Suren Cooke Agencies, සාගරය පවිත්‍ර කිරීමේ වැඩසටහනක් දියත් කරමින් පිරිසිදු ශ්‍රී ලංකාවක් ගොඩනැගීමට පෙරමුණ ගනී

මෙරට පළිබෝධ කළමනාකරණ කර්මාන්තයේ පුරෝගාමී සමාගමක්වන Suren Cooke Agencies සමාගම, Sri Lanka Sub-Aqua  සංගමය (SLSAC) සහ Neptune’s Army of Rubbish Cleaners (NARC) සාමූහිකය සමග අත්වැල් බැඳ ගනිමින් ගල්කිස්ස අවට සාගරය පිරිසිදු කිරීමේ ව්‍යාපෘතියක් පසුගියදා දියත් කළේය. සම්ප්‍රදායික පාරිසරික වැඩසටහනකින් ඔබ්බට යමින්, මෙම වැඩසටහන හරහා මුල්‍යමය වශයෙන් අභියෝගයට ලක්ව සිටින ප්‍රජාවට රැකියා අවස්ථා උදාකර දීමට ද Suren Cooke Agencies සමාගම කටයුතු කරයි.

සමාගමේ දීර්ඝකාලීන හරිත අරමුණ වෙත ළඟා වීමේ තවත් පියවරක් ලෙස දියත් කෙරුණු මෙම වැඩසටහන සඳහා සහභාගී වූ කිමිඳුම්කරුවන් විසින් මුහුදු පතුලේ තැන්පත්ව ඇති කසළ එක්රැස් කරන ලදි. ඒ අනුව, විවිධ මුහුදුබත් වූ නැව් සුන්බුන් අතර රැඳී තිබූ මාළු දැල් කිලෝ ග්‍රෑම් 180 කට අධික ප්‍රමාණයක් එක්රැස් කිරීමට එම කිමිඳුම්කරුවෝ සමත් වූහ. මුහුදු පත්ලේ තැන්පත්ව ඇති මෙවැනි කසළ සහ අපද්‍රව්‍යවලින් සාගර ජීවිත මුදවා ගන්නා අතරම, නිෂ්පාදන ඇසුරුම්කරණ අමුද්‍රව්‍ය ලෙස ඒවා භාවිත කිරීමට ද සමාගම අපේක්ෂා කරයි.

තවද, මෙම වැඩසටහනේ තවත් පියවරක් ලෙස Suren Cooke Agencies සමාගම,  එම ප්‍රදේශයේ ධීවර ජනතාව මුහුදු වෙරළේ ඇති ප්ලාස්ටික් අපද්‍රව්‍ය එක්රැස් කිරීමට දිරිමත් කරමින්, එම ප්ලාස්ටික් අපද්‍රව්‍ය සාමාන්‍ය වෙළෙඳපොළ මිලට වඩා වැඩි මිලට මිලදී ගැනීමට ද කටයුතු කරයි. මෙවැනි ඵලදායී වැඩසටහනක් හරහා ප්‍රජාව වෙනුවෙන් ධනාත්මක බලපෑමක් සිදු කිරීම සමාගමේ අරමුණයි.

“දීර්ඝකාලීන බලපෑමක් ඇතිකිරීම සඳහා මෙම ව්‍යාපෘතිය දියත් කිරීමේදී සම්ප්‍රදායික චින්තනයෙන් බැහැර වෙමින් පුළුල් අරමුණකින් යුතුව එය සැලසුම් කළ යුතු බව හඳුනා ගත්තා. මුහුදු පත්ලේ තැන්පත්ව ඇති අපද්‍රව්‍ය එක්රැස් කිරීමට සම්බන්ධ වූ කිමිඳුම්කරුවන්ගේ  සිට අප සමග අත්වැල් බැඳගත් විදෙස් සංවිධාන දක්වා අපට හිමි වූ දායකත්වය පිළිබඳ සැලකීමේදී මෙවැනි ආකාරයේ ව්‍යාපෘති හරහා මෙරට මුහුදු තීරය ආරක්ෂාකර ගැනීමට  හැකිවනු ඇති බව අපගේ විශ්වාසයයි. හරිත ක්‍රමවේදවලට අනුකූලව මෙහෙයුම් කටයුතු සිදු කිරීමේ සහ එම ක්‍රමවේද හරහා ඉහල ම පාරිසරික ප්‍රතිලාභ හිමිකර දීමේ අපගේ අරමුණ සාක්ෂාත්කර ගැනීමට මෙවැනි ව්‍යාපෘති අපට වැදගත් වනවා,” යනුවෙන් Suren Cooke Agencies සමාගමේ අධ්‍යක්ෂ ශෙරාන් කුක් මහතා සඳහන් කළේය.

අනාගත පරපුර වෙනුවෙන් සුපිරිසිදු සහ සුරක්ෂිත ශ්‍රී ලංකාවක් දායාද කිරීම Suren Cooke Agencies සමාගමේ අරමුණයි. ප්ලාස්ටික් භාවිතය අවම කිරීමට දේශීය ව්‍යාපාරවලට සහයෝගය ලබාදීම ඉලක්කකර ගනිමින් ක්‍රියාත්මක කෙරෙන Earthly Warrior Awards සම්මාන උළෙල සහ Save Our Seas වැඩසටහන ද සමාගමේ දීර්ඝකාලීන පාරිසරික අරමුණ ළඟාකර ගැනීම සඳහා සමාගම විසින් දියත් කරනු ලබන ව්‍යාපෘති අතර ප්‍රධාන වේ.

හරිත ශ්‍රී ලංකාවක් ගොඩනැගීම සඳහා සමාගමට ලබාදිය හැකි දායකත්වය පිළිබඳ මහජනතාව සහ ප්‍රජාව දැනුවත් කිරීම සඳහා සමාගම සතු ඉලක්කය, එම සමාගම තිරසාරත්වය වෙනුවෙන් දක්වන කැපවීමට මනා සාක්ෂ්‍ය සපයයි. මෙවැනි වැඩසටහන් දියත් කිරීම මගින්, අනාගත පරපුර වෙනුවෙන් හරිතවත් ශ්‍රී ලංකාවක් දායාද කිරීම සඳහා Suren Cooke Agencies සමාගම අඛණ්ඩව කැපවෙයි.