ලංකා ව්‍යාපාරික පුවත් - LBN
- පළමු අදියර යටතේ මෝටර් රථ ටයර් නිෂ්පාදන ධාරිතාවය 16% කින් ඉහළට, දෙවන අදියරේ නිෂ්පාදනය 2021 මැයි මාසයේ ආරම්භ වේ
දේශීය නිෂ්පාදනය ඉහළ නැංවීම මගින් විදේශ විනිමය පිරිමසා ගැනීමේ රජයේ උත්සාහය සඳහා සහයෝගය ලබාදීමට සියැට් කැළණි හෝල්ඩින්ග්ස් සමාගම සිය මෝටර් රථ ටයර් නිෂ්පාදන වාර්ෂික ධාරිතාවය 16% කින් ඉහළ නංවමින් සමාගමේ නිෂ්පාදනය පුළුල් කිරීමේ සැලසුම යටතේ වාර්ෂිකව නිෂ්පාදනය කරන මෝටර් රථ රේඩියල් (PCR/Van) ටයර් ප‍්‍රමාණය 72,000 කින් ඉහළ නංවා තිබේ.
මෝටර් රථ ටයර් නිෂ්පාදනය පුළුල් කිරීමේ සමාගමේ 2021 සැලසුමෙහි පළමු අදියර මේ ආකාරයෙන් ක‍්‍රියාත්මක කර තිබෙන අතර මේ සඳහා කැළණියේ පිහිටි සියැට් නිෂ්පාදන සංකීර්ණයේ අලූතෙන් ටයර් ප්‍රෙස් යන්ත‍්‍ර දෙකක් සවිකර තිබේ. මෙම නව ප්‍රෙස් යන්ත‍්‍ර දෙක ශ්රී ලංකාවේ සියැට් නිෂ්පාදන සංකීර්ණයේ සවිකර තිබෙන පළමු හයිඩ්‍රොලික් වර්ගයේ ප්‍රෙස් යන්ත‍්‍ර වන අතර මේ ආකාරයෙන් තාක්ෂණය ඉහළ නැංවීම නිසා සියැට් නිපදවන ටයර වල ගුණාත්මක තත්ත්වය තවත් ඉහළ නැංවීමට හැකිවනු ඇත.
මෙම පුළුල් කිරීම හේතුවෙන් සියැට් විසින් වාර්ෂිකව නිෂ්පාදනය කරන මෝටර් රථ සහ වෑන් ටයර් සංඛ්‍යාව 500,000 ක් ඉක්මවන අතර වඩාත් ප‍්‍රචලිත අඟල් 12 සිට අඟල් 14 ප‍්‍රමාණයේ ටයර් මෙම නව යන්ත‍්‍ර වලින් නිපදවනු ලැබේ. මෙම ටයර් Maruti 800, Suzuki Alto, Estilo, Wagon R, Omni, Swift සහ Liana, Mahindra Maximo, Nissan Sunny FB15, FB14, N16, March, Bluebird සහ AD Wagon, Toyota 110, 121, Vios, Soluna, Starlet සහ Carina, Honda Civic, Hyundai Accent, Perodua (VIVA Elite) සහ Cherry QQ රථ වලට ගැලපෙන බව සමාගම සඳහන් කරයි. මෙම ටයර් සඳහා දේශීයව ඉහළ ඉල්ලූමක් තිබෙන අතර විශේෂයෙන්ම රජය විසින් තාවකාලිකව ටයර් ආනයනය කිරීම සඳහා පනවා තිබෙන තහනම හේතුවෙන් ඉල්ලූම තවදුරටත් ඉහළ ගොස් තිබේ.
නිෂ්පාදන ධාරිතාවය පුළුල් කිරීමේ වැඩසටහනෙහි දෙවන අදියර ද ඉතාමත් ඉක්මනින් සිදුකරන බවත් ඒ යටතේ තවත් ටයර් ප්‍රෙස් යන්ත‍්‍ර දෙකක් සහ ටයර් ගොඩනැගීමේ යන්ත‍්‍රයක් සවිකරන බව සමාගම සඳහන් කරයි. මෙම පුළුල් කිරීම මගින් වසරකට නිපදවන රේඩියල් ටයර් සංඛ්‍යාව තවත් ටයර් 100,000 කින් වැඩි කිරීමට සැලසුම් කර තිබෙන බවද සමාගම අනාවරණය කරයි.
