ලංකා ව්‍යාපාරික පුවත් - LBN
Dentsu Rise Up Global Challenge- Sri Lanka Edition 2022 හි ජයග්‍රාහකයන් පිළිගැනීමට ලක්වේ.
ශ්‍රී ලංකාවේ මේ වනවිටත් විශාල වශයෙන් සිදුවන ආහාර නාස්තිය අවම කිරීම සඳහා ශ්‍රී ලංකාවේ පාරිභෝගිකයින් දිරිමත් කිරීම වෙනුවෙන් කැපී පෙනෙන අදහස් ඉදිරිපත්කිරීමට The Dentsu Rise Up Global Challenge – ශ්‍රී ලංකා සංස්කරණයේදී මෙරට තරුණ තරුණියෝ සමත් වූහ. වයස අවුරුදු 17-27 අතර තරුණ තරුණියන් සහභාගී වූ මෙම වැඩසටහනේදී ඉදිරිපත් වූ නිර්මාණශීලී අදහස් වෙනුවෙන් Havelock City Club House ශාලාවේදී ඔවුන් සම්මානයට හා පිළිගැනීමට පාත්‍ර විය.
ඔවුන්ගේ එම අදහස් ගවේශනය කීරීමෙන් සහ නිර්මාණය කිරීමෙන් පසුව පළපුරුදු අතිදක්ෂ විනිශ්චය මණ්ඩලයක් වෙත ඉදිරිපත් කෙරිණි. කැලණිය විශ්වවිද්‍යාලයේ වාණිජ හා මුල්‍ය අංශයේ මහාචාර්ය සී. එන්. වික්‍රමසිංහ, ADA Sri Lanka හි නිර්මාණ සේවා අධ්‍යක්ෂ අසේල ද සිල්වා, TBWA Sri Lanka හි නිර්මාණ අධ්‍යක්ෂ හානිම් අබ්දුල් කාදර්, DentsuGrant හි නිර්මාණ අධ්‍යක්ෂ ශමීර් හුසේන්, AOD හි උපායමාර්ගික උපදේශක සහ MMCA සඳහා නිර්මාණ ශිල්පිනී චානි පෙරේරා සහ DentsuGrant මෙන් ම Miami Ad School හි නිර්මාණ අධ්‍යක්ෂක/උපදේශක ඇමැන්ඩා අලුවිහාරේ යන මහත්ම මහත්මීහු එම විනිශ්චය මණ්ඩලය නියෝජනය කළහ.
දැඩි තරගකාරී වට කිහිපයක් විනිශ්චය කිරීමෙන් අනතුරුව, අවසන් වටය සඳහා හොඳම 20 දෙනෙකු තෝරා පත් කර ගැනුණි . අවසානයේ The Dentsu Rise Up Global Challenge – Sri Lanka Edition 2022 හි ජයග්‍රාහකයා ලෙස විනිශ්චය මණ්ඩලය විසින් ගයංගි සෙනෙවිරත්න තෝරා පත් කර ගන්නා ලදී.
ආහාර අපද්‍රව්‍ය අවම කිරීම සඳහා ඇයගේ අදහස වූයේ ‘Food Pulse’ ක්‍රමවේදයයි. ඒ සඳහා ඇය වටිනා නවතම Apple MacBook Pro එකක් හිමිකර ගත්තාය.
‘The Invisible Food Project’ පිළිබඳ අදහස ඉදිරිපත් කරමින් ආදිලා ෆියාස් පළමු අනුශූරයා ලෙස විනිශ්චය මණ්ඩලය විසින් තෝරා පත් කර ගන්නා ලදී . එම අදහස වෙනුවෙන් ඇයට නවතම Apple iPad + Airpods Pro උපකරණයන් ත්‍යාග වශයෙන් ලැබුණි.
Big data සහ AI භාවිතයෙන් ආහාර අපද්‍රව්‍ය පාලනය කරමින් යහපත් සෞඛ්‍යයක් ඇති කරලීමේ අදහස වෙනුවෙන් අසිත් නිර්මාල් අමරසේකර 2 වන අනුශූරයා බවට පත්වූ අතර ඔහු විසින් නවතම Apple iPad එකක් දිනා ගත්තේය. අවසන් තරගකරුවන් 20 දෙනාට Harman Kardon ශබ්ද පද්ධති, JBL බ්ලූටූත් ස්පීකර් සහ හෙඩ්සෙට් ඇතුළු සැනසිලි ත්‍යාග පිරිනමන ලදී.
