අමානා බැංකුවේ අධ්‍යක්ෂවරයෙකු ලෙස අස්රීන් සහීර් මහතා පත්කෙරේ

අමානා බැංකුවේ විධායක නොවන ස්වාධීන අධ්‍යක්ෂවරයෙකු ලෙස අස්රීන් සහීර් මහතා පත්කර ඇති බව එම බැංකුව පසුගියදා නිවේදනය කළේ ය. මෙම පත්වීම 2024 ජූලි 20 දින සිට වලංගු වේ. අස්රීන් සහීර් මහතා යනු මූල්‍ය සේවා ක්ෂේත්‍රයේ වසර 30 කට අධික පළපුරුද්දක් හිමි ප්‍රවීණ වෘත්තිකයෙකි.

ශ්‍රී ලංකාවේ KPMG සමාගමෙන් සිය වෘත්තීය ජීවිතය ආරම්භ කළ අස්රීන් සහීර් මහතා ඉන් අනතුරුව බහරේන් හි Ernst & Young සමාගමේ සේවයට එක් වූ අතර, පසුව ආයෝජන කළමනාකරුවෙකු ලෙස Kuwait Finance House සමග එක් විය. Kuwait Finance House හිදී ජාත්‍යන්තර බැංකුකරණ අංශයේ ‘Banking Performance Monitoring’ ඒකකයේ සහ ‘Credit Due Diligence’ ඒකකයේ ප්‍රධානියා ලෙස උසස්වීම් ලබමින්, බැංකුකරණය ආශ්‍රිත අනුබද්ධ ආයතනවල කාර්යසාධන අධීක්ෂණ කටයුතු වල නිරත විය. මූල්‍ය ක්ෂේත්‍රයට සම්බන්ධ ප්‍රවීණයෙකු වීම නිසා Kuwait Finance House Malaysia Berhad හි විධායක නොවන ස්වාධීන නොවන අධ්‍යක්ෂවරයෙකු ලෙස පත්වීම් ලැබූ අස්රීන් සහීර් මහතා, 2011 සිට 2017 දක්වා සහ 2017 සිට වර්තමානය දක්වා වශයෙන් වාර දෙකකදී එම තනතුර දැරී ය. ඒ අතරින් ප්‍රථම කාලපරිච්ඡේදයේදී අධ්‍යක්ෂ මණ්ඩල පරිවර්තන මෙහෙයුම් කමිටුවේ සභාපති ලෙස කටයුතු කළ ඒ මහතා, බැංකු සේවා ප්‍රතිව්‍යුහගත කිරීම සඳහා සහ නව ණය ප්‍රාරක්ෂණ මාර්ගෝපදේශ හඳුන්වා දීම සඳහා ජාත්‍යන්තර උපදේශකවරුන් සමග එක්ව කටයුතු කළේ ය. මේ වනවිට ඒ මහතා අධ්‍යක්ෂ මණ්ඩල විගණන කමිටුවේ සහ නාමයෝජනා හා වේතන කමිටුවේ සභාපති ලෙස කටයුතු කරයි.

එමෙන්ම අස්රීන් සහීර් මහතා Frontier Advisory Ltd. හි ප්‍රධාන විධායක නිලධාරී ලෙසද කටයුතු කරයි. Frontier Advisory Ltd. යනු ගිණුම්කරණය, බදු සහ ව්‍යාපාරකරණය සම්බන්ධයෙන් උපදෙස් හා මගපෙන්වීම් ලබාදෙන සමාගමකි.

ශ්‍රී ලංකා වරලත් ගණකාධිකාරී සංගමයේ (CA Sri Lanka) සාමාජිකයෙකු වන අස්රීන් සහීර් මහතා, ශ්‍රී ලංකා සහතිකලත් කළමනාකරණ ගණකාධිකාරී සංගමයේ ((ICMA) සාමාජිකත්වයද දරයි. එමෙන්ම එක්සත් රාජධානියේ කළමනාකරණ ගණකාධිකාරී වරලත් ආයතනයේ සහකාර සාමාජිකයෙකු වන ඒ මහතා, සහතිකලත් අවදානම් විශ්ලේෂකයෙකුද (CRA) වේ.

