ලංකා ව්‍යාපාරික පුවත් - LBN
ලොවපුරා රටවල් 100 කට වඩා පාරිභෝගිකයන්ගේ පවස නිවන පානය සන්කුවික්, ශ්‍රී ලංකා වොලිබෝල් සංගමය (SLVF) සමග නැවතත් අත්වැල් බැඳගනිමින් Sunquick National Beach Volleyball Championship 2023 තරගාවලිය පවත්වන්නට සැලසුම්කොට ඇත. ශ්‍රී ලංකාවේ ජාතික ක‍්‍රීඩාව වන වොලිබෝල් ක‍්‍රීඩාවේ උන්නතිය උදෙසා සන්කුවික් සන්නාමයේ අනුග‍්‍රාහක දායකත්වයෙන් සංවිධානය කෙරෙන “සන්කුවික් ජාතික බීච් වොලිබෝල් ශූරතා තරගාවලිය 2023” මැයි මස 19 වැනිදා සිට 21 වැනිදා දක්වා මීගමුව, කුඩාපාඩුව වෙරළ උද්‍යානයේදී පැවැත්වේ.
“සන්කුවික් ජාතික බීච් වොලිබෝල් ශූරතා තරගාවලිය 2023” වෙනුවෙන් විවෘත, වයස අවුරුදු 22න් පහළ, 19න් පහළ සහ 16න් පහළ යන වයස් කාණ්ඩයන්ගෙන් කාන්තා හා පිරිමි තරග පැවැත්වේ. තරගාවලියේ ජයග‍්‍රාහකයන්ට පදක්කම්, සහතික පත‍්‍ර සහ ආකර්ෂණීය මුදල් තෑගි රැසක් පිරිනැමීමට සන්කුවික් විසින් කටයුතු යොදා ඇත. 2023 සන්කුවික් ජාතික බීච් වොලිබෝල් ශූරතා තරගාවලියේ විවෘත අංශයේ ශූරතාවය සඳහා රු. 50,000 ක්, අනුශූරතාවය වෙනුවෙන් රු. 30,000 ක්, තුන්වන ස්ථානය සඳහා රු. 25,000 ක් සහ සිව් වැනි ස්ථානය සඳහා රු. 15,000 ක් බැගින් මුදල් ත්‍යාග පිරිනැමේ. වයස අවුරුදු 22න් පහළ සහ 19න් පහළ ශූරතා සඳහා රු. 35,000 ක්, අනුශූරතාවය වෙනුවෙන් රු. 25,000 ක් සහ තුන්වන ස්ථානය සඳහා රු. 15,000 ක් ද 16න් පහළ වයස් කාණ්ඩයේ ශූරතාව සඳහා රු. 25,000 ක්, අනුශූරතාවය වෙනුවෙන් රු. 15,000 ක් සහ තුන්වන ස්ථානය සඳහා රු. 10,000 ක් බැගින් මුදල් තෑගි පිරිනැමේ.
ශ්‍රී ලංකා වොලිබෝල් සංගමයේ නීති රීති රෙගුලාසිවලට අනුකූලව, Double-bracket elimination system ක‍්‍රමවේදයට දක්ෂතම ප‍්‍රතිප‍්‍රහාරක කණ්ඩායම් 8ක් තෝරාගනිමින් “සන්කුවික් ජාතික බීච් වොලිබෝල් ශූරතා තරගාවලිය 2023” තරගාවලිය සංවිධානය කෙරේ.
2006 වසරේ ආරම්භ වූ “සන්කුවික් ජාතික බීච් වොලිබෝල් ශූරතා තරගාවලිය” ශ්‍රී ලාංකීය වොලිබෝල් රසිකයන්ගේ උණුසුම් ප‍්‍රතිචාර දිනාගත් උද්යෝගිමත් තරගාවලියකි. ශ්‍රී ලංකාවේ ජාතික ක‍්‍රීඩාව වන වොලිබෝල් නගාසිටුවීමේ අරමුණ ඇතිව 2012 වසරේ සිට වෙළෙඳසේවා වොලිබෝල් තරගාවලියටද සන්කුවික් සිය අනුග‍්‍රාහක දායකත්වය එක්කොට තිබේ.
පළතුරු යුෂ පාන වර්ග රැසක් ශ්‍රී ලාංකිකයන් වෙත හඳුන්වාදුන් සන්කුවික් ලංකා පුද්ගලික සමාගම 1978 වසරේ සිට ශ්‍රී ලාංකීය රසවතුන්ගේ විශ්වාසය දිනාගත් සමාගමකි. ශ්‍රී ලංකාවේ පළතුරු යුෂ හා කෝඩියල් වෙළෙඳපොලේ 70% ක වෙළෙඳපොළ ප‍්‍රතිශතයකට හිමිකම් කියන සන්කුවික් වෙළෙඳපොළ දැවැන්තයෙක් බවට පත්ව සිටියි. මෑතකදී වෙළෙඳපොළට නිකුත් කරන ලද, මිලදී ගත් සැණෙන් පානය කළ හැකි (Ready-to-Drink) පළතුරු බීමක් වන Sunquick BiBi රස වර්ග 4 කින් මිලිලීටර් 125 සහ 200 ඇසුරුම් ලෙස වෙළෙඳපොලේ ඉමහත් පාරිභෝගික ආකර්ෂණය දිනාගෙන ඇත.
