DSI අනුබද්ධිත AVI සන්නාමය උල්ලංඝනය කිරීමට එරෙහිව වාරණ නියෝගයක් නිකුත් කෙරෙයි

 



 

 

‘AVI_Clothing’ යන ප්‍රකාශිත නාමය යටතේ Facebook සහ Instagram හි විද්‍යුත්-වාණිජ්‍යය ව්‍යාපාරයක් පවත්වාගෙන යන ආයතනයකට එරෙහිව සීමාසහිත ඩී.සැම්සන් සහ පුත්‍රයෝ (පෞද්ගලික) සමාගම විසින් සිය නීතීඥ සුදත් පෙරේරා ඇසෝසියේට්ස් විසින් කොළඹ වාණිජ මහාධිකරණයේ නඩු පවරා ඇත.  DSI හි AVI වෙළෙඳ ලකුණ සහ සන්නාමය අසාධාරණ තරඟකාරිත්වය සහ අස්ථාවර කිරීම යන පදනම මත උල්ලංඝනය කිරීම වෙනුවෙන් මෙම නඩුව ගොනු කර ඇත.

2023 මාර්තු 27 වැනි දින වාණිජ මහාධිකරණ විනිසුරු ප්‍රියන්ත ප්‍රනාන්දු මහතා විසින්, විත්තිකරු වන AVI_Clothing ට එරෙහිව AVI වෙළෙඳ නාමයට සමාන හෝ ව්‍යාකූල ලෙස සමාන වෙළෙඳ නාමයක් සහිත ඇඟලුම් විකිණීමේ ව්‍යාපාරයෙහි නිරත වීම සඳහා වාරණ නියෝගයක් නිකුත් කරන ලදී.

සීමාසහිත ඩී.සැම්සන් සහ පුත්‍රයෝ (පෞද්ගලික) සමාගම ගෙන එන DSI යනු දීප ව්‍යාප්තව පාවහන්, ඇඟලුම් සහ බයිසිකල් ටයර් නිෂ්පාදනය කරන ශ්‍රී ලංකාවේ ප්‍රමුඛතම ගෘහස්ථ සන්නාමයක් වන අතර, එය ආරම්භයේ පටන් ගුණාත්මක නිෂ්පාදන පාරිභෝගික ජනතාව වෙත ලබා දීම වෙනුවෙන් ප්‍රබල කීර්තියක් අත්කර ගෙන ඇත.  2006 වසරේ දී, DSI විසින් දේශීය ක්‍රීඩා ඇඳුම් සන්නාමයක් වන ‘AVI’ හඳුන්වා දුන් අතර, එහි  සාර්ථකත්වය, පාරිභෝගික ආකර්ෂණය සහ කීර්තිය හේතුවෙන්, 2022 වසරේ දී, සුවිශේෂී AVI  අලෙවිසැලක් කොළඹ 07 ප්‍රදේශයේ දී විවෘත කෙරිණි.

පැමිණිලිකරු වන DSI, විත්තිකරු විසින් තමාට අයත් ‘AVI’ ලකුණ ශබ්දමය හා දෘශ්‍යමය වශයෙන් සමාන ආකාරයකින් පිටපත් කර ඇත්තේ එහි නිෂ්පාදන පැමිණිලිකරුගේ නිෂ්පාදන ම බව හිතාමතා ඒත්තු ගැන්වීමේ  චේතනාවෙන් බව අවධාරණය කළේය.

විත්තිකරු විසින් භාවිත කරන ලද අපැහැදිලි ලකුණෙහි දක්නට ලැබෙන සුළු සුළු වෙනස්කම් සාමාන්‍ය පාරිභෝගිකයින්ට නොපෙනෙන බවත්, විත්තිකරු විසින් පැමිණිලිකරුගේ AVI වෙළෙඳ ලකුණේ හොඳ හිත සහ කීර්තිය උදුරා ගැනීමේ ද්වේෂසහගත චේතනාවෙන් හිතාමතා ම ක්‍රියා කරනු ලබන බවත් පැමිණිලිකරු තවදුරටත්   ප්‍රකාශ කළේය.

පැමිණිලිකරු වෙනුවෙන් පෙනී සිටි  ජ්‍යෙෂ්ඨ නීතිඥවරයාගේ කරුණු  දැක්වීමෙන් සැහීමකට පත් වූ වාණිජ මහාධිකරණය, විත්තිකරුට ‘AVI’ යන නාමය / ලකුණ / සලකුණ දිගටම භාවිත කිරීම සහ එහි වෙනස් කළ අනුවාදයක්/පිටපතක්  භාවිත කිරීම , AVI_Clothing යන වෙළෙඳ නාමය යටතේ ව්‍යාපාර කටයුතු සිදු කිරීම සහ එහි වෙනත් ඕනෑ ම වෙනසක් / වෙනත් ඕනෑ ම වෙළෙඳ නාමයක් හෝ වෙළෙඳ ලකුණක් ව්‍යාකූල ලෙස පැමිණිලිකරුගේ වෙළෙඳ නාමය හෝ වෙළෙඳ ලකුණ සමඟ සමාන වන අයුරින් භාවිත කිරීම වළක්වන වාරණ නියෝගයක් නිකුත් කළේය. තව ද, විත්තිකරුට 2023 අප්‍රේල් 10 වැනි දින අධිකරණයේ පෙනී සිටින ලෙස නොතීසි නිකුත් කෙරිණි.

සීමාසහිත ඩී.සැම්සන් සහ පුත්‍රයෝ (පෞද්ගලික) සමාගම (DSI) වෙනුවෙන් සුදත් පෙරේරා ඇසෝසියේට්ස් නීතිඥ  සමාගමේ උපදෙස් මත  නීතිඥ නයෝමි චේතනා සමඟ නීතිඥ මනෝජ් බණ්ඩාර මහතා  පෙනී සිටින ලදී.