මෙම උත්සවයට සහභාගී වූ DentsuGrant සමූහයේ සභාපතිනී නීලා මරික්කාර් මහත්මිය, තරගය පිළිබඳව අදහස් දක්වමින් මෙසේ පැවසුවාය:
“අද ජයග්‍රහනය කළ සියලු දෙනාට ම මගෙන් සුබ පැතුම්! ඔබ සෑමදෙනාගේ අද්වීතීය නවෝත්පාදනයන් සහ අදහස් සමඟින් ඔබ අප සියල්ලන්ම ඉමහත් ආඩම්බරයට පත් කළා . ඔබ සියලු දෙනාට මෙන්ම අනෙකුත් දේශීය හා ගෝලීය තරුණ නව නිපැයුම්කරුවන් බොහෝ දෙනෙක්ට වර්තමාන ලෝකය මුහුණ දෙමින් සිටින අභියෝගවලට නිර්මාණාත්මක වටිනා ප්‍රායෝගික විසඳුම් ඉදිරිපත් කිරීමට මේ ලැබුණු අවස්ථාව ඉතා ම වැදගත්. මේ තුළින් ඔබ මෙන්ම තවත් බොහෝ දෙනෙක් නිර්මාණශීලී චින්තනයෙන් ක්‍රියාකරනු ඇතැයි අපි බලාපොරොත්තු වෙනවා. ඒ වගේම තරගයේ සැබෑ අරමුණ ඉටුකරමින් ජයග්‍රාහකයින්ට ඔවුන්ගේ අදහස් ප්‍රායෝගිකව ක්රියාත්මක කිරීමට අවශ්‍ය මග පෙන්වීම සහ සහයෝගය ලබාදීමට අපි බලාපොරොත්තු වෙනවා” .
DentsuGrant හි ප්‍රධාන උපායමාර්ගික නිලධාරී සහ Dentsu Rise Up Global Challenge – Sri Lanka Edition 2022 හි ව්‍යාපෘති සභාපති සජිත් වීරසිංහ මහතා මෙහිදී අදහස් දක්වමින් ,
“මේ වටිනා අවස්ථාව ශ්‍රී ලාංකේය තරුණ තරුණියන්ට ලබාදීම පිළිබඳව Dentsu Network සහ Global Sustainability කණ්ඩායම්වලට අපි ස්තූතිවන්ත වෙනවා. ආහාර තිරසාරභාවය සහ එක්සත් ජාතීන්ගේ තිරසාර සංවර්ධන ඉලක්කය 12.3 සම්පූර්ණ කිරීම සඳහා කටයුතු කිරීමේ වැදගත්කම පිළිබඳව දැනුවත් කිරීමේ වැඩසටහන්වලට තරුණ තරුණියන් 600 කට අධික පිරිසක් අප හා සම්බන්ධ වුණා.” යැයි පැවසීය.
ශ්‍රී ලංකාවේ සුප්‍රසිද්ධ ආහාර තිරසාරත්වය පිළිබඳ පර්යේෂක, මහාචාර්ය සී එන් වික්‍රමසිංහ මහතා මෙහිදී අදහස් දක්වමින්,
“ආහාර නාස්තිය වැළැක්වීම සඳහා අපි කඩිනමින් කටයුතු නොකළහොත් ගෝලීය උණුසුම ඉහළ යාමේ දී මෙන්ම ආහාර නාස්තියේදීත් අපට අපිට ඒ තත්ත්වයන්ට අනුගත වෙලා ජීවත් වෙන්න පුරුදු වෙන්න වෙනවා. The Dentsu Rise Up Challenge වැනි තරග හරහා රට තුළ උද්ගත වෙලා තියෙන හදිසි දැවෙන ගැටළු විසඳීමට සහ ඒ සඳහා තීරණ ගැනීමට අපේ රටේ තරුණ තරුණියන්ට මග පෙන්වීම මෙන්ම ශක්තිය ලබාදෙනවා” යි පවසා සිටියේය.
Dentsu Global Rise Up Challenge හි අරමුණ වන්නේ ආහාර අපද්‍රව්‍ය මැඩලීම සඳහා නිර්මාණාත්මක සන්නිවේදන ව්‍යාපාරයක් සංවර්ධනය කිරීම සඳහා ලොව පුරා තරුණ තරුණියන් 10,000 බල ගැන්වීමයි. ශ්‍රී ලංකාවේ තරුණ තරුණියන් 600කට වැඩි පිරිසක් Dentsu Rise Up Global Challenge 2022 සඳහා සහභාගී වූ අතර ඔවුන් ආහාර නාස්තිය තුරන් කිරීම සහ ආහාර සුරක්ෂිතතාව සහතික කිරීම සඳහා නිර්මාණාත්මක විසඳුම් ඉදිරිපත් කළ අතර ආහාර නාස්තිය පාලනය කර ගනිමින් ආහාර සුරක්ෂිතතාවය තහවුරු කළ යුතුයි යන්න ඔවුන්ගේ පණිවුඩය විය .
