පැල්වත්ත කිරි ඉතිරෙන මිලියනයක් – ජයග්‍රාහකයන්ට ත්‍යාග

ශ්‍රී ලංකාවේ ප්‍රමුඛතම 100% ක් දේශීය කිරි නිෂ්පාදකයා වන පැල්වත්ත කිරි සමාගමේ අති සාර්ථක “කිරි ඉතිරෙන මිලියනයක්” තරග වැඩසටහනෙහි අවසානය, පසුගිය අප්‍රේල් 02 දා කොළඹ BMICH පරිශ්‍රයේ දී මාධ්‍ය සාකච්ඡාවක් සහ ත්‍යාග ප්‍රදානෝත්සවයක් ලෙස උත්සවාකාරයෙන් යුතුව නිමාව දකින ලදි.

මාස දෙකකට අධික කාලයක් පුරා පැවැත්වුණු මෙම තරග වැඩසටහන හරහා ඔවුන් පාරිභෝගිකයින් හට  පැල්වත්ත සම්පුර්ණ යොදය සහිත කිරි පිටි 400g හිස් පැකට් 2 ක්, නම ලිපිනය ආදී විස්තර සමග පැල්වත්ත සමාගම වෙත එවන ලෙස දැනුම් දෙන ලදි. එසේ එවන තරගකරුවන් අතුරින් ජයග්‍රාහකයින් හට මුදල් ත්‍යාග ලබා දෙන බව ද ඔවුන් එම තරග වැඩසටහන ඔස්සේම දැනුම් දී තිබුණි. මෙම තරග වැඩසටහන සඳහා රට පුරා සිටින පාරිභෝගිකයින්ගෙන් විශාල ප්‍රතිචාරයක් හිමි වූ අතර, රටේ සෑම කොනකින්ම දහස් ගණනින් පාරිභෝගිකයින් මේ සඳහා සහභාගි වන ලදි.
 



 
සෑම සතියකම එක් වාසනාවන්ත ජයග්‍රාහකයෙකු හට රුපියල් 100,000 ක ත්‍යාග මුදලක් හිමි වූ අතර, අවසාන මහා තරගයේ දී, අවසාන මහා ත්‍යාගය ලෙස රුපියල් 1,000,000 ක විශාල ත්‍යාග මුදලක් ද අවසාන ජයග්‍රාහකයා හට හිමි විය. මෙම ජයග්‍රාහකයින් සියලු දෙනා රටේ විවිධ පළාත්වලින් තේරී පත් වූ අතර, එය පැල්වත්ත කිරි සමාගම රටේ සෑම කොනකටම විසිරී පැතිරී ඇති බව පෙන්නුම් කෙරෙන හොඳම සාක්ෂියකි.

සති පතා රුපියල් ලක්ෂය බැගින් ජයග්‍රහණය කළ ජයග්‍රාහකයින් අතරට, පිටබැද්දරෙන් එච්.එච්.ඩී. ගුණවර්ධන, නුවරින් ඒ.ජී. ඉනෝකා නෙළුම් කුමාරි, කෑගල්ලෙන් අයි. සන්ධ්‍යා මල්කාන්ති, පානදුරෙන් ඒ. මල්ලිකා ගම්ලක්ෂ, ගාල්ලෙන් දිමානි චතුරිකා, වාද්දුවෙන් දීපිකා කුමුදුනී, හොරණෙන් ඩී.ආර්.සී. විජේමාන්න සහ මාකොලෙන් එම්. ස්ටෙෆන් යන අය ඇතුළත් විය. අවසාන මහා ත්‍යාගය වූ රුපියල් මිලියනයක මුදල දිනා ගනු ලැබුවේ ගාල්ලේ ඩී.එල්. ලතා මහත්මියයි. ඇයට හිමි මිලියනයක ත්‍යාගය හා අනෙකුත් මුදල් ත්‍යාග පැල්වත්ත කළමනාකාරිත්වය, මාධ්‍යය සහ තවත් විශාල පිරිසක් ඉදිරියේ ප්‍රදානය කරන ලදි.

මෙම උත්සව අවස්ථාවේදී අදහස් ප්‍රකාශ කරමින් පැල්වත්ත කිරි සමාගමේ කළමනාකාර අධ්‍යක්ෂ අක්මාල් වික්‍රමනායක මහතා ප්‍රකාශ කළ සිටියේ, “මෙම තරග වැඩසටහන හුදෙක් මුදල් ත්‍යාග ලබා දීම සඳහා පවත්වනු ලැබූවක් නොවේ. මෙය පැල්වත්ත සන්නාමයේ ගුණාත්මකභාවයේ හා උසස්ම තත්ත්වයේ පණිවිඩය රට පුරා සිටින සියලුම පාරිභෝගිකයින් වෙත රැගෙන යෑම වෙනුවෙන් නිර්මාණය වූ වැඩසටහනකි. 100% ක් දේශීය කිරි නිෂ්පාදන සමාගමක් වන පැල්වත්ත කිරි සමාගම විසින් අඛණ්ඩව දේශීය කිරි ගොවින්ට සහයක් වෙමින් උසස්ම තත්ත්වයේ කිරි නිෂ්පාදන වෙළඳපළ වෙත නිකුත් කරමින්, රටේ ආර්ථිකයට අවශ්‍ය දායකත්වය ලබා දීම සඳහා නිරන්තරයෙන් කැප වී සිටියි” ලෙසය.

පැල්වත්ත කිරි සමාගම විසින් ශ්‍රී ලාංකේය පාරිභෝගික ජනතාවගේ විශ්වාසය සහ ආදරය එක සේ දිනා ගනිමින් උසස්ම තත්ත්වයේ කිරි නිෂ්පාදන ලබා දීමට අඛණ්ඩව වෙහෙසේ. 2006 වර්ෂයේ දී ආරම්භ වූ පැල්වත්ත කිරි සමාගම, වර්තමාන වන විට ශ්‍රී ලංකාවේ සුපතළ වෙළඳ නාමයක් බවට පත් වීමට සමත් වී තිබේ. තිරසාර ගොවිතැන, සත්ව සුබ සාධනය හා විශිෂ්ට තාක්ෂණය වැනි සාධක සඳහා ජනප්‍රියත්වයක් හිමි පැල්වත්ත කිරි සමාගම, විශාල විවිධත්වයකින් යුතු කිරි නිෂ්පාදන ලබා දීමට වෙනුවෙන් ද කීර්තියක් උසුලයි. සෑම නිෂ්පාදනයක් සමගම පැල්වත්ත කිරි සමාගම විසින් දේශීය වෙළඳපළ ශක්තිමත් කිරීමේ මහඟු අරමුණින් යුක්තව ක්‍රියා කරනු ලබයි.