ලංකා ව්‍යාපාරික පුවත් - LBN
මේ වන තෙක් හුදු විනෝදාස්වාදය අරමුණු කොටගත් සමාජ මාධ්‍ය වේදිකාවක් ලෙස භාවිත කළ TikTok අද වන විට දැනුම බෙදාහදා ගැනීමේ වේදිකාවක් බවට පත්ව ඇති බව රහසක් නොවේ. විනෝදාස්වාදය සමඟින් අධ්‍යාපනය එක් කළ ‘EduTok’ බිහි වන්නේ ඒ අනුවය. ඒ නිසාම එවන් අන්තර්ගතයන් TikTok වෙත එක් කරන සුවිශේෂී නිර්මාණශීල්පීන් රැසක් බිහි වෙමින් ඇති බව පෙනෙන්නට තිබේ. විද්‍යාව, ව්‍යවසායකත්වය සමඟින් ‘EduTok’ අන්තර්ගතයන් නිර්මාණයන් මෙරට තාරුණ්‍යය දැනුමෙන් සවිබල ගන්වන්නට වෙර දරන සංජය ඇල්විටිගලද එවන් නිර්මාණ ශිල්පියකු ලෙස සඳහන් කළ හැකිය.
සරල අදහසක්. සුවිසල් බලපෑමක්
විද්‍යාව හා ඒ ආශ්‍රිත විෂයයන් සම්බන්ධ තාක්ෂණික දැනුමෙන් යුත් සංජය තමන්ගේ දැනුම අනෙක් අය හා බෙදාහදා ගැනීමට මීට පෙර විවිධ ක්‍රමයන් තුළින් උත්සාහ කළද ඒ වෙනුවෙන් වැය වන කාලය හා ශ්‍රමය ඔහුට මහත් ගැටලුවක් විය. ඒ සියලු දේට හොඳම විසඳුම වූයේ TikTok සමාජ මාධ්‍ය වේදිකාවයි. ඒ තුලින් ඔහු බෙදාහදාගත් දැනුම ගවේෂණය කිරීමට ඔහු සමඟ විශාල පිරිසක් එක්ව සිටින නිසාම අද වන විට එය ඩිජිටල් ව්‍යාපාරයක් බවට පත්ව ඇත්තේ ශ්‍රී ලංකාවේ තරුණයන් අතර පමණක් නොව විදේශයන්හිද ජනප්‍රියත්වයක් අත් කර ගනිමිනි.
මෙහිදී සංජය වඩාත් අවධානය යොමු කර සිටියේ සරල අදහසක් මඟින් වඩා විශාල බලපෑමක් ප්‍රේක්ෂකයා තුල ඇති කිරීමටයි. විශේෂයෙන් අඩු අන්තර්ජාල ඉඩ ප්‍රමාණයක් තුළ වැඩි අදහස් ලබා දීම වෙනුවෙන් සිය අන්තර්ගතයන් නිර්මාණය කිරීමට කටයුතු කළ සංජය සිය අවශ්‍යතාවය මනාව සපුරා ගැනීමට සමත් විය.
“මට අවශ්‍ය වුණේ ඉතා කෙටි වීඩියෝවක් තුළින් වැඩි අදහසක් ප්‍රේක්ෂකයා වෙත ලබා දීමටයි. ඒ වෙනුවෙන් පසුබිම් තලයන් නිර්මාණය කිරීමට මට අවශ්‍ය වුණේ නෑ. මගේ ජංගම දුරකතනය තුළින් එය වඩා සාර්ථකව සිදු කිරීමට හැකි වූ නිසා පහසුවෙන් මගේ අදහස් ඉලක්ක ගත පරිශීකයින් වෙත ලබා දීමට හැකි වුණා” සංජය පවසයි.
සංජයගේ TikTok වීඩියෝවල ඇති විශේෂත්වය වන්නේ එහි ආකෘතියයි. ඉක්මන් හා වඩාත් බලපෑම් සහගත නිර්මාණයක් තුළින් ප්‍රේක්ෂකයාට පහසුවෙන් අවබෝධ කර ගත හැකි ආකාරයෙන් ඉදිරිපත් කර ඇති එම නිර්මාණයන් ඒ ආකාරයෙන්ම පවත්වාගෙන යාම සංජයගේ අරමුණයි.
විද්‍යාව වැනි සංකීර්ණ විෂයක් ඉතා සරලව තරුණයින් වෙත ගෙන යාම අභියෝගයක් වුවත් එය ඉතා පහසුවෙන් හා නිර්මාණශීලීව ඔවුන් වෙත ගෙන යාමට සංජයට හැකි වී ඇත්තේ එහෙයිනි.
අධ්‍යාපනයෙන් ප්‍රබෝධයක්
හුදු විනෝදාස්වාදය වෙනුවෙන් නිර්මාණ ඉදිරිපත් කිරීමට වඩා අධ්‍යාපනික වැදගත්කමක් ඇති නිර්මාණයන් ඉදිරිපත් කිරීමට කැපවෙන සංජය ඒ හරහා තමන්ටම ගැලපෙන ප්‍රේක්ෂක ප්‍රජාවක් ගොඩ නැගීමට සමත්ව ඇත. විශේෂයෙන් සිසු සිසුවියන්, වෘත්තිකයින් වැනි අලුත් දෙයක් ඉගෙන ගැනීමට කැමැත්තක් දක්වන්නන් සංජයගේ නිර්මාණයන් වැඩි වැඩියෙන් පරිශීලනය කිරීමට පෙළඹී ඇත.
