ලංකා ව්‍යාපාරික පුවත් - LBN
ශ්‍රී ලංකා බැඩ්මින්ටන් ආයතනය සංවිධාන කරනු ලබන 71 වැනි ජාතික බැඩ්මින්ටන් ශූරතාවලිය අද බැඩ්මින්ටන් ආයතනයේ සභාපති රොහාන් ද සිල්වා මහතාගේ ප්‍රධානත්වයෙන් කොළඹ දී ආරම්භ විය. ක්‍රීඩක ක්‍රීඩිකාවෝ දහසකට වැඩි සංඛ්‍යාවක් තරග වදින මෙවර ජාතික බැඩ්මින්ටන් ශූරතාවලිය මේ මස 10 වැනිදා දක්වා බැඩ්මින්ටන් ආයතනයේ ක්‍රීඩාගාරයේ, වෙළෙඳ සේවා ගෘහස්ත බැඩ්මින්ටන් ක්‍රීඩාගාරයේ සහ ඩී.එස්.සේනානායක ගෘහස්ත ක්‍රීඩාංගණයේදී පැවැත්වෙයි.
ජයග්‍රාහක ජයග්‍රාහිකාවන්ට රුපියල් මිලියන දෙකක මුදල් තෑගි පිරිනැමෙන 71 වැනි ජාතික බැඩ්මින්ටන් ශූරතාවලියේ මූලික වටයේ තරග ඊයේ සමාරම්භක උත්සවයෙන් පසු ආරම්භ වූ අතර, අවසන් 16 දෙනාගේ තරග වටය දෙසැම්බර් මස 8 වැනිදා පැවැත්වේ. දෙසැම්බර් මස 9 වැනිදා අර්ධ අවසන් පූර්ව වටයේ තරග සහ අවසන් පූර්ව වටයේ තරග පැවැත්වෙන අතර, අවසන් මහා තරග සහ සමාප්ත උත්සවය දෙසැම්බර් 10 වැනිදා පැවැත්වීමට නියමිතය.
71 වැනි ජාතික බැඩ්මින්ටන් ශූරතාවලියට අවුරුදු 11 සිට අවුරුදු 19 දක්වා කනිෂ්ඨ තරග අංශය, අවුරුදු 30ට වැඩි සහ අවුරුදු 70ට වැඩි වශයෙන් ජ්‍යෙෂ්ඨ තරග අංශය සහ කාන්තා හා පිරිමි ඒකල, යුගල සහ මිශ්‍ර යුගල තරග ඇතුළත් විවෘත තරග අංශය ඇතුළත් වේ. සියලු තරග ශ්‍රී ලංකා බැඩ්මින්ටන් ආයතනයේ නිල වෙබ් අඩවිය ඔස්සේ සජීවිව විකාශය කෙරේ.
