උතුරු පළාත් සමස්ත ලංකා විවෘත බැඩ්මින්ටන් ශුරතාවලියට අයැදුම්පත් කැඳවයි

ජාතික ශ්‍රේණිගත කිරීමේ පළමු මට්ටමේ තරගාවලියක් වන උතුරු පළාත් සමස්ත ලංකා විවෘත බැඩ්මින්ටන් තරගාවලියට අයැදුම්පත් බාර ගැනීම දැන් සිදු කෙරේ. ශ්‍රී ලංකා බැඩ්මින්ටන් ආයතනයේ අනුබද්ධිත උතුරු පළාත් බැඩ්මින්ටන් සංගමය විසින් සංවිධාන කරනු ලබන මේ තරගාවලිය ඔක්තෝබර් මස 31 වැනිදා සිට නොවැම්බර් මස 5 වැනිදා දක්වා කිලිනොච්චියේ උතුරු පළාත් ගෘහස්ත බැඩ්මින්ටන් ක්‍රීඩා සංකීර්ණයේදී පැවැත්වීමට නියමිත අතර, අයැදුම්පත් බාර ගැනීම මේ මස 20 වැනිදායින් නිමාවට පත් කෙරේ.

විවෘත, ජ්‍යෙෂ්ඨ, කනිෂ්ට හා පළඟ වශයෙන් කාණ්ඩ 4ක් යටතේ පැවැත්වෙන උතුරු පළාත් සමස්ත ලංකා විවෘත බැඩ්මින්ටන් ශූරතාවලියේ කනිෂ්ට තරග කාණ්ඩයට අවුරුදු 11න් පහළ, 13න් පහළ, 15න් පහළ, 17න් පහළ සහ අවුරුදු 19න් පහළ බාලක ඒකල හා යුගල සහ බාලිකා ඒකල සහ යුගල තරග ඉසව් ඇතුළත් වන අතර, ජ්‍යෙෂ්ඨ තරග කාණ්ඩයට අවුරුදු 30න් ඉහළ, 35න් ඉහළ, 40න් ඉහළ, 45න් ඉහළ, 50න් ඉහළ, 55න් ඉහළ, 60න් ඉහළ, 65න් ඉහළ සහ අවුරුදු 70න් ඉහළ පිරිමි ඒකල හා යුගල, කාන්තා ඒකල හා යුගල සමඟ මිශ්‍ර යුගල තරග ඉසව් ඇතුළත් වේ. පිරිමි හා කාන්තා ඒකල, යුගල සහ මිශ්‍ර යුගල තරග විවෘත තරග කාණ්ඩයට ඇතුළත් වේ.

ජයග්‍රාහකයන්ට රුපියල් මිලියනයක ත්‍යාග මුදල් පිරිනැමෙන මේ ශූරතාවලියේ ශූරයන්ට, අනුශූරයන්ට සහ අවසන් පූර්ව වටයට පැමිණෙන ක්‍රීඩක ක්‍රීඩිකාවන්ට සහතික පත් සහ කුසලාන පිරිනැමීමට නියමිතය. උතුරු පළාත් සමස්ත ලංකා විවෘත බැඩ්මින්ටන් ශූරතාවලිය Mcfoil, Mobil, 3M සහ GAC අනුග්‍රාහකත්වයෙන් යුතුව පැවැත්වේ.