ලංකා ව්‍යාපාරික පුවත් - LBN
සන්ෂයින් හෝල්ඩින්ග්ස් හි ඖෂධ නිෂ්පාදන අංශය වන Lina Manufacturing, 2024 ලෝක පෙනහළු දිනය සහ ශ්‍රී ලංකා පෙනහළු විශේෂඥයින්ගේ විද්‍යාලයේ පළමු නිර්මාතෘ දිනය සැමරීම සඳහා එම විද්‍යාලය සමඟින් පසුගියදා අත්වැල් බැඳගත්තේය- ශ්‍රී ලංකා පෙනහළු විශේෂඥයින්ගේ විද්‍යාලයේ මෙවර තේමාව වූ ‘ශ්වසන සෞඛ්‍යයේ වැදගත්කමඃ නිදහසේ හුස්ම ගැනීමේ අයිතිය උදෙසා’ යටතේ පසුගියදා කොළඹදී පැවති මෙම උත්සවයට එම විද්‍යාලයේ කවුන්සිල සාමාජිකයින්, හිටපු සභාපතිවරුන් සහ සාමාජිකයින් ඇතුළු වෛද්‍ය වෘත්තිකයන් 75කට අධික පිරිසක් සහභාගී විය.
මේ වසරේ ලෝක පෙනහළු දිනය සඳහා වන තේමාව වන “සැමට සුපිරිසිදු වාතය සහ නිරෝගිමත් පෙනහළු” යන්නෙන් නිරෝගිමත් පෙනහළු පවත්වා ගැනීම සඳහා පිරිසිදු වාතය කෙතරම් වැදගත් ද යන්න අවධාරණය කරන අතර Lina Manufacturing ඒ සඳහා උපකාරී වන නව්‍ය ශ්වසනය ආශ්‍රිත නිෂ්පාදන සංවර්ධනය කිරීමෙන් නිරන්තරයෙන් සහාය දක්වයි. ජාත්‍යන්තර ශ්වසන සමාජ සංසදය (FIRS) විසින් මෙහෙයවනු ලැබූ මෙවර වැඩසටහන මගින් සෑම වසරකම මිලියන 7 ක පමණ මරණ සඳහා හේතු වන සහ ඇදුම සහ නිදන්ගත බාධාකාරී පෙනහළු රෝග (COPD), පෙනහළු පිළිකා සහ ශ්වසන ආසාදන වැනි රෝග සඳහා හේතු වන වායු දූෂණයේ බලපෑම පිළිබඳව දැනුවත් කරන ලදී.
මෙම උත්සවය අමතමින් අදහස් දැක් වූ Lina Manufacturing හි ප්‍රධාන විධායක නිළධාරී ආචාර්ය ටී. සයාන්ධන් මහතා පැවසුවේ “මෙම වැදගත් අවස්ථාවට සහහභාගී වීම සහ නිරෝගිමත් ශ්වසන සෞඛ්‍යයක් පවත්වා ගැනීම ප්‍රවර්ධනය කිරීම සඳහා ශ්‍රී ලංකා පෙනහළු විශේෂඥයින්ගේ විද්‍යාලය සමඟ එක්ව කටයුතු කිරීමට ලැබීම අප ගෞරවයක් කොට සලකනවා. වායු දූෂණය නිසා මහජන සෞඛ්‍යයට ඇති කරනු ලබන සැලකිය යුතු බලපෑම්වලට විසඳුම් ලබා දීමටත් සියලු ශ්‍රී ලාංකිකයන්ට සුපිරිසිදු වාතය සහ වඩාත් සෞඛ්‍ය සම්පන්න ජීවිතයක් උදාකර දීම සඳහාත් අප අඛණ්ඩව කැපවනවා.” යනුවෙනි.
