිමි ඒකල විවෘත තරග අංශයේ අර්ධ අවසන් පූර්ව වටයට සුදුසුකම් ලැබීමට ශ්‍රී ලංකාවේ ඔලිම්පික් බලාපොරොත්තුව වන සුපිරි බැඩ්මින්ටන් තරුව විරේන් නෙත්තසිංහ සමත් විය.

උතුරු මරියානා බැඩ්මින්ටන් සංගම් ශාලාවේ පැවැත්වෙන මෙම ශූරතාවලියේ පළමු තරගයෙන්  නිතරග ජයක් ලැබූ විරේන් නෙත්තසිංහ දෙවැනි තරගයේදී චීන ක්‍රීඩක චෙං චි ටිං ලකුණු 23-21 ක් සහ 21-18ක් ලෙස පරාජය කරමින් අවසන් 16 දෙනාගේ වටයට පිවිසි අතර, එහිදී ඉන්දීය ක්‍රීඩක ආර්යමාන් ටාන්ඩන්ට එරෙහිව ලකුණු 21-18ක් සහ 21-15ක ජයක් අත්කර ගනිමින් පිරිමි ඒකල විවෘත තරග අංශයේ අවසන් පූර්ව වටයට සුදුසුකම් ලබා සිටී.

අවසන් පූර්ව වටයේදී ඔහු තරග වැදීමට නියමිතව ඇත්තේ තුන්වැනි වටයේදී ලකුණු  21-13ක් සහ 21-13ක් ලෙස තායිලන්ත ක්‍රීඩක සේරන් ජාම්සි පරාජය කළ ජපාන ක්‍රීඩක රයෝමා මොරමොටෝ සමඟය.