ලංකා ව්‍යාපාරික පුවත් - LBN
තරගකරුවන්ට නිවසේ සිටම තරග වැදිය හැකි ශ්‍රී ලංකාවේ දැවැන්තම E-sports තරගාවලිය
SINGER Esports Premier League තරගාවලිය මෙවරත් පැවැත්වීමට සියලු කටයුතු සූදානම් බව ශ්‍රී ලංකාවේ ප්‍රමුඛතම E-sports සමාගම වන Gamer.LK නිවේදනය කර සිටී. මෙවර තරගාවලියට කණ්ඩායම් 12ක් සහභාගී වන අතර, ජයග්‍රාහකයින්ට රුපියල් මිලියනයක තෑගි පිරිනමන බවද Gamer.LK සමාගම පවසයි. මෙවර 2,000කට අධික ඊ-ක්‍රීඩකයින් කණ්ඩායම් 12ට බෙදී තරග වදිනු ඇත.
ශ්‍රී ලංකාවේ දැවැන්තම E-sports තරගාවලිය වන මෙය අගෝස්තු, සැප්තැම්බර් හා ඔක්තෝබර් යන මාසයන්හිදී පැවැත්වේ. මීට සහභාගී වන කණ්ඩායම් 9ක් ශ්‍රී ලංකාවේ පළාත් පදනම් කරගෙන නිර්මාණය කර ඇත. Eastern Gladiators, Kadurata Kings, Northern Rangers, Rajarata Giants, Sabaragamuwa Knights, Southern Sharks, Uva Bandits, Wayamba Raiders සහ Western Warriors යනු ඒ කණ්ඩායම් වේ.
Gamer.LK සංවිධානය කරන E-sports තරගාවලීන් හා විවිධ E-sports ක්‍රියාකාරකම් නිසා E-sports ක්ෂේත්‍රය ශ්‍රී ලංකාව තුල පසුගිය දශකයක් වැනි කාලසීමාව තුල ශීඝ්‍ර ව්‍යාප්තියක් පෙන්වමින් තිබෙන අතර, මෙරට තුල E-sports ක්‍රීඩාවේ නිරතවන්නන් මිලියන 4ක් පමණ සිටින බව දැනට ඇස්තමේන්තුගතවී ඇත. 2019 වර්ෂයේදී මෙරට ක්‍රීඩා අමාත්‍යාංශය විසින් E-sports මෙරට 70 වැනි ජාතික ක්‍රීඩාව වශයෙන්ද පිළිගන්නා ලදී.
Gamer.LK විසින් සංවිධානය කරන SINGER Esports Premier League තරගාවලිය සම්පූර්ණයෙන්ම Online තරගාවලියක් වශයෙන් පවත්වන අතර, ක්‍රීඩකයින්ට සිය සෞඛ්‍යාරක්ෂාව සහතික කරගනිමින් සිය නිවෙස්වල සිට තරගයන්ට සහභාගී විය හැකිය. E-sports යනු සම්පූර්ණයෙන්ම ඩිජිටල් ක්‍රියාකාරකමක් වන අතර, සමාජ දුරස්ථභාවය පවත්වා ගැනීම ඇතුළු ජනතාවගේ සෞඛ්‍යාරක්ෂාව අතින් බලන විට මේ කාලයට ඉතාමත් සුදුසු ක්‍රීඩා අත්දැකීමකි. මෙම තරගාවලිය අදියර හතරකට වෙන්කර පවත්වන අතර, ඒවා නම් ; 1) විවෘත සුදුසුකම්ලාභීන්, මෙරට ඕනෑම තරගකරුවෙකුට epl.lk ඔස්සේ ලියාපදිංචිය ලබාගනිමින් තරග වැදීමට හැකියාව තිබේ. විවෘත සුදුසුකම්ලාභීන් ලෙස ශ්‍රී ලංකාවේ හොඳම PUBG Mobile ක්‍රීඩකයින් 60 දෙනෙකු තෝරා ගනු ලබන අතර, ඔවුන් ක්‍රීඩක වෙන්දේසිය සඳහා යොමු කෙරේ. 2) ක්‍රීඩක වෙන්දේසිය; මෙහිදී සිදුවන්නේ එක් එක් කණ්ඩායම් කළමනාකරුවන් විසින් සුදුසුකම් සහිත ක්‍රීඩකයින් වෙනුවෙන් ලංසු තබමින් තම කණ්ඩායමට බඳවා ගැනීමේ ක්‍රියාවලියයි. එක් කණ්ඩායමකට ක්‍රීඩකයින් 4 දෙනෙකු හා එක් අතිරේක ක්‍රීඩකයෙකු බැගින් බඳවා ගනු ලබයි. 3) PLAY-OFFS ; මෙහිදී super-weekend හා අවසන් මහා තරග සඳහා ස්ථානයක් හිමිකරගැනීම වෙනුවෙන් කණ්ඩායම් 12ක් තරග බිමේ සටනට පිවිසෙති. 4) SUPER WEEKEND & GRAND FINALS – මෙහිදී හොඳම කණ්ඩායම් 9 රුපියල් මිලියනයක තෑගි හා ජයග්‍රහණයේ කීර්තිය වෙනුවෙන් තරග වදිනු ඇත