මෙම පුළුල් කිරීමේ කටයුතු පිළිබඳව සියැට් කැළණි සමාගමේ කළමනාකාර අධ්‍යක්ෂ, රවී ඩඞ්ලානි මහතා මෙසේ අදහස් දැක්වීය. ‘පසුගිය වසර පුරාම අපගේ දැක්ම වී තිබුණේ ආනයන අඩුකිරීම සඳහා ජාතික වශයෙන් ගෙනයන වැඩපිළිවෙලට සහයෝගය ලබාදීමට වෙළෙඳපොළ අවශ්‍යතාවය තිබෙන ටයර් වර්ග සහ ප‍්‍රමාණවල නිෂ්පාදන ධාරිතාවය වැඩි කිරීමටයි. මෙම අරමුණ වෙනුවෙන් ගෙන්වූ සමහර යන්ත‍්‍ර කි‍්‍රයාත්මක තත්ත්වයට ගෙන ඒම කොවිඞ්-19 වසංගතය නිසා පනවා තිබෙන සංචරන සීමාවන් නිසා ප‍්‍රමාද වුණා. නමුත්, රේඩියල් ටයර් අමතර නිෂ්පාදනය දැන් සිදුවන අතර එම නිෂ්පාදන වෙළෙඳපොළට එකතුවනවා.’
ටයර් ආනයන සීමාවන් නිසා ට‍්‍රක් රථ, බස්, ත‍්‍රි රෝද රථ, මෝටර් රථ වෑන් ටයර් සඳහා දේශීයව ඇති වෙමින් තිබෙන ඉහළ ඉල්ලූම සපුරාලීම සඳහා සියැට් කැළණී හෝල්ඩින්ග්ස් විසින් පසුගිය වසරේදී සමාගමේ සියළුම නිෂ්පාදන කම්හල්වල ධාරිතාවය පුළුල් කරන ලදී. ශ්රී ලංකාවේ ටයර් අවශ්‍යතාවයෙන් හරි අඩක් පමණ සපයන සියැට් සමාගම පසුගිය අගෝස්තු මාසයේදී පැවසුවේ මගී බස්රථ සහ භාණ්ඩ ප‍්‍රවාහන ක්ෂේත‍්‍රයේ දේශීය ටයර් අවශ්‍යතාවය 100% කින් සපුරාලීමට දේශීය නිෂ්පාදන ධාරිතාවය ඉහළ නංවන බවයි. මේ තුළින් වසරකට ශ්රී ලංකාවට රුපියල් බිලියන 11 ක විදේශ විනිමයක් ඉතිරකර ගත හැකියැයි ගණන් බලා තිබේ.
මීට අමතරව, 2020 ජුනි මාසයේ සිට සැප්තැම්බර් මාසය දක්වා මාස තුනක කාලය තුළදී යතුරු පැදි අංශයේ ටයර් නිෂ්පාදනය 85% කින් ඉහළ නැංවූ බව සමාගම විසින් නිවේදනය කර ඇත. 2020 ජුනි මාසයේ මෙම අංශයෙන් නිපදවූ ටයර් 27,000 ක ප‍්‍රමාණය ජූලි මාසය වනවිට ටයර් 41,000 ක් දක්වාත් සැප්තැම්බර් මාසය වනවිට ටයර් 50,000 ක් දක්වාත් වැඩිකරන ලදී. මේ තුළින් තවත් රුපියල් මිලියන 350 ක විදේශ විනිමයක් වසරකට රටට ඉතිරිවනු ඇතැයි ගණන් බලා ඇත.
මෙරට නිෂ්පාදන අංශය තුළ ඉතාමත් සාර්ථක ඉන්දියා – ශ්රී ලංකා ඒකාබද්ධ ව්‍යාපෘතියක් ලෙසින් සැලකෙන සියැට් කැළණි සමාගම 2018 ජනවාරි මාසයේදී නිෂ්පාදන ධාරිතාවය, තාක්ෂණය සහ නිෂ්පාදන සංවර්ධනය වැඩි දියුණු කිරීම වෙනුවෙන් කළ රුපියල් බිලියන 03 ක ආයෝජනයක් සමග මේ දක්වා ශ්රී ලංකාවේ සමස්තයක් ලෙස රුපියල් බිලියන 08 ක මුදලක් ආයෝජනය කර තිබේ. සමාගම විසින් මගී මෝටර් රථ, වෑන්, SUV වාහන, වාණිජ (බයස්-ප්ලයි සහ රේඩියල්) යතුරු පැදි, ත‍්‍රි රෝද රථ සහ කෘෂි කාර්මික වාහන සඳහා ටයර් මෙරට නිෂ්පාදනය කරයි.
