ලංකා ව්‍යාපාරික පුවත් - LBN
2023 ජූනි 27, කොළඹ: ශ්‍රී ලංකාවේ පාසල් ක්‍රීඩක ක්‍රීඩිකාවන්ගේ දක්ෂතාවන් සවිබල ගන්වමින් දින තුනක් පුරා පැවති ‘Ritzbury Relay Carnival 2023’ තරගාවලිය පසුගිය ජූනි 26 දින සාර්ථක ලෙස අවසන් විය. අධ්‍යාපන අමාත්‍යාංශය සහ ශ්‍රී ලංකා පාසල් මලල ක්‍රීඩා සංගමය එක්ව සංවිධානය කළ මෙම තරගාවලිය කොළඹ සුගතදාස ක්‍රීඩාංගණයේදී පැවැත්වුණු අතර, ශ්‍රී ලංකාවේ ප්‍රමුඛතම චොක්ලට් සන්නාමය වන, රිට්ස්බරි, එහි එකම අනුග්‍රාහකයා ලෙස කටයුතු කළේ ය. මෙම තරගාවලියට දිවයිනේ පාසල් 220 කට අධික සංඛ්‍යාවක් නියෝජනය කරමින් ක්‍රීඩක ක්‍රීඩිකාවෝ 4,000 කට වැඩි පිරිසක් සහභාගී වූහ.
ලකුණු 95 ක් ලබාගනිමින් තරගාවලියේ බාලක සමස්ත ශූරතාව දිනාගැනීමට මීගමුව මාරිස්ස්ටෙලා විද්‍යාලය සමත් වූ අතර, එහි දෙවැනි හා තුන්වැනි ස්ථාන පිළිවෙළින් මහනුවර ත්‍රිත්ව විද්‍යාලය සහ කොළඹ ශාන්ත බෙනඩික්ට් විද්‍යාලය වෙත හිමි විය.
ලකුණු 113 ක් ලබාගනිමින් බාලිකා අංශයේ සමස්ත ශූරතාව දිනාගන්නා ලද්දේ වලල ඒ. රත්නායක මධ්‍ය මහා විද්‍යාලයයි. එහි දෙවැනි ස්ථානය ලයිසියම් ජාත්‍යන්තර පාසල වෙතත්, තුන්වැනි ස්ථානය අඹගමුව මධ්‍ය මහා විද්‍යාලය වෙතත් හිමි විය.
