ලංකා ව්‍යාපාරික පුවත් - LBN
වෙළෙඳ සේවා පාපන්දු සංගමය විසින් වාර්ෂිකව සංවිධානය කරනු ලබන වෙළෙඳ සේවා පාපන්දු තරගාවලි ඉතිහාසයේ සදා නොමැකෙන අති විශිෂ්ඨ ජයග්‍රහණයක් සනිටුහන් කරමින්, 2024 වෙළෙඳ සේවා පාපන්දු තරගාවලියේ තෙවන පෙළ ශූරතාවය C.W.Mackie PLC කණ්ඩායම විසින් දිනාගැනීමට සමත්විය. 2024 නොවැම්බර් මස 04 වැනිදා මාදින්නාගොඩ වීරසිංහ මල්ලිමාරච්චි ක්‍රීඩාංගණයේදී HSBC කණ්ඩායම හා පැවැති තෙවන පෙළ අවසන් මහා තරගයේදී C.W.Mackie PLC කණ්ඩායම වාර්තාගත ජයග්‍රහණයක් ලබාගන්නේ තරගාවලියේ තරග 7 පුරා වැඩිම ගෝල සංඛ්‍යාවක් වාර්තා කළ කණ්ඩායම සහ අඩුම ගෝල සංඛ්‍යාවක් ලබාදුන් කණ්ඩායම ලෙසද කැපීපෙනෙමිනි.
අර්ධ අවසාන තරග වටයේදී තියුණු තරගයක් ලබාදෙමින් Commercial Bank කණ්ඩායම පරදවා HSBC කණ්ඩායම සමග පැවති අවසන් මහා තරගයද ජයග්‍රහණය කළ C.W.Mackie PLC සමාගම, ඔවුන් විසින් දිනාගන්නා ලද පළමු වෙළෙඳ සේවා ශූරතාවය මෙය වීමද සුවිශේෂත්වයකි.
C.W.Mackie PLC සමාගම ලැබූ මෙම ජයග්‍රහණය වෙළෙඳ සේවා ආයතනයන්ගේ සේවයේ නියුතු කාර්ය මණ්ඩලයන්ගේ දක්ෂ ක්‍රීඩක ක්‍රීඩිකාවන්ට ධෛර්ය සම්පන්න ලෙස ඉදිරියට පැමිණෙන්නට පූර්වාදර්ශයක් මෙන්ම දිරිගැන්වීමක්ද වේ. මෙමගින් C.W.Mackie PLC සමාගම, එහි කාර්ය මණ්ඩලයේ දක්ෂතාවය, කණ්ඩායම් හැඟීම හා එකමුතුකම මනාව පිලිබිඹු කරයි.
