ලංකා ව්‍යාපාරික පුවත් - LBN
ශ්‍රී ලංකාවේ යොවුන් බැඩ්මින්ටන් තරුව විරේන් නෙත්තසිංහ පැරිස් ඔලිම්පික් ක්‍රීඩා උලෙළේ බැඩ්මින්ටන් ඒකල තරග අංශයේ මූලික වටයේදී ලෝක බැඩ්මින්ටන් ඒකල ශ්‍රේණිගත කිරීම්වල 7 වැනි ස්ථානයේ පසුවන ලී සී ජියා සමඟ ලබන 28 වැනිදා සිය පළමු තරගයට ක්‍රීඩා කිරීමට නියමිතය.
‘ජී‘ කාණ්ඩයෙන් තරග බිමට පිවිසෙන විරේන් එදින පැරිස් වේලාවෙන් පෙරවරු 10.10 ට (ශ්‍රී ලංකා වේලාවෙන් පස්වරු 1.40ට) පැරිස් නුවර ලා චැපල් හි පිහිටි Porte de La Chapelle Arena හී දී එම තරගයට එක්වනු ඇත.
පැරිස් ඔලිම්පික් ක්‍රීඩා උලෙළට සෘජුවම සුදුසුකම් ලැබූ ලාබාලතම ක්‍රීඩකයා වන ලෝක බැඩ්මින්ටන් ඒකල ශ්‍රේණිගත කිරීම්වල 70 වැනි ස්ථානයේ පසුවන විරේන් නෙත්තසිංහට මෙම තරගය තීරණාත්මක තරගයකි.
ඔහුගේ දෙවැනි තරගය ලෝක බැඩ්මින්ටන් ඒකල ශ්‍රේණිගත කිරීම්වල 62 වැනි ස්ථානයේ පසුවන 39 හැවිරිදි ස්පාඤ්ඤයේ පැබ්ලෝ ඒබියන්ට එරෙහිව පැවැත්වෙන අතර, එම තරගය පැවැත්වෙන දිනය හා වේලාව මෙතෙක් නිවේදනය කර නොමැතිවුවද එම තරගය තවත් උණුසුම් තරගයක් වනු ඇත.
‘ජී‘ කාණ්ඩයේ තරග දෙකම ශ්‍රී ලංකාවේ යොවුන් බැඩ්මින්ටන් ක්‍රීඩක විරේන්ට තීරණාත්මක වන්නේ 16 දෙනාගේ වටයට සුදුසුකම් ලැබීමට නියමිතව ඇත්තේ එම කාණ්ඩයේ පෙරමුණ ගන්නා ක්‍රීඩකයා වන බැවිනි. ඒ අනුව එම තරග දෙකේදී විරේන් දක්වන දස්කම් තරගාවලියේ ඔහුගේ ඉදිරි තරග සඳහා අතිශය තීරණාත්මක වනු ඇත. ඔලිම්පික් ක්‍රීඩා උලෙළේදී ඔහු ඉතිහාසගත වීම දැක බලා ගැනීමේ බලාපොරොත්තුවෙන් ශ්‍රී ලංකාවේ සිටින ඔහුගේ ක්‍රීඩාලෝලීන් සහ රසිකයන් එම තරග නැරැඹීමට දැඩි නොඉවසිල්ලෙන් යුතුව පසුවෙති.
සියලු දෙනාගේ දෑස් මෙවර ඔලිම්පික් ක්‍රීඩා උලෙළේ ජූලි 26 වැනිදා River Seine හීදී පැවැත්වෙන සමාරම්භක උත්සවයේදී ශ්‍රී ලංකාවේ ජාතික ධජය රැගෙන යන විරේන් වෙත යොමු වී තිබේ. ඊළඟ වටයට සුදුසුකම් ලැබුවද නොලැබුවද 2024 පැරිස් ඔලිම්පික් ක්‍රීඩා උලෙළට විරේන්ගේ සහභාගිත්වය දැනටමත් අමතක නොවන ජයග්‍රහණයක් වන අතර, එය ශ්‍රී ලංකාවේ අභිමානයට හේතු වී තිබේ.
