ලංකා ව්‍යාපාරික පුවත් - LBN
PUBG MOBILE සඳහාවන ශ්‍රී ලංකාවේ ජාතික Esports කණ්ඩායම 2023 සැප්තැම්බර් මස 23 වන දින සිට ඔක්තෝබර් මස 8 වන දින දක්වා චීනයේ හන්ග්ස්හොවූ (Hangzhou) හිදී පැවැත්වීමට නියමිත 19 වැනි ආසියානු ක්‍රීඩා උළෙලට සහභාගී වීමට නියමිතය. ඩයලොග් ආසිආටා (Dialog Axiata) ශ්‍රී ලංකාවේ ජාතික Esports කණ්ඩායමේ සාඩම්බර අනුග්‍රාහකයා වන අතර Gamer.LK යනු ශ්‍රී ලංකා Esports හි උපායමාර්ගික හවුල්කරු වේ.
ප්‍රථම වතාවට එළැඹෙන ආසියානු ක්‍රීඩා උළෙල තුල නිල පදක්කම් ඉසව්වක් ලෙස Esports හඳුන්වා දී ඇති අතර එය ක්‍රීඩාවේ සැලකිය යුතු වෙනසක් සනිටුහන් කරයි. මෙමගින් රටවල් තුල Esports ශූරතා සඳහා තරඟ කිරීමට ක්‍රීඩක ක්‍රීඩිකාවන් එක්රැස් කිරීමට දොරටු විවර කරයි, මෙම කණ්ඩායම්වල කාර්යසාධනය එක් එක් රටෙහි සමස්ත පදක්කම් සටහනට දායක වේ.
චමුදිත ‘Luciferr’ වත්ෂාන්, රිස්නි ’Razor’ අස්මි, රමේෂ් ‘JIMMY’ කවිඳු, රිහම් ‘Tauter’ රම්සි සහ තරිඳු ‘Mamatha’ ඉඳුවර යන Esports ක්‍රීඩකයන් සමගින්, ශ්‍රී ලංකා ජාතික PUBG MOBILE කණ්ඩායම මෙම ගෝලීය වෙනස තුල ප්‍රමුඛස්ථානයේ සිටිමින් 2022 ආසියානු තරගාවලිය සඳහා සිය මාවත විවෘත කරගන්නා ලදී.
ශ්‍රී ලංකාවේ Esports තුල දැවැන්ත සන්ධිස්ථානයක් සනිටුහන් කරමින් 2010 වසරේදී මෙරට Esports සඳහා පාලක මණ්ඩලයක් ලෙස සේවය කිරීම සඳහා ශ්‍රී ලංකා Esports සංගමය පිහිටුවන ලදී. 2019 වසරේදී Esports නිල ක්‍රීඩාවක් ලෙස පිළිගැනීමට ලක්කල, ශ්‍රී ලංකාවේ යෞවන හා ක්‍රීඩා අමාත්‍යාංශය මගින් සංගමයේ මෙම ප්‍රයත්නයන් ඇගයීමට ලක්ව ඇති අතර, එමඟින් Esports රට තුළ වෘත්තීය මට්ටමක් දක්වා ගෙන යාම සඳහාවන සංගමයේ ප්‍රධාන කාර්යභාරය තහවුරු කරයි.
ආසියානු ක්‍රීඩා උළෙලට සහභාගී වන කණ්ඩායමේ, කණ්ඩායම් කළමනාකරු ලෙස කටයුතුකරන ශ්‍රී ලංකා Esports හි සභාපති රවීන් විජයතිලක මහතා මෙසේ පැවසීය, “Esports ශ්‍රී ලංකාවේ වේගයෙන්ම වර්ධනයවන ක්‍රීඩාවක්වන අතර, ශ්‍රී ලංකාවේ Esports ක්‍රීඩක ක්‍රීඩිකාවන්ට තම රට නියෝජනය කිරීමට සහ මෙවර ආසියානු ක්‍රීඩා උළෙලේදී පදක්කම් සඳහා තරඟ කිරීමට අවස්ථාව ලැබීම ගැන මම සතුටු වෙනවා. Esports යනු තරුණ ක්‍රීඩාවක්වන අතර, Esports මගින් මෙම ඩිජිටල් ක්‍රීඩකයන්ගේ මීළඟ පරම්පරාව තුළ ඔලිම්පික් වටිනාකම් ඇති කිරීමට අපි බලාපොරොත්තුවෙන් සිටිනවා. අපගේ Esports ප්‍රජාවේ සහයෝගය ඇතිව, අපගේ කණ්ඩායම ජයග්‍රහණය කිරීමට පමණක් නොව, රටේ මීළඟ පරම්පරාවේ Esports ක්‍රීඩක ක්‍රීඩිකාවන් දිරිමත් කිරීම වෙනුවෙන්ද අපි සුබ පතනවා.”