මෙම උත්සවයේදී ශ්‍රී ලංකාවේ ශ්වසන වෛද්‍ය විද්‍යාව වැඩිදියුණු කිරීම සඳහා මෙරට ජ්‍යෙෂ්ඨ පෙනහළු ආශ්‍රිත විශේෂඥ වෛද්‍යවරුන් දක්වන දායකත්වය ඇගයීමට ලක් කෙරිණි. මෙම ඇගයීම තුළින් මෙරට සෞඛ්‍ය ක්ෂේත්‍රය වැඩිදියුණු කිරීම සඳහා ඔවුන්ගේ දශක ගණනාවක කැපවීම සහ ශ්වසන වෛද්‍ය විද්‍යාව පිළිබඳ තරුණ වෛද්‍ය වෘත්තිකයන් පුහුණු කිරීමට සහාය වීම අවධාරණය කරන ලදී. මීට අමතරව ශ්‍රී ලංකාවේ ශ්වසන වෛද්‍ය විද්‍යාවේ ඉතිහාසය පිළිබඳ දේශනා සහ වත්මන් අභියෝග, විශේෂයෙන් ඉහළ යන වායු දූෂණය පෙනහළු සෞඛ්‍යයට ඇති කරන බලපෑම පිළිබඳ විද්වත් මණ්ඩල සාකච්ඡාවක් ද මෙහිදී පැවැත්විණි.
මෙම අවස්ථාවට Lina Manufacturing හි අලෙවිකරණ කණ්ඩායම ද සහභාගී වූ අතර ශ්‍රී ලංකාව පුරා නිරෝගිමත් ශ්වසන සෞඛ්‍යයක් පවත්වා ගැනීමේ ඔවුන්ගේ ඉලක්කයට ගැලපෙන සහ ඊට සහය වන ක්‍රියාකාරකම්වලට ඔවුන්ගේ නොසැලෙන කැපවීම මෙයින් මැනවින් පෙන්නුම් කරන ලදී.
2021 දී ආරම්භ කරන ලද Lina Manufacturing යනු සන්ෂයින් හෝල්ඩින්ග්ස් යටතේ ක්‍රියාත්මක වන ශ්‍රී ලංකාවේ පළමු පූර්ණ ඒකාබද්ධ සුව සේවා සමාගම වන Sunshine Healthcare Lanka හි නිෂ්පාදන අංශයයි. Lina Manufacturing ප්‍රධාන වශයෙන් ශ්වසන උපකරණ සහ පේටන්ට් බලපත්‍ර හිමි dry-powder inhalers (DPIs) සඳහා විශේෂීකරණය වී ඇති අතර අද වන විට දේශීය වෙළඳපොලේ ඇති එකම metered dose inhalers (MDIs) නිෂ්පාදකයා ද වේ. සමාගම විසින් රජයේ සහ පෞද්ගලික අංශයට ස්වසන නිෂ්පාදන පෙළක් සපයනු ලබන අතර දැනට ඇදුම රෝගයට ප්‍රතිකාර කිරීම කෙරෙහි අවධානය යොමු කරමින් නිෂ්පාදන හයක් වෙළඳපල වෙත ඉදිරිපත් කරයි. දේශීය වෙළඳපොළට dry powder capsules, පෙති, nasal sprays, devices, metered dose inhalers සහ ක්‍රීම් වැනි නවීන නිෂ්පාදන හඳුන්වා දීම සඳහා සමාගම පර්යේෂණ හා සංවර්ධන කටයුතු වෙනුවෙන් අඛණ්ඩව ආයෝජනය කරයි. දැනට, Lina Manufacturing නිෂ්පාදන කර්මාන්තශාලාව ශ්‍රී ලංකාවේ දේශීයව සකස් කරන ලද MDI නිෂ්පාදන සඳහා ලෝක සෞඛ්‍ය සංවිධානයේ හොඳම නිෂ්පාදන පිළිවෙත් (Good Manufacturing Practices – GMP) සහතික කළ එකම නිෂ්පාදන කර්මාන්තශාලාව වේ.
