සමාජ දුරස්ථ භාවය සුරකිමින් සෙලින්කෝ ලයිෆ් අභියෝගාත්මක වසරක සාර්ථකත්වය සමරයි

• පිට පිටම 17 වන වරටත් වෙළෙඳපොළ ප‍්‍රමුඛයා බවට පත්කළ විශිෂ්ටයින් ඇගයීමට ලක් කරයි
• දිවයින පුරා සිටින 4,000 කට අධික අලෙවි නිළධාරීන් සම්මාන ප‍්‍රදානෝත්සවය Zoom ඔස්සේ සජීවීව නරඹයි

සමාජ දුරස්ථභාවය සුරැකීමේ වැදගත්කම විදහා දක්වමින් සෙලින්කෝ ලයිෆ් සමාගම පිට පිටම 17 වන වතාවටත් වෙළෙඳපොළ ප‍්‍රමුඛයා බවට පත්වීම සැමරීමේ සම්මාන ප‍්‍රදානෝත්සවය සුරක්ෂිත අයුරින් පසුගියදා පැවැත්වුණු අතර එය Zoom ඔස්සේ දිවයිනේ සියළුම ප‍්‍රධාන නගරවල පිහිටි ශාඛාවල සාමාජිකයින් සජීවීව නරඹන ලදී.

කොළඹ බණ්ඩාරනායක අනුස්මරණ සම්මන්ත‍්‍රණ ශාලාවේ පැවැත්වුණු සම්මාන ප‍්‍රදානෝත්සවයේදී සමාගමේ ඉහළම කාර්ය සාධනයක් පෙන්වූ අලෙවි වෘත්තිකයින්ට සහ කාර්ය මණ්ඩලයට සම්මාන ප‍්‍රදානය කළ අතර කැපවීම, නවෝත්පාදනය සහ අධිෂ්ඨානය තුළින් අභියෝග ජයගැනීමේ ප‍්‍රීතිය මෙහිදී ඉහළම සෞඛ්‍ය මාර්ගෝපදේශනයන් යටතේ සැමරීය.

මෙම සම්මාන ප‍්‍රදානෝත්සවයේදී ඉහළම කාර්ය සාධනයක් පෙන්වමින් සම්මානයට පාත‍්‍රවූ සාමාජිකයින් 82 ක් සමාගමේ High Flyers Club වෙතට ඇතුළත් කළ අතර නව රක්ෂණ ඔප්පු විකිණීම, වාරික එකතු කිරීම, රක්ෂණ ඔප්පු සක‍්‍රීය ලෙස පවත්වා ගැනීම වැනි ප‍්‍රධාන කාර්ය සාධන දර්ශක මෙම තෝරාගැනීම සඳහා භාවිතා කර ඇත. මේ අතර, ඉතාමත් අභියෝගාත්මක වසරක් වූ 2020 වසරේ මිලියන් ඩොලර් රවුන්ඞ් ටේබල් (MDRT) සඳහා සුදුසුකම් ලැබූ සෙලින්කෝ ලයිෆ් සමාගමේ විකුණුම් කණ්ඩායම් සාමාජිකයින් 135 දෙනෙකු මෙහිදී සම්මානයට පාත‍්‍ර විය.

මෙවර මිලියන් ඩොලර් රවුන්ඞ් ටේබල් (MDRT) වටමේසය සඳහා සුදුසුකම් ලැබූ අය අතරින් දෙදෙනෙකු අග‍්‍රගන්‍ය ‘ටොප් ඔෆ් ද ටේබල්’ (ToT) සාමාජිකත්වය අත්කර ගෙන ඇති අතර තවත් හතර දෙනෙකු MDRT ‘කෝට් ඔෆ් ද ටේබල්’ සාමාජිකත්වය අත් කරගෙන ඇත. මේ අතර, එක් වසරක් තුළ මිලියන් ඩොලර් රවුන්ඞ් ටේබල් සඳහා සමාගමෙන් තේරී පත්වූ වැඩිම සංඛ්‍යාව වන 135 මෙවර තේරී පත්වී තිබෙන අතර ඉතාමත් දුෂ්කර කාල පරිච්ඡේදයකදී වුවද මෙවැනි වර්ධනයක් ලබාගැනීමට සමාගමේ අලෙවි කණ්ඩායමට තිබෙන හැකියාව මෙයින් පිළිඹිබු කරයි.

මෙම සම්මාන ප‍්‍රදානෝත්සවයේදී 2020 වසරේදී සමාගමේ කාර්ය සාධනය සඳහා දායකත්වය දැක්වූ කාර්ය මණ්ඩල සාමාජිකයින්, අලෙවි උපදේශකවරුන්, ඒකක ප‍්‍රධානීන් සහ සෙලින්කෝ ලයිෆ් ප‍්‍රධාන මූලස්ථානයේ ශාඛා ප‍්‍රධානීන් සහ සෑම දිස්ත‍්‍රික්කයකම තිබෙන ශාඛා 270 කට අධික ශාඛාවල සාමාජිකයින් ඇගයීමට ලක් කරන ලදී. මෙහිදී, ඉහළ කාර්ය සාධනයක් පෙන්වූ බොහෝ සාමාජිකයින් සම්මාන කිහිපයක්ම දිනා ගැනීම කැපී පෙනෙන කාරණයක් විය.

