ලංකා ව්‍යාපාරික පුවත් - LBN
දකුණු ආසියාතික බැඩ්මින්ටන් අවුරුදු 15න් පහළ සහ අවුරුදු 17න් පහළ කලාපීය කනිෂ්ඨ ශූරතාවලිය සඳහා සහභාගි වීමට ශ්‍රී ලංකා ක්‍රීඩක ක්‍රීඩිකාවන් 8 දෙනකු පාකිස්තානය බලා පිටත්වීමට නියමිතය. ශ්‍රී ලංකා ක්‍රීඩක ක්‍රීඩිකාවන් සමඟ පුහුණුකරු රජිත දහනායක, සහාය පුහුණුකරු ඉරේෂ් මධුරංග ද සිල්වා සහ ක්‍රීඩිකාවන් භාර නිලධාරිනිය තරංගා විමලසූරිය මහත්ම මහත්මීහු ද සංචාරයට එක්වෙති. මිශ්‍ර කණ්ඩායම් සහ ඒකල තරග ඉසව් ඇතුළත් මෙම ශූරතාවලිය මාර්තු මස 3 වැනිදා සිට 7 වැනිදා දක්වා ඉස්ලාමාබාද් නුවර පාකිස්තාන ක්‍රීඩා සංකීර්ණයේදී පැවැත්වේ.
ආසියානු බැඩ්මින්ටන් සංගමයේ සංවිධායකත්වයෙන් සහ පාකිස්තාන බැඩ්මින්ටන් සම්මේලනයේ සත්කාරකත්වයෙන් පැවැත්වෙන දකුණු ආසියාතික බැඩ්මින්ටන් අවුරුදු 15න් පහළ සහ අවුරුදු 17න් පහළ කලාපීය කනිෂ්ඨ ශූරතාවලියේ පළමු සහ දෙවැනි දිනයේදී කණ්ඩායම් තරග පැවැත්වෙන අතර, 5 සහ 6 දෙදින ඒකල තරග ඉසව් පැවැත්වීමට නියමිතය. ඒකල තරග අංශයේ අවසන් තරග 7 වැනිදාට යෙදී තිබේ.
ශූරතාවලියට සහභාගි වන ක්‍රීඩක ක්‍රීඩිකාවෝ මෙසේය.
අවුරුදු 15න් පහළ බාලක ඒකල, යුගල, මිශ්‍ර යුගල – අමාවන් අමරසිංහ, චෙනාල් දෙව්ෂාන් මඩපාතගේ
අවුරුදු 15න් පහළ බාලිකා ඒකල, යුගල, මිශ්‍ර යුගල – තෙනුකි අයන්සා ද සිල්වා, බිනුරි ජනංගා
අවුරුදු 17න් පහළ බාලක ඒකල, යුගල, මිශ්‍ර යුගල-මිහිල රවිෂ්ක ක්‍රිෂ්ණ ජයවීර, තේජන සමුදිත හේරත්
අවුරුදු 17න් පහළ බාලිකා ඒකල, යුගල, මිශ්‍ර යුගල -නෙත්මි අමායා රත්නායක, ලක්ෂණා සජීවකුමාර්
