ලංකා ව්‍යාපාරික පුවත් - LBN
චීනයේ හැංෂුයි නුවර පැවැත්වෙන 19 වැනි ආසියානු ක්‍රීඩා උළෙලේ බැඩ්මින්ටන් ශූරතාවලියේ ඒකල තරග ඉසව්වට ක්‍රීඩා කරන ශ්‍රී ලංකා බැඩ්මින්ටන් ක්‍රීඩා බිමේ විශිෂ්ටතම ක්‍රීඩකයකු වන විරේන් නෙත්තසිංහ මොංගෝලියාවේ එන්ක්බාට් සුමියසුරේන්ට එරෙහිව තරග වට 2-0ක විශිෂ්ට ජයක් අත් කර ගනිමින් අවසන් 16 දෙනා අතරට සුදුසුකම් ලැබීමට සමත් විය.
මෙවර ආසියානු ක්‍රීඩා උළෙලේ බැඩ්මින්ටන් තරග ඉසව්ව නියෝජනය කරන එකම ශ්‍රී ලාංකික ක්‍රීඩකයා වන විරේන් අවසන් 32 දෙනා අතරට එක් වූයේ පසුගියදා 64 දෙනාගේ තරග වටයේදී භූතානයේ අනීෂ් ගුරුං තරග වට 2-0කින් පරාජය කරමිනි.
ලෝක බැඩ්මින්ටන් ශ්‍රේණිගත කිරීම්වල 83 වැනි ස්ථානයේ පසුවන විරේන් නෙත්තසිංහ පසුගියදා ඉන්දුනීසියාවේ මෙඩන් හිදී පැවැති එක්ස්ෆෝරා ඉන්දුනීසියා ජාත්‍යන්තර බැඩ්මින්ටන් අභියෝගතා තරගාවලියේ පිරිමි ඒකල තරග ඉසව්වේ රිදී පදක්කම දිනාගත් අතර, ජාත්‍යන්තර බැඩ්මින්ටන් තරග බිමේදී ශ්‍රී ලංකාව වෙනුවෙන් කැපී පෙනෙන දස්කම් දැක්වූ අත්දැකීම් බහුල ක්‍රීඩකයකු ද වේ.