මෙවර සෙලින්කෝ ලයිෆ් වාර්ෂික සම්මාන ප‍්‍රදානෝත්සවයේ ප‍්‍රධාන ජයග‍්‍රාහකයින් අතර හොඳම ශාඛා ප‍්‍රධානී සම්මානය දිනාගත් මඩකළපුව අංක 04 ශාඛාවේ එස්. වෙනුකරන් මහතා, හොඳම ඒකක ප‍්‍රධානී සම්මානය දිනාගත් නුගේගොඩ අංක 01 ශාඛාවේ ආර්. පී. එදිරිසිංහ මහතා, සහ හොඳම අලෙවි උපදේශක සම්මානය දිනාගත් අම්බලන්තොට අංක 02 ශාඛාවේ ඒ. අයි. පී. මංජුල මහතා සිටියහ.

2020 වසර අවසන් වනවිට සෙලින්කෝ ලයිෆ් සමාගමේ වත්කම් ප‍්‍රමාණය රුපියල් බිලියන 150 ක්වූ අතර එම වසරේදී රුපියල් බිලියන 36.9 ක සමස්ත ආදායමක්, රුපියල් බිලියන 22.1 ක රක්ෂණ වාරික ආදායමක්, රුපියල් බිලියන 106.7 ක ජීවිත අරමුදලක් සහ රුපියල් බිලියන 133.7 ක් ඉක්මවන ආයෝජන කළඹක් මෙන්ම රුපියල් බිලියන 8.7 ක බදු වලට පෙර ලාභයක් සමාගම වාර්තා කරන ලදී.

සෙලින්කෝ ලයිෆ් සමාගම ආරම්භ කර ගෙවුණු වසර 33 න් අර්ධයකට අධික කාලයක් මෙරට ජීවිත රක්ෂණ අංශයේ ප‍්‍රමුඛයා බවට පත්වීමට සමත්වී තිබෙන අතර Great Place to Work® විසින් මෙරට සේවය කිරීමට සුදුසු උසස්ම ස්ථානයක් ලෙසින් සමාගම සහතික කර ඇත. 2020 වසරේදී බ‍්‍රෑන්ඞ් ෆයිනෑන්ස් විසින් මෙරට වඩාත්ම වටිනා ජීවිත රක්ෂණ සන්නාමය ලෙසින් සෙලින්කෝ ලයිෆ් සම්මානයට පාත‍්‍රකළ අතර 2021 වසරේදී ස්ලිම්-නීල්සන් විසින් අඛණ්ඩව 15 වන වසරටත් මෙරට වඩාත්ම ජනප‍්‍රිය ජීවිත රක්ෂණ සමාගම ලෙසින්ද සෙලින්කෝ ලයිෆ් සමාගම තෝරාගන්නා ලදී. එසේම, 2019-20 වසර සඳහා ජාත්‍යන්තර වාණිජ මණ්ඩලයේ ශ‍්‍රී ලංකා ශාඛාව (ICCSL) සහ CIMA ආයතනය එකතුව ‘ශ‍්‍රී ලංකාව තුළ වඩාත්ම ප‍්‍රසාදයට ලක් වූ සමාගම්’ නම් කිරීමේ දී සෙලින්කෝ ලයිෆ් සමාගමට විශේෂ සඳහනක් (Honourable Mention) ලබාදුන් අතර 2019 වසරේදී වර්ල්ඞ් ෆයිනෑන්ස් මගින් අඛණ්ඩව හත්වන වතාවටත් මෙරට හොඳම ජීවිත රක්ෂණ සමාගම ලෙසත් බිස්නස් ටුඬේ ශ්‍රේණිගත කිරීමේදී සමස්තයක් වශයෙන් මෙරට ප‍්‍රධානතම සමාගම් 30 අතුරින් 06 වන ස්ථානයටත් සමාගම තෝරා ගන්නා ලදී.

සෙලින්කෝ ලයිෆ් සක‍්‍රීය රක්ෂණ ඔප්පු මගින් ජීවිත ලක්ෂ 10 කට ආසන්න ගණනක් ආවරණය කර තිබේ. නිර්මාණශීලී සැලසුම් හඳුන්වාදීම සහ සංවර්ධනය, පාරිභෝගික සේවා, වෘත්තීය සංවර්ධනය සහ ආයතනික සමාජ වගකීම යන අංශ සම්බන්ධයෙන් සමාගම ක‍්‍රියාකර තිබෙන ආකාරය අනුව දේශීය රක්ෂණ ක්ෂේත‍්‍රයේ සෙලින්කෝ ලයිෆ් සමාගම මිනුම් ලකුණක් වේ.