“අප හඳුන්වා දුන් තරග ආකෘතිය නිසා ඕනෑම සුදුසුකම්ලාභියෙකුට තරග වැදීමේ අවස්ථාව උදාවන අතර, කණ්ඩායම් දොළහින් එකකට බැඳීමටත් හැකියාව ලබා දෙනවා. ශ්‍රී ලංකාවේ දක්ෂතම E-sports තරගකරුවන් සමග තරගවැදීමට මෙන්ම රුපියල් මිලියනයක තෑගි දිනාගැනීමටත් ක්‍රීඩකයින්ට හැකියාව තිබෙන අතර, ඕනෑම නැගී එන E-sports තරගකරුවෙකුට සිය හැකියාවන්ගේ උපරිමය පෙන්වමින් ඒ වෙනුවෙන් හිමිවන ඇගයීම් ලබාගැනීමටත් අපි පැහැදිලි මාවතක් නිර්මාණය කර තිබෙනවා” යනුවෙන් අදහස් දක්වා සිටියේ Gamer.LK ප්‍රධාන විධායක නිලධාරී හා ශ්‍රී ලංකා E-sports සංගමයේ සභාපති – රවීන් විජයතිලක මහතාය.
Esports Premier League තරගාවලියේ ප්‍රධාන අනුග්‍රාහකයා SINGER සමාගමයි. මෙරට E-sports ලෝලීන්ගේ හා ක්‍රීඩකයින්ගේ ජීවන විලාසිතාව ක්‍රීඩාශීලී ජවයෙන් පවත්වා ගෙන යාමට හා වර්ධනය කිරීමට අවශ්‍ය විශිෂ්ට දායකත්වයක් මෙම තරගාවලියේ ප්‍රධාන අනුග්‍රාහකත්වය භාරගනිමින් SINGER සමාගම ලබා දී තිබේ.
Moose Clothing තරගාවලියේ නිල නිමි ඇඳුම් සහකරු වන අතර, Sprite මෙවර තරගාවලියේ ප්‍රබෝධජනක සහකරු (Refreshing partner) වශයෙන් කටයුතු කරයි. තරගාවලිය පැවැත්වෙන කාලයේදී පවත්වන සමාජ මාධ්‍ය ප්‍රවර්ධනයන් හරහා තෝරාගන්නා ජයග්‍රාහකයින් දෙදෙනෙකු වෙත අති නවීන ස්මාර්ට් ජංගම දුරකථන දෙකක් තෑගි ලබා දීමටද Sprite කටයුතු කරයි. තරගාවලිය සඳහා ක්‍රීඩකයින් සිය ජංගම දුරකථන මාර්ගයෙන් තරග වදින අතර මෙවර තරගාවලියේ නිල ස්මාර්ට් ජංගම දුරකථන සහකරු ලෙස Samsung කටයුතු කරයි. තරගාවලියේ නිල ආහාර සහකරුවන් වශයෙන් Pizza Hut හා Taco Bell කටයුතු කරයි. G5, G7 හා G15 gaming ලැප්ටොප් අලෙවි කරන Dell Gaming තරගාවලියේ Gaming ලැප්ටොප් සහකරු වශයෙන් කටයුතු කරයි. තරගාවලිය අතර තුර Dell G15 gaming ලැප්ටොප් පරිගණක ලබාදීමටද ඔවුහු කටයුතු කරති. තරගාවලියේ ඩිජිටල් සහකරු ලෙස කටයුතු කරන්නේ Daraz සමාගමයි.
විවෘත සුදුසුකම්ලාභීන් වීමට කැමති තරගකරුවන්ට epl.lk වෙතින් ලියාපදිංචිය ලබාගත හැකි අතර, එළඹෙන අගෝස්තු 21 ලියාපදිංචි කිරීම් නිමාවට පත්වේ. සුදුසුකම්ලාභීන්ගේ තරග අගෝස්තු 28 වැනි දින ආරම්භ වීමට නියමිතය.