මෑත වසර කිහිපය තුළ ශ්‍රී ලංකාවේ Esports තුල දක්නට ලැබූ වර්ධනය සුවිශේෂී Esports දක්ෂතා මතුවීමට අවස්ථාව සපයා ඇත. මෙම ක්‍රීඩක ක්‍රීඩිකාවන් ජාත්‍යන්තර Esports සම්මේලනයේ (IESF) ලෝක ශූරතා සහ ගෝලීය Esports ක්‍රීඩා උළෙලට (GEG) සහභාගී වීමෙන් කීර්තිමත් ජාත්‍යන්තර වේදිකා මතද ශ්‍රී ලාංකික ප්‍රවණතා සාඩම්බරයෙන් ඉදිරිපත්කර ඇත.
ශ්‍රී ලංකාවේ ප්‍රමුඛතම සන්නිවේදන සම්පාදකයාවන ඩයලොග් ආසිආටා පීඑල්සී, දශකයකට වැඩි කාලයක් ශ්‍රී ලංකාවේ Esports බලගන්වමින් Esports නඟා සිටුවීමේ මූලිකත්වය ගෙන කටයුතු කරයි. මෑත කාලීනව, SLESA සමඟ ඩයලොග් විසින් ඇතිකර ගත් උපායමාර්ගික හවුල්කාරිත්වය තුලින් උද්යෝගිමත් දේශීය ක්‍රීඩකයින් සඳහා අත්‍යවශ්‍ය කුසලතා පුහුණු කිරීම සහ සංවර්ධනය කිරීම සවිබල ගන්වා ඇති අතර දිවයිනේ සෑම ප්‍රදේශයකම Esports ව්‍යුහගත කිරීමට සහය දක්වා ඇත. ශ්‍රී ලංකාවේ පුළුල්ම 4G ආවරණය සහ නිරන්තර ජාල ප්‍රශස්තිකරණයන් සමඟින්, ඩයලොග් විසින් ශ්‍රී ලංකාවේ ග්‍රාමීය Esports දිරිගැන්වීමට ඩිජිටල් පරස්පරතාව අවම කිරීම සඳහාවන සිය කැපවීම ඉටු කරයි.
ශ්‍රී ලංකාවේ ප්‍රමුඛතම Esports සමාගම වන Gamer.LK, ජාතික Esports කණ්ඩායමේ උපායමාර්ගික හවුල්කරු වේ. ශ්‍රී ලංකාවේ Esports ක්ෂේත්‍රයේ ඉදිරියෙන්ම සිටින, Gamer.LK විසින් Esports තරඟාවලි සහ ක්‍රියාකාරකම් සංවිධානය කිරීම සඳහා දැක්වූ අඛණ්ඩ උත්සාහය පසුගිය දශකය තුළ ශ්‍රී ලංකා Esports හි ශීඝ්‍ර වර්ධනයට හේතු වී ඇත.
ආසියානු ක්‍රීඩා උළෙල සහ මෙම සුවිශේෂී සන්ධිස්ථානය සමඟින්, SLESA හි අවධානය යොමු වී ඇත්තේ Esports දක්ෂතා පෝෂණය කිරීම සහ ගෝලීය වේදිකාවේ ශ්‍රී ලංකාව නියෝජනය කිරීම කෙරෙහිය. මෙය වනාහි ශ්‍රී ලංකාවේ Esports ක්‍රීඩාව අඛණ්ඩ වර්ධනයක් වෙත රැගෙන යන, ජාත්‍යන්තර තලයේ විශාල පිළිගැනීමක් ලබා ගන්නා බලාපොරොත්තු සහගත ගමනක ආරම්භය පමණක් බව සංගමය විශ්වාස කරයි.
