ලංකා ව්‍යාපාරික පුවත් - LBN
සෙලින්කෝ ලයිෆ් සමාගම අඛණ්ඩව 19 වන වසරටත් වසරේ ජීවිත රක්ෂණ සේවා සපයන්නා ලෙස ස්ලිම් කැන්ටාර් (SLIM Kantar) ජනතා සම්මානය දිනා ගනිමින් ශ්‍රී ලාංකික පාරිභෝගිකයින්ගේ පළමු පිළිගැනීම ලෙස සිය ජනප්‍රියතාව යලි සනාථ කර ඇත.
ශ්‍රී ලංකා අලෙවිකරණ ආයතනය (SLIM) විසින්, ලොව ප්‍රමුඛතම අලෙවිකරණ දත්ත සහ විශ්ලේෂණ සමාගම වන කැන්ටාර් සමඟ එක්ව පිරිනමන මෙම ජනතා සම්මාන පදනම් වන්නේ විනිශ්චය මණඩයක් මත නොව, සමීක්ෂණයක ප්‍රතිඵල මගින් තීරණය කරන ලද පාරිභෝගික මනාපයන් මතය. එය ජනප්‍රිය හැඟීම්වල සැබෑ පිළිබිඹුවක් වන අතර සම්මාන වැඩසටහන ආරම්භයේ සිට සෑම වසරකම ශ්‍රී ලංකාවේ ජීවිත රක්ෂණ ක්ෂේත්‍රයේ මෙම ගෞරවය දිනාගත් එක ම සමාගම සෙලින්කෝ ලයිෆ් සමාගම වන්නේය.
සෙලින්කෝ ලයිෆ් හි වෙළඳපොළ නායකත්වය අඛණ්ඩව 21 වන වසරටත් තහවුරු කරන සමාගමේ 2024 මූල්‍ය ප්‍රතිඵල ප්‍රකාශයට පත් කිරීමෙන් සති දෙකකට පසු සමාගමට ස්ලිම් කැන්ටාර් ජනතා සම්මානය හිමිවිය.
“මහජන විශ්වාසය මත අපගේ සාර්ථකත්වය රඳා පවතින අතර අප විසින් කරන සෑම දෙයක්ම සිදු කරනුයේ ජනතාවගේ විශ්වාසය දිනා ගැනීමට සහ රඳවා ගැනීමටයි. අඛණ්ඩව වසර 19 ක් පුරා ජනතා සම්මානය දිනා ගැනීම නොසැළෙන අධිෂ්ඨානයකින් තොරව අත් කර ගත නොහැකි විශ්මිත ජයග්‍රහණයක් වෙයි. මෙම සම්මානය දිනා ගැනීම පිළිබඳ ව අප නිහතමානීව සතුටු වන අතර එය අපගේ ගනුදෙනුකරුවන්ගේ සහ සමස්ත ප්‍රජාවේ විශ්වාසය නියෝජනය කරයි,” යනුවෙන් මේ පිළිබඳව අදහස් දක්වමින් සෙලින්කෝ ලයිෆ් නියෝජ්‍ය ප්‍රධාන මෙහෙයුම් නිලධාරී සමිත හේමචන්ද්‍ර මහතා ප්‍රකාශ කළේය.
සෙලින්කෝ ලයිෆ් 2024 වසර අවසන් කළේ රුපියල් බිලියන 37.14 ක දළ ලිඛිත වාරික ආදායමක්, රුපියල් බිලියන 28.4 ක ආයෝජන සහ අනෙකුත් ආදායම් සහ රුපියල් බිලියන 65.54 ක ඒකාබද්ධ ආදායමක් උත්පාදනය කරමිනි. ඊට අමතරව 2024 වර්ෂයේ දී රක්ෂණ ඔප්පු හිමියන්ට වාර්තාගත ලෙස රුපියල් බිලියන 25 ක ශුද්ධ හිමිකම් සහ ප්‍රතිලාභ ලැබුණු අතර වර්ෂ අවසනයේ දී සමාගමේ ජීවිත අරමුදල රුපියල් බිලියන 180.89 ක් දක්වා වර්ධනය විය. රුපියල් බිලියන 251.4 ක් දක්වා වර්ධනය වූ මුළු වත්කම් සහ 2024 වර්ෂයේ දෙසැම්බර් 31 වන විට රුපියල් බිලියන 222.5 ක් වූ ආයෝජන කළඹක් ද සෙලින්කෝ ලයිෆ් සතු වෙයි.
2022 සහ 2023 වසරවල ශ්‍රී ලංකාවේ ‘වසරේ හොඳම සන්නාමය’ ලෙස සම්මානයට පාත්‍ර වූ සෙලින්කෝ ලයිෆ් සමාගම, ශ්‍රී ලංකා ජාත්‍යන්තර වාණිජ මණ්ඩලය (ICCSL) සහ කළමනාකරණ ගණකාධිකාරී වරලත් ආයතනය (CIMA) විසින් 2023 දී ශ්‍රී ලංකාවේ වඩාත්ම අගය කරන ලද සමාගම් 10 න් එකක් ලෙස නම් වූ අතර 2023 බ්‍රෑන්ඩ් ෆිනෑන්ස් විසින් ජීවිත සහ සාමාන්‍ය රක්ෂණ යන කාණ්ඩ දෙකෙහිම ‘ශ්‍රී ලංකාවේ වඩාත් වටිනා රක්ෂණ සන්නාමය’ ලෙසත් ශ්‍රේණිගත කර ඇත.
සෙලින්කෝ ලයිෆ් සමාගම ආරම්භ කර ගෙවුණු වසර 37 න් වසර 21 ක්ම මෙරට ජීවිත රක්ෂණ ක්ෂේත්‍රයේ ප්‍රමුඛයා බවට පත්ව ඇති අතර, සක්‍රීය රක්ෂණ ඔප්පු මගින් ජීවිත ආවරණය කරමින් ඔප්පුහිමියන්ගේ ජීවිත සහ ඔවුන්ගේ අරමුණු වලට ඇති අවදානම අවම කරන සහ ආරක්ෂාව ලබා දෙන නව්‍ය රක්ෂණ විසඳුම් සම්පාදනය කරයි.