මෙම නව පත්කිරීම සම්බන්ධයෙන් අමානා බැංකුවේ සභාපති අස්ගි අක්බරලි මහතා මෙසේ අදහස් දැක්වී ය. “අස්රීන් සහීර් මහතා අපගේ අධ්‍යක්ෂ මණ්ඩලයට අප සාදරයෙන් පිළිගන්නවා. පොලිය පදනම් කර නොගත් සුප්‍රකට ජාත්‍යන්තර මූල්‍ය ආයතනයක අධ්‍යක්ෂවරයෙකු ලෙස සේවය කරමින් අත්දැකීම් සම්භාරයක් ලබා ඇති ඒ මහතා, මූල්‍ය ක්ෂේත්‍රය සම්බන්ධයෙන් පුළුල් දැනුමක් හා පළපුරුද්දක් ඇති වෘත්තියෙක් ලෙස හැඳින්වීමට පුළුවන්. ඔහුගේ අදහස්, යෝජනා සහ උපදෙස් අපගේ අධ්‍යක්ෂ මණ්ඩලයට අතිශයින් වැදගත් වනු ඇති බවට කිසිදු සැකයක් නැහැ.”

නව පත්වීමත් සමග අමානා බැංකුවේ අධ්‍යක්ෂ මණ්ඩලයේ සංයුතිය මෙපරිදි වේ:

අස්ගි අක්බරලි (සභාපති), මොහොමඩ් අස්මීර් (කළමනාකාර අධ්‍යක්ෂ/ප්‍රධාන විධායක නිලධාරී), ටිශාන් සුබසිංහ (විධායක නොවන ජ්‍යෙෂ්ඨ ස්වාධීන අධ්‍යක්ෂ), මොහොමඩ් අතාවුර් රහ්මාන් චෞද්රි (විධායක නොවන ස්වාධීන නොවන අධ්‍යක්ෂ), ඩිල්ශාන් හෙට්ටිආරච්චි (විධායක නොවන ස්වාධීන නොවන අධ්‍යක්ෂ), සයිඩ් මුහම්මද් අසීම් රාසා (විධායක නොවන ස්වාධීන නොවන අධ්‍යක්ෂ), මොහොමඩ් හසන් (විධායක නොවන ස්වාධීන නොවන අධ්‍යක්ෂ), මොහොමඩ් ඇඩමලි (විධායක නොවන ස්වාධීන නොවන අධ්‍යක්ෂ), කයිරුල් මුසම්මිල් පෙරේරා බින් අබ්දුල්ලා (විධායක නොවන ස්වාධීන අධ්‍යක්ෂ), සහ ඩෙල්වින් පෙරෙයිරා (විධායක නොවන ස්වාධීන අධ්‍යක්ෂ) සහ අස්රීන් සහීර් (විධායක නොවන ස්වාධීන අධ්‍යක්ෂ).

අමානා බෑන්ක් පීඑල්සී යනු ශ්‍රී ලංකා මහ බැංකුවේ බලපත්‍රලාභී, කොළඹ කොටස් හුවමාරුවේ ලියාපදිංචි සමාගමකි. එහි ප්‍රධාන කොටස්කරු වන IsDB සමූහය යනු ‘AAA’ ශ්‍රේණිය හිමි, රටවල් 57 ක සාමාජිකත්වයන් සහිත බහුපාර්ශ්වීය සංවර්ධන මූල්‍ය ආයතනයකි. පොලී රහිත බැංකුකරණ ක්ෂේත්‍රයේ ප්‍රමුඛ පෙළේ ආයතනයක් ලෙස සිය ස්ථාවරය සනාථ කරමින් අමානා බැංකුව ආසියානු බැංකුකරුවන්ගේ ආයතනය වෙතින් ලොව ප්‍රබලතම ඉස්ලාමීය බැංකු 50 අතරින් එකක් ලෙස අඛණ්ඩව පිළිගැනීමට ලක් වී ඇත.

අමානා බැංකුව සතුව වෙනත් උප සමාගම්, හවුල්කාර සමාගම් හෝ අනුබද්ධ සමාගම් නොමැති අතර, එය OrphanCare භාරයේ ආරම්භක අනුග්‍රාහකයා ලෙස කටයුතු කරයි.