ලංකා ව්‍යාපාරික පුවත් - LBN
සමුද්‍රීය පරිසර ආරක්ෂණ අධිකාරිය ක්‍රියාවට නංවා ඇති ‘Beach Caretaker’ වැඩසටහන වෙනුවෙන් එම අධිකාරිය සහ ජෝන් කීල්ස් සමූහ ව්‍යාපාරයේ සමාජ ව්‍යවසායකත්ව ව්‍යාපෘතිය වන Plasticcycle සමග අත්වැල් බැඳගැනීමට Cinnamon Bey Beruwala හෝටලය පසුගිය නොවැම්බර් 27 වන දින කටයුතු කළේ ය. බේරුවල මුහුදු වෙරළ සුරක්ෂිත කිරීම මෙම හවුල්කාරීත්වයේ මූලික අරමුණ වී තිබේ.
ශ්‍රී ලංකාවේ වෙරළ තීරය ජෛව විවිධත්වයෙන් සපිරි වෙරළ තීරයකි. දුර්ලභ සාගර මත්ස්‍ය වර්ග මෙම වෙරළාශ්‍රිත මුහුදු තීරයේ බහුලව හමුවන අතර, මුහුදු කැස්බෑවන් වැනි ජීවී වර්ග බිත්තර දැමීම සඳහා වෙරළට පැමිණෙති. කෙසේ වුවද සංචාරක කටයුතු ආදිය නිසා ප්ලාස්ටික් අපද්‍රව්‍ය එක්රැස් වීම මගින් මෙම පරිසර පද්ධතිය සහ එහි ජීවී විශේෂ දැඩි තර්ජනයකට ලක්වී ඇත.
Plasticcycle සහ Cinnamon Hotels & Resorts විසින් 2020 ජනවාරි මාසයේදී ‘Beach Caretaker’ වැඩසටහනේ පළමු අදියර Hikka Tranz by Cinnamon හිදී ක්‍රියාවට නංවන ලදි.
වෙරළ තීරය සුරක්ෂිත කිරීම අරමුණු කරගත් දීර්ඝ කාලීන ක්‍රියාකාරකම් මාලාවක් ඔස්සේ ජනතාව දැනුවත් කිරීම සහ තිරසාර සංචාරක කර්මාන්තයක් නිර්මාණය කිරීම මෙම වැඩසටහනේ මූලික ඉලක්ක වී තිබේ. මගපෙන්වන්නෙකු සමග ‘ස්නෝක්ලින්’ පිහිනුම් වැඩසටහන් වැනි තරුණ පරපුර ඉලක්ක කරගත් වැඩසටහන් ක්‍රියාවට නැංවීම, පරිසරයට ඇතිවන බලපෑම අවම වන, වඩාත් තිරසාර ව්‍යාපාර ක්‍රමවේද නිර්මාණය කිරීම සහ පරිසරය සුරැකීමේ වැදගත්කම සම්බන්ධයෙන් වෙරළ තීරය වෙත පැමිණෙන්නන් දැනුවත් කිරීම වැනි වැඩසටහන් මේ යටතේ ක්‍රියාත්මක වනු ඇත.
මෙම හවුල්කාරීත්වයට අත්සන් තබන අවස්ථාවේදී අදහස් දක්වමින් නාගරික සංවර්ධන, වෙරළ සංරක්ෂණ, අපද්‍රව්‍ය බැහැරලීම හා ප්‍රජා පවිත්‍රතා කටයුතු රාජ්‍ය අමාත්‍ය නාලක ගොඩහේවා මහතා පැවසුවේ පෞද්ගලික අංශය හා මහජනතාව මෙලෙස සමුද්‍රීය පරිසර ආරක්ෂණ අධිකාරිය සමග අත්වැල් බැඳගැනීම මගින් වෙරළ තීරය ආරක්ෂා කරගැනීම යන පොදු අරමුණ ඉටුකරගැනීම පහසු වනු ඇති බවයි. එය සමාජයේ යහපත වෙනුවෙන් ඉටුකරන සුවිශාල මෙහෙවරක් බවද ඒ මහතා සඳහන් කළේ ය.
Cinnamon Bey හි සාමාන්‍යාධිකාරී මයික් එම්. ජාවඩ් මහතා අදහස් දැක්වුයේ මෙසේ ය. “පරිසරය හා එහි ආරක්ෂාව උදෙසා Cinnamon Bey හි නොසැලෙන කැපවීම සහ සමුද්‍රීය පරිසර ආරක්ෂණ අධිකාරිය වෙතින් ලැබෙන සහයෝගය, වෙරළ තීරය, සාගරය හා කොරල් පර ආරක්ෂා කරගැනීම සම්බන්ධයෙන් අප සතු ඉලක්ක ළඟා කරගැනීමට බෙහෙවින් උපකාරී වේවි කියා අප සිතනවා. අපගේ ඉලක්කය වන්නේ මුහුදු ජීවීන්ට හිතකර පරිසරයක් නිර්මාණය වන ආකාරයට සාගර ජෛව පද්ධතිය ආරක්ෂා කරගැනීමයි.”
