ශ්‍රී ලංකා කනිෂ්ට බැඩ්මින්ටන් කණ්ඩායම ආසියානු ශූරතාවලියට යයි

අවුරුදු 19න් පහළ ආසියානු කනිෂ්ට බැඩ්මින්ටන් ශූරතාවලියට සහභාගි වීමට ප්‍රබල ක්‍රීඩක ක්‍රීඩිකාවන්ගෙන් සමන්විත ශ්‍රී ලංකා කණ්ඩායම ඉන්දුනීසියාව බලා පිටත්ව ගියේය. ඉන්දුනීසියාවේ යොග්යාකර්ටා නුවර පැවැත්වෙන මේ ශූරතාවලියට මිශ්‍ර කණ්ඩායම් තරග සහ ඒකල තරග ඇතුළත් ය. ආසියානු බැඩ්මින්ටන් සංගමයේ අනුමැතිය යටතේ ඉන්දුනීසියා බැඩ්මින්ටන් ආයතනය ශූරතාවලිය සංවිධාන කර තිබේ.

කණ්ඩායම් 14ක් තරග වදින මිශ්‍ර කණ්ඩායම් ශූරතාවලිය මේ මස 11 වැනිදා දක්වා පැවැත්වෙන අතර, 12 වැනිදා සිට 16 දක්වා ඒකල තරග අංශය පැවැත්වේ.  ශ්‍රී ලංකා කණ්ඩායම සහභාගි වීමට නියමිතව ඇත්තේ ඒකල තරග අංශයට පමණි.

ශ්‍රී ලංකා කනිෂ්ට බැඩ්මින්ටන් කණ්ඩායමේ පුහුණුකරු සහ කළමනාකරු ලෙස බිමල් කොතලාවල මහතා සමඟ ක්‍රීඩිකාවන් භාර නිලධාරිනිය ලෙස සුමිත්‍රා දිසානායක මහත්මිය සංචාරයට එක් වී සිටිති.

ශ්‍රී ලංකා කනිෂ්ට බැඩ්මින්ටන් බාලක කණ්ඩායම – සචේන් චමුදිත ප්‍රනාන්දු, නිම්නද ආශිංස හේරත්, සිහිලැල් අභිෂේක්, සිනෙත් මන්තුක, මොහොමඩ් සාජිඩ්, විදුෂ් රවිෂ්ම සුමනදාස, සනූජ නෙත්මිර, මෙනුල මින්දිනු, අනුක් ශානිල්ක, නවිඳු ලෝචන පෙරේරා

ශ්‍රී ලංකා කනිෂ්ට බැඩ්මිටන් බාලිකා කණ්ඩායම – රනිත්මා තිනුදි, ඉරූෂි අමන්දි, ප්‍රවීනා තේෂානි, නෙතංගා වින්දිනි, සනාදි දහම්සා ද සිල්වා, දෙව්මි මිතාරා, දෙව්නි තිසඳි, හියුමි හසාරා, චිරන්‍යා ජයවර්ධන.