“මම ව්‍යවසායකත්වය හෝ තාක්ෂණය පිළිබඳ නිර්මාණ පල කරන විට පරිශීලකයින් ඒවා ඉතා උනන්දුවෙන් නරඹනවා. ඒ වගේම ඒවා අනුගමනය කරන ආකාරය විමසනවා. ව්‍යාපාර ගොඩනගා ගැනීමට සිදු කළ යුතු දේ විමසා සිටිනවා. ඒ නිසා TikTok මගේ අදහස් බෙදාහදා ගැනීමට පමණක් නොව ඔවුන් දිරි ගැන්වීමටද අවස්ථාවක් ලබා දී තිබෙනවා” සංජය පවසයි.
වෙළෙඳ නාමයක් නිර්මාණය හා ප්‍රජා වර්ධනය වෙනුවෙන් TikTok හි බලපෑම
අද වන විට සංජය ඉතා සුලුවෙන් ආරම්භ කළ නිර්මාණකරණය විශාල දෙයක් බවට පත්ව ඇත්තේ ඔහුට අන් කවරදාටත් වඩා මිනිසුන් දැනුවත් කිරීම හා පුලුල් ප්‍රේක්ෂක පිරිසක් වෙත ළඟා වීමට අවස්ථාවක් සලසා දෙමිනි. අධ්‍යාපන ආයතනයක නිර්මාතෘවරයා ලෙස සංජය ඔහුගේ සන්නාමය ඉහළ නංවා ගැනීමටද මෙය අවස්ථාවක් කොට ගෙන ඇත.
ඒ නිසාම නිරන්තරයෙන් සිය කුසලතාවන් වර්ධනය කර ගනිමින් නිර්මාණ ඉදිරිපත් කිරීමට සංජය උත්සාහ දරයි.
අනාගත නිර්මාණකරුවන්ට සංජයගේ උපදෙස්
අව්‍යාජ වන්න. නිර්මාණ අන්තර්ගතයන් කෙටියෙන් තබා ගන්න. ඉහළ ශක්තියක් පවත්වා ගන්න. ඒ නව නිර්මාණකරුවන්ට සංජයගේ පළමු උපදෙසයි.
“ඔබට TikTok හි සාර්ථක වීමට අවශ්‍ය නම් පැහැදිලිව, ඉක්මණින් සහ ශක්තිමත්ව කතා කළ යුතුයි. අන්තර්ගතයන් ඕනෑවට වඩා සංකීර්ණ නොකළ යුතු අතර අදහස් ඍජුව ඉදිරිපත් කළ යුතුයි. TikTok හි මෙවලම් භාවිත කරමින් ඔබේ පණිවිඩයේ හරයෙන් ප්‍රේක්ෂකයාගේ අවධානය වෙනතකට යොමු වීමට ඉඩ නොදිය යුතු අතර එසේ වුවහොත් බොහෝ දෙනා ඔබට ආකර්ෂණය වනු ඇත.” ඒ සංජයගේ අදහසයි.
සංජය පවසන්නේ තමන්ගේ මුල් පිටපත අනෙක් නිර්මාණකරුවන් කොපි කිරීමක් නොවිය යුතු බවයි. එසේ වුවහොත් ප්‍රේක්ෂකයින් තමන්ගේ නිර්මාණ ඇගයීමට ලක් කරනු ඇති බව සංජය පවසයි.
ශ්‍රී ලංකාවේ විද්‍යාව සම්බන්ධ TikTok අන්තර්ගයන්හි හෙට දවස
ශ්‍රී ලංකාවේ විද්‍යාව සම්බන්ධ අරුත්බර අනාගතයක් ගොඩ නැගීමට සංජය කටයුතු කර ඇති අතර එවන් නිර්මාණකරුවන් බොහොමයක් TikTok වේදිකාවේ නොසිටින බැවින් තවත් පිරිසකට විද්‍යාව සම්බන්ධ ව්‍යාපාරයක් ගොඩ නැගීමට අවස්ථාව බොහෝය.
සංජය පවසන්නේ ශ්‍රී ලංකාවේ TikTok හි විද්‍යාව සම්බන්ධ අන්තර්ගතයන් තවමත් නොදියුණු මට්ටමක පැවතියද එය වෙනස් වෙමින් පවතින බවයි. ඉගෙන ගැනීමට උනන්දු වන්නන් හට සිත්ගන්නා සුළු ආකාරයෙන් හා සියලු දෙනාට ප්‍රවේශ විය හැකි ආකාරයෙන් ඉදිරිපත් කිරීම තුළින් සැබැවින් වෙනසක් ඇති කළ හැකිය.
TikTok බලපෑම අඛණ්ඩව පවතින බැවින් තවත් නිර්මාණකරුවන් අනාගත පරපුර දැනුවත් කිරීමට නිර්මාණ ඉදිරිපත් කරනු ඇති බව පවසන සංජය ශ්‍රී ලංකාවේ තරුණ තරුණියන් දැනුවත් කිරීමට තව දුරටත් සූදානමින් සිටියි.
