ලංකා ව්‍යාපාරික පුවත් - LBN
ශ්‍රී ලංකාවේ ප්‍රමුඛ පෙළේ විවිධාංගීකරණය වූ සමූහ ව්‍යාපාරයක් වන DIMO, ස්ත්‍රී පුරුෂ සමානාත්මතාවයෙන් යුත් සේවා සංස්කෘතිය අගයමින් ජාත්‍යන්තර කාන්තා දිනය අර්ථවත්ව සමරන ලදී .
අධ්‍යාපනය සහ දැනුවත්භාවය ඔස්සේ කාන්තාවන් සවිබල ගන්වමින් සේවා ස්ථාන නිර්මාණය කිරීමේ වැදගත්කම පිළිබදව විද්වත් සාකච්ඡාවක්, වගේම පසුගිය වසර 10 තුළ ස්ත්‍රීන්ට හිතකර සේවා ස්ථානයක් ලෙස DIMO ලබා ඇති ප්‍රගතිය පිළිබඳව කතිකාවතක් සහ ‘Powerfully You’ කාන්තා නායකත්ව පුහුණු වැඩසටහන සාර්ථකව නිමකල DIMO කාන්තා කාර්ය මණ්ඩල සාමාජිකයින්ට සහතිකපත් බෙදාදීම මෙහිදී සිදුකෙරිණි. එමෙන්ම DIMO කාන්තා කාර්ය මණ්ඩලය විසින් ඉදිරිපත් කළ විලාසිතා දැක්මක් ද මෙම අවස්ථාවට ඇතුළත් විය.
විනිසුරු ශිරානි තිලකවර්ධන, සරත් ගනේගොඩ, ව්රායි රේමන්ඩ්, ආචාර්ය සුලෝචනා සේගේරා සහ ක්ෂණිකා රත්නායක වැනි ප්‍රවීණයින්ගෙන් යුත් විද්වත් මඩුල්ලක් විසින් මෙම කතිකාවත මෙහෙයවනු ලැබීය. කාන්තාවන් සවිබල ගැන්වීම ප්‍රවර්ධනය කිරීම සඳහා සේවා ස්ථානයේ ආකල්ප වෙනස් කිරීමේ අවශ්‍යතාවය සහ ගෞරවනීය සේවා පරිසරයන් නිර්මාණය කිරීමේ වැදගත්කම පිළිබඳව මෙහිදී ඔවුන් විසින් අවධාරණය කරන ලදී.
මෙහිදී DIMO හි විධායක අධ්‍යක්‍ෂිකා සහ ප්‍රධාන මානව සම්පත් නිලධාරිනී දිල්රුක්ෂි කුරුකුලසූරිය මහත්මිය, ගෞරවනීය සහ ආරක්ෂිත සේවා ස්ථානයක් යනු හුදෙක් සදාචාරාත්මක අවශ්‍යතාවයක් පමණක් නොවන බවත් එය DIMO හි තිරසාර සැලැසුමේ තවත් තීරණාත්මක අංගයක් වන බවත් ප්‍රකාශ කළාය. මෙම ප්‍රවේශයේ අරමුණ වන්නේ 2030 වසර වන විට තීරණ ගැනීමේ භූමිකාව තුළ කාන්තා නියෝජනය 40%ක් දක්වා වර්ධනය කිරීම බවත් කාන්තාවන් සවිබල ගැන්වීම සඳහා ඇති බාධක අධ්‍යාපනය සහ දැනුවත්භාවය තුළින් බිඳ දැමිය හැකි බවත් එය දිගුකාලීන සාර්ථකත්වය ප්‍රවර්ධනය කරන සේවා ස්ථාන සංස්කෘතියක් නිර්මාණය කිරීමට ඇති හොඳම ක්‍රමයවේදය බවත් ඇය තවදුරටත් පැවසුවාය.
මෙහිදී දිල්රුක්ෂි මහත්මිය විසින් සමාගම තුළ කාන්තාවන් පිළිබඳ ආකල්පය වෙනස් කිරීම සහ ඔවුන් බලගැන්වීම කෙරෙහි ක්‍රියාත්මක කළ විවිධ වැඩසටහන් පිළිබඳව ද සදහන් කළාය. දැනුවත්භාවය ඇති කිරීම, කළමනාකරුවන් පුහුණු කිරීම සහ කාන්තාවන්ට හිතකර ප්‍රතිපත්ති ක්‍රියාත්මක කිරීම ආදි කරුණු මේ සඳහා ඇතුළත් වන බව ඇය ප්‍රකාශ කළ අතර යම් හිරිහැරයක් සිදුවුවහොත් ඒ පිළිබඳ ස්වාධීනව වාර්තා කිරීම සඳහා ලබාදී ඇති DIMO හි දුරකථන මාර්ගය ඔස්සේ බියෙන් තොරව ඒ පිළිබඳව වාර්තා කිරීමට සේවකයන්ට අවස්ථාව ලබා දී ඇති බවද පැවසුවාය.
‘Powerfully You’ යනු වෘත්තීය දියුණුව සඳහා අවශ්‍ය විශ්වාසය, අභියෝගවලට මුණදීමේ හැකියාව සහ කාර්යක්ෂමතාව පිළිබඳව කනිෂ්ඨ සහ මධ්‍යම කළමනාකරණ අංශවල කාන්තාවන් සවිබල ගැන්වීම සදහා DIMO හි ක්‍රියාත්මක වන කාන්තා නායකත්ව පුහුණු වැඩසටහනයි. එම පුහුණු වැඩසටහන සාර්ථකව නිමකල කාන්තා කාර්ය මණ්ඩල සාමාජිකයින්ට සහතික පත්‍ර බෙදාදීමද මෙහිදී විශේෂ අංගයක් වුණි .
DIMO හි කාන්තා කාර්ය මණ්ඩලය විසින් ඉදිරිපත් කළ ‘Walk of Confidence’ විලාසිතා දැක්ම සමඟින් මෙම කාන්තා දින සැමරුම අවසන් කරන ලදී. කාන්තාවන් තුළ ආත්ම විශ්වාසය ඉහළ නංවමින්, තමා තමන් ලෙසම ඉදිරියට යාමට ඔවුන් දිරිගැන්වීම මෙහි මූලික අරමුණ විය.
