ලංකා ව්‍යාපාරික පුවත් - LBN
සෙලින්කෝ ලයිෆ් සමාගමේ අට දෙනෙකුගෙන් යුත් නියෝජිත කණ්ඩායමක් මෑතකදී නියෝජිතායතන කළමනාකරණය පිළිබඳ මැලේසියාවේ පැවති දින හතක පුහුණු වැඩසටහනකට සහභාගි වු අතර, එහි තේමාව වූයේ ‘නියෝජිතායතන ගොඩනැගීමේ ඊළඟ පියවර’ යන්නයි.
ජීවිත රක්ෂණ ක්ෂේත්‍රයේ පුරෝගාමී පෞරුෂයක් වන කේ. හරිදාස් මහතා ප්‍රමුඛ ග්‍රේට් ඊස්ටර්න් ලයිෆ් ඉන්ෂුවරන්ස් සමාගමේ විශේෂඥ කණ්ඩායමක් විසින් මෙහෙයවන ලද මෙම පුහුණු වැඩසටහන ඉදිරිපත් කිරීම් මාලාවක් මෙන්ම කාර්යාල චාරිකාවලින්ද සමන්විත විය.
විකුණුම් කණ්ඩායමේ හය දෙනෙකුගෙන්ද, නියෝජිතායතන පරිපාලන කණ්ඩායමේ එක් අයෙකු සහ පුහුණු දෙපාර්තමේන්තුවේ සමාජිකයෙකුගෙන් ද සැදුම්ලත් සෙලින්කෝ ලයිෆ්හි නියෝජිත පිරිස පීටර් මාරසිංහ මහතා, එන්.ටී. සෙනෙවිරත්න මහතා, උදය ප්‍රනාන්දු මහතා, රෝහිත ලක්මාල් මහතා, ධම්මික ලියනගේ මහතා, ජෙනගන් මීරා මහත්මිය, සුජීව ගරුසිංහ මහතා සහ මිලින්ද පීරිස් මහතා යන අයගෙන් සමන්විත විය.
මෙම පුහුණු සැසි ‘පුහුණු කිරීම සහ සන්නිවේදනය,’ ‘ඔබ තුළ සිටින නායකයා අවදි කරන්න,’ ‘ව්‍යවසායක මානසිකත්වය,’ ‘ඔබේ නියෝජිතායතනයට වැඩිපුර කාන්තාවන් බඳවා ගැනීම,’ ‘ධනවත් වෙළඳපොළවල් වෙත පිවිසෙන්නේ කෙසේද?’ සහ ‘ඩොලර් මිලියනයක් වටිනා නියෝජිතායතනයක් ගොඩනගන්නේ කෙසේද?’ යනාදී මාතෘකාවන්ගෙන් සමන්විත විය. මෙම පුහුණුව ග්‍රේට් ඊස්ටර්න් ලයිෆ් ඉන්ෂුවරන්ස් සමාගමේ කීර්තිමත් පුහුණුකරුවන් දෙදෙනෙකු හා ඉහළ දක්ෂතා ඇති සමූහ විකුණුම් කළමණාකරුවන් හය දෙනෙකුගේ සහයෙන් සැදුම්ලද්දක් විය.
විශිෂ්ටත්වය සඳහා සේවකයින් සන්නද්ධ කිරීම, පුහුණු කිරීම හා අභිප්‍රේරණය, ඔවුන්ගේ ජයග්‍රහණ හඳුනා ගැනීම සහ ත්‍යාග පිරිනැමීම සෙලින්කෝ ලයිෆ් ශ්‍රී ලංකාවේ වසර 20 ක නොබිඳුණු වෙළෙඳපොළ නායකත්වයේ ප්‍රධාන අංගයක් බව සමාගම පවසයි.
මැලේසියාවේ ග්‍රේට් ඊස්ටර්න් ලයිෆ් ඉන්ෂුවරන්ස් ආයතනයෙහිදි සෙලින්කෝ ලයිෆ්හි නියෝජිත කණ්ඩායම සහ කේ. හරිදාස් මහතා (වමේ සිට දෙවැන්නා) ඇතුළු පුහුණුකරුවන් කිහිපදෙනෙක් සේයාරුවෙන් දැක්වෙයි.
