ලංකා ව්‍යාපාරික පුවත් - LBN
ශ්‍රී ලංකාවේ ප්‍රමුඛතම සිමෙන්ති නිෂ්පාදකයා වන INSEE සිමෙන්ති සමාගම, 2019 වසර සඳහා නිර්මාණය කළ තම තිරසාර වාර්තාව කොළඹ හිල්ටන් රෙසිඩන්සීස් හෝටලයේදී පැවැති උත්සවයකදී ‘Build for Life’ නමින් පසුගියදා එළිදැක්වීය.
එම අවස්ථාවට මධ්‍යම පරිසර අධිකාරිය, පරිසර ක්ෂේත්‍රයට සම්බන්ධ රාජ්‍ය නොවන සංවිධාන, ඉදිකිරීම් අංශයේ ප්‍රමුඛ ආයතන, ක්ෂේත්‍රය පිළිබඳ උනන්දුවක් දක්වන්නන් මෙන්ම INSEE සිමෙන්ති සමාගමේ ජ්‍යෙෂ්ඨ කළමනාකාරීත්වය ඇතුළු බොහෝ දෙනෙක් මෙම අවස්ථාවට සම්බන්ධ වූහ.
2019 වසර සඳහා වූ තිරසාර වාර්තාව ඉකුත් වසරේදී එළිදැක්වීමට නියමිතව තිබුණ ද, ගෝලීය වසංගත තත්ත්වය හා සෞඛ්‍යාරක්ෂණ බාධාවන් නිසා එය කල් දමන ලදී. 2016 වසරේදී තායිලන්තයේ සියාම් සිටි සිමෙන්ති පොදු සමාගම විසින් සමාගමේ හිමිකාරීත්වය ලබාගත් පසු එළිදැක්වුණු දෙවැනි තිරසාර වාර්තාව මෙය වේ.
උත්සවය ආරම්භ කරමින් INSEE සිමෙන්ති සමාගමේ සභාපති නන්දන ඒකනායක මහතා, පැමිණ සිටි ආරාධිතයින් සියලු දෙනා පිළිගත්තේය. ඉන් අනතුරුව සමාගමේ ප්‍රධාන විධායක නිලධාරී ගුස්ටාවෝ නවාරෝ මහතා 2019 වසරේ INSEE සමාගම සිදුකළ තිරසාර වැඩසටහන් සහ අත්කරගත් ජයග්‍රහණ පිළිබඳ විශේෂ ඉදිරිපත් කිරීමක් සිදුකළේය. එමෙන්ම තිරසාර වාර්තාවේ අන්තර්ගත ප්‍රධාන කරුණු පිළිබඳව ද, INSEE සිමෙන්ති කර්මාන්තශාලා තුනෙහි, කැණීම් භූමියේ, සෙසු ව්‍යාපාර ඒකක සහ දෙපාර්තමේන්තුවල ක්‍රියාකාරකම් සහ ජයග්‍රහණ ද ඔහු විස්තර කළේය.
ගුස්ටාවෝ නවාරෝ මහතා වාර්තාව නිල වශයෙන් එළිදක්වමින්, එය විශේෂ ආරාධිතයින් වෙත පිළිගැන්වීය.
“වසර ගණනාවක් මුළුල්ලේ තම ව්‍යාපාර කටයුතුවලදී තිරසාර බව පිළිබඳ විශේෂ අවධානයකින් යුතුව කටයුතු කිරීමට INSEE සිමෙන්ති සමාගම පියවර ගෙන තිබෙනවා. අපගේ පාර්ශ්වකරුවන්ට සහ ව්‍යාපාරයට වැඩි වටිනාකමක් එකතු කරන අතරේ, අපගේ පාරිසරික බලපෑම් අවම කිරීම සඳහාත් කටයුතු කිරීමේ ප්‍රතිපත්තියක් අපි අනුගමනය කරනවා. ජීවිතය ගොඩනැගීම (Building for Life) සඳහා අපගේ කැපවීම ප්‍රකට කරමින් මෙය අපගේ නව ව්‍යාපාර රටාව බවට පත්ව තිබෙනවා“, යනුවෙන් ගුස්ටාවෝ නවාරෝ මහතා ප්‍රකාශ කළේය.
“ශ්‍රී ලංකාවේ අභිවෘද්ධිය වෙනුවෙන් සමාගමක් ලෙස කළ යුතු කාර්යභාරය පිළිබඳ INSEE සිමෙන්ති සමාගමට හොඳ අවබෝධයක් පවතිනවා. ආර්ථික, සමාජයීය හා පාරිසරික යන අංශ තුනෙන්ම තිරසාර බව ළඟාකරගැනීමේ INSEE දැක්මටත් එය හොඳින් ගැලපෙනවා. ආර්ථික සමෘද්ධිය, පරිසරය ආරක්ෂා කරගැනීම සහ සමාජ වගකීම යන අංශ තුනෙහි සමබරතාවක් පවත්වාගැනීම අතීතයේ පටන්ම අපගේ ව්‍යාපාරික සංස්කෘතිය තුළ ප්‍රධාන අංගයක්. ඉදිරියටත් එම සමබරතාව පවත්වාගැනීම අපගේ අරමුණයි“, යනුවෙන් නවාරෝ මහතා වැඩිදුරටත් පැවසීය.
