ලංකා ව්‍යාපාරික පුවත් - LBN
මේ මස අගභාගයේ ප්‍රංශයේ ආරම්භ වන පැරිස් 2024 ඔලිම්පික් උලෙළේ සමාරම්භක උත්සවයේදී ශ්‍රී ලංකා ධජය රැගෙන යෑමේ අවස්ථාව මෙරට බැඩ්මින්ටන් පිටියේ යොවුන් තරුව විරේන් නෙත්තසිංහට ලැබී තිබේ.
ඔලිම්පික් ක්‍රීඩා උලෙළ නියෝජනය කරන ලාබාලතම බැඩ්මින්ටන් ක්‍රීඩකයා ලෙස ශ්‍රී ලංකා ක්‍රීඩා ඉතිහාසයේ සිය නම සටහන් කිරීමට 21 හැවිරිදි නෙත්තසිංහට මේ සුවිශේෂී ගෞරවය ලැබීම ඔහුගේ කැපවීම පිළිබඳ කදිම නිදසුනකි.
ඔලිම්පික් ක්‍රීඩා උලෙළ නියෝජනය කිරීමේ අවස්ථාව ලබා ගැනීම සහතික කිරීම සඳහා ශ්‍රී ලංකා බැඩ්මින්ටන් ආයතනය (SLB) විරේන්ට උපරිම පුහුණුව ලබා දීමට අවශ්‍ය සියලු කටයුතු සම්පාදනය කළේය. ඔහුගේ සහභාගිත්වය සහ එහි වැදගත්කම හඳුනා ගනිමින් ශ්‍රී ලංකා බැඩ්මින්ටන් ආයතනය විසින් විරේන්ගේ අවශ්‍යතාවට ගැළපෙන විශේෂ පුහුණු වැඩසටහන් අධීක්ෂණය කිරීම සඳහා විදේශීය පුහුණුකරුවකු සම්බන්ධ කරගන්නා බව නිවේදනය කළේය. මෙම වැඩසටහන් සැලසුම් කර ඇත්තේ ඔහුගේ කුසලතා සහ තරගකාරිත්වය වර්ධනය කරමින් පැරිස් ඔලිම්පික් ක්‍රීඩා උලෙළට යෑමේදී ඔහුගේ උපරිම කාර්ය සාධනය සහතික කිරීම සඳහා ය.
විරේන් නෙත්තසිංහට අවශ්‍ය සහයෝගිතාව ලබාදීම සඳහා ආසියාතික කලාපයේ ඉහළම මට්ටමේ ක්‍රීඩකයන් සමඟ පුහුණුවීමේ පහසුකම් ද ශ්‍රී ලංකා බැඩ්මින්ටන් ආයතනය විසින් සලසනු ලැබීය. ඔහුගේ සහාය ක්‍රීඩකයා ලෙස ඉන්දියාවේ හිටපු අංක එකේ ඒකල බැඩ්මින්ටන් ක්‍රීඩකයා ගෙන්වීම ඒ අතුරින් කැපී පෙනේ. ඊට අමතරව ඉන්දුනීසියානු ක්‍රීඩකයන් සමඟ පුහුණු කිරීමෙන් එම සම්බන්ධතාව තවදුරටත් ශක්තිමත් කරමින් ඉහළම මට්ටමේ සූදානමක් ලබාදීමට හැකි වී තිබේ.
විරේන් නෙත්තසිංහට මෙවැනි සහයෝගයක් ලබාදීම පැරිස් ඔලිම්පික් ක්‍රීඩා උලෙළේදී ශ්‍රී ලංකාවේ අරමුණ හා බලාපොරොත්තුව සඳහා වන පැහැදිලි සංඥාවකි.
මෙවැනි පුළුල් පුහුණු වැඩසටහන්, විශේෂඥ පුහුණු කිරීම් සහ ජාත්‍යන්තර සහයෝගිතාවන් සමඟ සියලු ක්‍රියාමාර්ග ගනු ලැබුවේ ඔහුට ඉහළම මට්ටමෙන් තරග කිරීමට අවශ්‍ය පසුබිම සකස් කිරීමටය. එහි අවසන් ඉලක්කය වන්නේ ශ්‍රී ලංකාවට කීර්තියක් අත්කර දෙමින් ඔහු පදක්කම් වේදිකාවට ගොඩවීම දැක බලාගැනීම සඳහා ය.
ඔලිම්පික් ක්‍රීඩා උලෙළේ සමාරම්භක උත්සවයේදී ධජය රැගෙන යන්නා ලෙස විරේන් ශ්‍රී ලංකාව නියෝජනය කිරීම පමණක් නොව ජාතියේ අභිමානය සහ අභිලාෂයන් ජාත්‍යන්තර වේදිකාවේ සංකේතවත් කිරීමක් ද වේ. ශ්‍රී ලංකා බැඩ්මින්ටන් ආයතනයේ සහ මුළු මහත් ජාතියේම සහයෝගය තුළින් ශ්‍රී ලංකාවේ ධජය රැගෙන යන්නා ලෙස ඔහුගේ කාර්යභාරය කැපී පෙනෙන ගෞරවයක් වන අතර, එය මෙරට බැඩ්මින්ටන් ක්‍රීඩාවේ අනාගත පරපුර දිරිගැන්වීමක් ද වේ.
