ලංකා ව්‍යාපාරික පුවත් - LBN
දරිද්‍රතා විශ්ලේෂණ කේන්ද්‍රයේ (CEPA) නව විධායක අධ්‍යක්ෂවරයා ලෙස ආචාර්ය සිරිමල් අබේරත්න මහතා පත් කර ඇත. මෙම පත්වීම 2025 පෙබරවාරි 1 වන දින සිට ක්‍රියාත්මක වේ. ඔහු කීර්තිමත් ආර්ථික විද්‍යාඥයෙකු හා චින්තකයෙකි. එමෙන්ම අධ්‍යයන, ප්‍රතිපත්ති සම්පාදනය සහ පර්යේෂණ පිළිබඳ ඒ මහතා සතු දැනුම් සම්භාරය ශ්‍රී ලංකාවට මෙම තීරණාත්මක කාලය තුළ දරිද්‍රතා විශ්ලේෂණ කේන්ද්‍රය සඳහා වටිනාකමක් එක් කරනු ඇත.
ආචාර්ය අබේරත්න මහතා කොළඹ විශ්ව විද්‍යාලයේ ආර්ථික විද්‍යාව පිළිබඳ කීර්තිමත් මහාචාර්යවරයෙකු වන අතර ඇම්ස්ටර්ඩෑම් නිදහස් විශ්ව විද්‍යාලයෙන් ආචාර්ය උපාධියක් හිමි කරගෙන ඇත. මීට අමතරව ඔහු හේග් හි සමාජ විද්‍යායතනයෙන් උපාධියක් සහ කොළඹ විශ්වවිද්‍යාලයෙන් ශාස්ත්‍රපති ගෞරව උපාධියක් ලබා ගෙන ඇත. ජාත්‍යන්තර වෙළඳාම, ප්‍රතිපත්ති ප්‍රතිසංස්කරණ සහ ග්‍රාමීය සංවර්ධනය යන ක්ෂේත්‍රවල ආචාර්ය අබේරත්න මහතාගේ දායකත්වය පුළුල් පර්යේෂණ, පුවත්පත් හා ලිපි සහ මාධ්‍යවල හොඳින් ලේඛනගත කර ඇත.
මීට අමතරව ඔහු 2022 වසරේ සිට ශ්‍රී ලංකා මහ බැංකුවේ පාර්ශවකරුවන්ගේ සහභාගීත්ව කමිටුවේ සභාපති සහ 2017 වසරේ සිට 2021 වසර දක්වා මුදල් ප්‍රතිපත්ති උපදේශන කමිටුවේ සභාපති ඇතුළු වැදගත් තනතුරු ද හොබවා ඇත. ඔහු ජෛව විවිධත්ව මූල්‍යකරණය පිළිබඳව UNDP ශ්‍රී ලංකා සඳහා උපදෙස් ලබා දී ඇති අතර ඔස්ටේ්‍රලියානු ජාතික විශ්වවිද්‍යාලය සහ ජපානයේ Ryukoku විශ්වවිද්‍යාලය වැනි කීර්තිමත් ආයතනවල Visiting Fellow ලෙස කටයුතු කර ඇත.
ආචාර්ය අබේරත්න මහතා දරිද්‍රතා විශ්ලේෂණ කේන්ද්‍රයේ කටයුතු කිරීමට පෙර මාස කිහිපයක් එහි උපදේශකයෙකු ලෙස සේවය කළේය. දියුණුව සඳහා මාර්ගයක් ලෙස ආර්ථික නිදහස අත්‍යවශ්‍ය බව ඔහු විශ්වාසය කරන අතර ප්‍රතිපත්ති නිර්මාණය කිරීම පිළිබඳව වටිනා දැනුමක් ඔහු සතුව පවතී. කරුණු මත පදනම් වූ පර්යේෂණ සහ තිරසාර සංවර්ධනය සඳහා වන CEPA හි මෙහෙවරට ඔහු නායකත්වය ලබා දෙනු ඇත.
දරිද්‍රතාවය පිටුදැකීමට සහ ජාතික ප්‍රතිපත්ති සාකච්ඡාවලට CEPA හි බලපෑම ශක්තිමත් කිරීම සඳහා ඉටු කළ වැදගත් කාර්යභාරය වෙනුවෙන් ඉවත්ව යන විධායක අධ්‍යක්ෂ ආචාර්ය හේරත් ගුණතිලක මහතාට මෙහිදී CEPA ආයතනය සිය කෘතඥතාවය පළ කළේය.
ආචාර්ය අබේරත්න මහතාගේ නායකත්වය යටතේ CEPA දරිද්‍රතාවයට අදාළ ගැටළු පිළිබඳ අවබෝධය තව තවත් දිරිමත් කිරීම සහ ජාතික, කලාපීය, ආංශික සහ ව්‍යාපෘති පාදක කරගත් සියලු ආකාරයේ සංවර්ධන ප්‍රතිපත්තිවලට දායක වීමට අරමුණු කරයි.