2018 වර්ෂයේදී එළිදැක්වුණු තිරසාර වාර්තාව මෙන්ම මෙවර එළිදැක්වුණු තිරසාර වාර්තාව ද Global Reporting Initiative (GRI) ප්‍රමිතීන්ට අනුව ජාත්‍යන්තර පිළිගැනීමක් සහිතව සකසා තිබීම ද විශේෂත්වයකි.
එමෙන්ම 2021 ජනවාරි පළමුවැනිදා හඳුන්වා දුන් GRI නව ප්‍රමිතීන් දෙකක් ද (GRI 303: ජලය සහ අප ජලය 2018/ GRI 403: රැකියා ස්ථානයේ සෞඛ්‍ය හා ආරක්ෂාව 2018) මෙම නව වාර්තාව පිළියෙල කිරීමේදී භාවිත කර තිබේ. එය ද තම තිරසාර ක්‍රියාකාරීත්වය අධීක්ෂණය කිරීමෙහිලා INSEE සිමෙන්ති සමාගමේ කැපවීම පෙන්නුම් කරයි.
මේ අතර INSEE සිමෙන්ති සමාගමේ ආයතන හා මානව සම්පත් අධ්‍යක්ෂ චන්දන විජයනාම මහතා ප්‍රකාශ කළේ, රැකියා ස්ථානයේ සුරක්ෂිතභාවය සම්බන්ධ ක්‍රියාපටිපාටීන්, හුදෙක් නෛතික බැඳීම් නොව සදාචාරාත්මක බැඳීමක් ලෙස INSEE සිමෙන්ති සමාගම ක්‍රියාවට නංවා ඇති බව ය. “මෙය අපගේ ආයතන පරිශ්‍රය සහ ආයතනය සතු වෙනත් ස්ථාන කරා ඇතුළුවන සියලු දෙනාටම මෙම ආරක්ෂාව පොදුවේ හිමිවෙනවා. ඊට අමතරව, අප සතු ඉගෙනුම් සහ සංවර්ධන මාදිලිය නිසා සේවකයින් සියලු දෙනාටම නව කුසලතා අත්පත් කරගනිමින්, තම වෘත්තීය ජීවිතය තුළ අඛණ්ඩව ඉදිරියට යෑමට අවශ්‍ය මඟ පෙන්වීමක් හිමිවෙනවා“, විජයනාම මහතා පැහැදිලි කළේය.
“අපගේ සේවකයින්ට, ඔවුන් වෙනුවෙන්ම සකස් කළ ඉගෙනුම් හා සංවර්ධන වැඩසටහන් තුළින් ගෝලීය මට්ටමේ ඉගෙනුම් අත්දැකීමක් ඔවුන්ට සමීප කිරීම අපගේ බලාපොරොත්තුවයි. එම ක්‍රියාන්විතයේදී INSEE ඇකඩමිය බෙහෙවින් ප්‍රයෝජනවත් වෙනවා“, ඔහු තවදුරටත් සඳහන් කළේය.
තිරසාර වාර්තාවේ මෙවර තේමාව වන ‘Build for Life’ පාදක කරගනිමින් විශේෂ වට මේස සාකච්ඡාවක් ද මෙහිදී පැවැත්වුණි. එම සාකච්ඡාවට ගුස්ටාවෝ නවාරෝ, නන්දන ඒකනායක, චන්දන විජයනාම යන මහත්වරු මෙන්ම INSEE Ecocycle Lanka සමාගමේ අධ්‍යක්ෂ සංජීව චූලකුමාර මහතා ද එක්ව සිටියහ. Mavenit Consulting පුද්ගලික සමාගමේ නිර්මාතෘ සහ තිරසාර හා කීර්තිනාම උපදේශිකා සුදාශිනී ක්‍රිස්ටෝපර් මහත්මිය එම සාකච්ඡාව මෙහෙයවූවාය.
“අපගේ යහපත් පරිචයන් ඉදිරියටත් පවත්වාගෙන යන අතරේදී දේශගුණ විපර්යාස හා අනෙකුත් පාරිසරික අභියෝග මෙන්ම අලුතින් පැන නඟින තත්ත්වයන් යටතේ වුවද අපගේ තිරසාර ක්‍රමෝපායන් අඛණ්ඩව වැඩිදියුණු කරගත යුතුයි. ජීවිතය ගොඩනැගීම අරමුණු කරගත් ගමනක නියැළෙන බැවින් සම්පූර්ණයෙන්ම තිරසාර ව්‍යාපාර ආයතනයක් බවට පත්වීම සඳහා අපගේ සෑම ව්‍යාපාර අංගයක්ම පාහේ පරිවර්තනය කරගත යුතුයි“, වට මේස සාකච්ඡාව අතරතුරදී අදහස් දක්වමින් ගුස්ටාවෝ නවාරෝ මහතා පැවසීය.
