ලංකා ව්‍යාපාරික පුවත් - LBN
Lanka Rating Agency (LRA) මගින් සිදුකරන ලද ශ්‍රේණිගතකිරීම් අතරින් අමානා බැංකුවට ආයෝජන තලයේ ශ්‍රේණියක් වන ‘BBB+ with a Stable Outlook’ ශ්‍රේණිය හිමි විය. LRA යනු ශ්‍රී ලංකා මහ බැංකුවේ අනුමැතිය හිමි ස්වාධීන ණය ශ්‍රේණිගතකරණ ආයතනයකි. මේ සම්බන්ධයෙන් LRA මගින් නිකුත් කරන ලද නිවේදනයට අනුව, මෙම ශ්‍රේණිගත කිරීම මගින් මෙම කාණ්ඩයේ අනෙකුත් බැංකුවලට සාපේක්ෂව අමානා බැංකුවේ ශක්තිමත් වත්කම් ගුණාත්මකභාවය, වැඩිදියුණු වූ ප්‍රාග්ධනීකරණය සහ අතීතයේ පටන් මේ දක්වා අත්කරගත් අඛණ්ඩ වර්ධනය හා කාර්යසාධනය පිළිබිඹු වේ.
2024 වසරේ 3 වන කාර්තුව වන විට අමානා බැංකුවේ අදියර 3 අපහායන අනුපාතය 1.4% ක් ලෙස වාර්තා වී තිබිණි. ක්ෂේත්‍රයේ අවම අගයක් වන මෙය, අමානා බැංකුව ණය අවදානම් කළමනාකරණය ඉතාමත් සාර්ථක ලෙස සිදුකිරීමට සමත් වී ඇති බවට සාක්ෂි දරයි. එමෙන්ම ක්ෂේත්‍රයේ ජංගම ගිණුම් හා ඉතුරුම් ගිණුම් අතර අනුපාතය සම්බන්ධයෙන් ඉහල අගයක් සනිටුහන් කරමින් 42.3% ක CASA අනුපාතයක් වාර්තා කිරීමටද අමානා බැංකුව සමත් වී තිබේ.
“මෙම ජයග්‍රහණය අප වෙත හිමි වුණේ, රටේ විශ්වාසය දිනූ ශක්තිමත් මූල්‍ය ආයතනයක් ලෙස අප සතු ස්ථානය තවදුරටත් තහවුරු කරගනිමින් සිටින අවස්ථාවකයි. මෙය අපගේ මූල්‍ය ශක්තිය හා තිරසාර වර්ධනය පිළිබිඹු කරන අතරම, අපගේ සේවාවන් හා ආවරණ පරාසය තවදුරත් පුළුල් කරගැනීමට සඳහා අපට අගනා අවස්ථාවක් උදා කර දී තිබෙනවා. මෙමගින් අපගේ පාර්ශ්වකරුවන් සියලුම දෙනාට පෙරටත් වඩා වැඩි වටිනාකම් තිළිණ කිරීමට අපට හැකි වේවි.” අමානා බැංකුවේ සභාපති අස්ගි අක්බරලි මහතා පැවසී ය.
“LRA ආයතනය වෙතිනුත් මේ ආකාරයට ආයෝජන මට්ටමේ ශ්‍රේණිගත කිරීමක් හිමි වීමට අපට මහත් ගෞරවයක්. මෙමගින් අමානා බැංකුවේ ශක්තිය සහ අභියෝගවලට ඔරොත්තු දීමේ හැකියාව මැනැවින් පිළිබිඹු වනවා. ප්‍රධාන කාර්යසාධන දර්ශක තුළ ශක්තිමත් ක්‍රියාකාරීත්වයක් පෙන්නුම් කිරීමට මෙන්ම ක්ෂේත්‍රය තුළ නව ආදර්ශයන් සනිටුහන් කිරීමට අප සමත් වී ඇති බවට මෙය මනා සාක්ෂියක්. එමෙන්ම මෙම ශ්‍රේණිගත කිරීම් මගින් ක්ෂේත්‍රය තුළ අපට හිමි වී ඇති ස්ථානය තවදුරටත් තහවුරු වන අතරම, අනාගත දියුණුව සඳහා අවස්ථා රාශියකුත් උදා වේවි.” අමානා බැංකුවේ කළමනාකාර අධ්‍යක්ෂ/ප්‍රධාන විධායක නිලධාරී මොහොමඩ් අස්මීර් මහතා පැවසී ය.
අමානා බෑන්ක් පීඑල්සී යනු ශ්‍රී ලංකා මහ බැංකුවේ බලපත්‍රලාභී, කොළඹ කොටස් හුවමාරුවේ ලියාපදිංචි සමාගමකි. එහි ප්‍රධාන කොටස්කරු වන IsDB සමූහය යනු ‘AAA’ ශ්‍රේණිය හිමි, රටවල් 57 ක සාමාජිකත්වයන් සහිත බහුපාර්ශ්වීය සංවර්ධන මූල්‍ය ආයතනයකි. පොලී රහිත බැංකුකරණ ක්ෂේත්‍රයේ ප්‍රමුඛ පෙළේ ආයතනයක් ලෙස සිය ස්ථාවරය සනාථ කරමින් අමානා බැංකුව ආසියානු බැංකුකරුවන්ගේ ආයතනය වෙතින් ලොව ප්‍රබලතම ඉස්ලාමීය බැංකු 50 අතරින් එකක් ලෙස අඛණ්ඩව පිළිගැනීමට ලක් වී ඇත.
අමානා බැංකුව සතුව වෙනත් උප සමාගම්, හවුල්කාර සමාගම් හෝ අනුබද්ධ සමාගම් නොමැති අතර, එය OrphanCare භාරයේ ආරම්භක අනුග්‍රාහකයා ලෙස කටයුතු කරයි.
