බංග්ලාදේශ අභියෝගතා බැඩ්මින්ටන් තරගාවලියේදී විරේන් නෙත්තසිංහ රන් පදක්කම දිනයි ඉසුරිට සහ සිතුමිට ලෝකඩ පදක්කම්

යෝනෙක්ස් – සන්රයිස් බංග්ලාදේශ ජාත්‍යන්තර අභියෝගතා තරගාවලියේ දී රන් පදක්කමක් දිනා ගැනීමට ශ්‍රී ලංකා බැඩ්මින්ටන් පිරිමි ඒකල ශ්‍රේණිගත කිරිම්වල අංක එක ස්ථානයේ පසුවන 20 හැවිරිදි විරේන් නෙත්තසිංහ සමත් විය.  ඔලිම්පික් ක්‍රීඩා උලෙළකට සෘජුව සුදුසුකම් ලැබූ ශ්‍රී ලංකාවේ ලාබාලතම බැඩ්මින්ටන් ක්‍රීඩකයා  වන විරේන් නෙත්තසිංහ ඩකා නුවර බංගබන්දු ජාතික ක්‍රීඩා සංකීර්ණයේ පැවැති බංග්ලාදේශ ජාත්‍යන්තර අභියෝගතා තරගාවලියේ පිරිමි ඒකල රන් පදක්කමට හිමිකම් කීවේ කැනඩාවේ ෂියැංඩොං ෂෙං පරාජය කරමිනි. මෙම තරගාවලියේදී පිරිමි ඒකල ශ්‍රේණිගත කිරිම්වල විරේන් සිව්වැනි ස්ථානයේ පසුවූ අතර, තුන් වැනි ස්ථානයේ රැඳී සිටි රන් පදක්කම දිනාගැනීමේ ජනප්‍රියතම ක්‍රීඩකයා වූ ෂියැංඩොං ෂෙං තරග වට 2-0කින් පරාජයට පත් කරනු ලැබුවේ ලකුණු 21-17ක් සහ 21-17ක් වශයෙනි.
 



 

‘මෙය මටත්, මගේ රටටත් ලැබුණු ජයග්‍රහණයක්. එය කැපවීමේ සහ හැකියාවේ ප්‍රතිඵලයක්. ඒ වගේම මා කෙරෙහි විශ්වාසය තැබූ සියලුදෙනාගේම සහයෝගය පිළිබඳ සාක්ෂියක්.‘ ජයග්‍රහණයෙන් පසු විරේන් එසේ කීවේය.

මෙම තරගාවලියේ පිරිමි ඒකල අර්ධ අවසන් පූර්ව වටයේදි මැලේසියාවේ ඩැරල් චූ ලකුණු 21-18ක්, 21-13ක් ලෙස පරාජයට පත් කළ විරේන් අවසන් 16 දෙනාගේ වටයේදී මැලේසියාවේ වර්න් සූන් චෝ පරාජයට පත් කරනු ලැබුවේ ලකුණු 21-18ක් සහ 21-15ක් ලෙසිනි. ඔහු ඊට පෙර 32 දෙනාගේ වටය ජයැගැනීමට සමත්වූයේ ඉන්දියාවේ ප්‍රනාව් රාම් නාගලිංගම් ලකුණු 21-14ක් සහ 21-15ක් වශයෙනි.

මේ අතර මෙම තරගාවලියේ කාන්තා යුගල තරගයේ ලෝකඩ පදක්කම දිනා ගැනීමට ඉසුරි අත්තනායක සහ සිතුමි ද සිල්වා සමත්වූහ. අවසන් පූර්ව වටයේදී ඉසුරි සහ සිතුමි ලකුණු 21-8ක් සහ 21-8ක් ලෙස පරාජයට පත් කළ තායිලන්තයේ කොඩ්චපෝන් චායිචනා සහ පන්නාවී පොලියම් අවසානයේදී රන් පදක්කම ද අත්කරගත්හ.

ශ්‍රී ලංකාව නියෝජනය කරමින් යෝනෙක්ස් – සන්රයිස් බංග්ලාදේශ ජාත්‍යන්තර අභියෝගතා තරගාවලියේ කාන්තා හා පිරිමි ඒකල, යුගල සහ මිශ්‍ර යුගල තරග ඉසව් සඳහා ක්‍රීඩක ක්‍රීඩිකාවෝ 12 දෙනකු සහභාගි වූ අතර,  ඊට ක්‍රීඩකයෝ 7 දෙනකු සහ ක්‍රීඩිකාවෝ 5 දෙනකු ඇතුළත් වූහ.

රටවල් 24කින් ක්‍රීඩක ක්‍රීඩිකාවෝ 228 දෙනකු සහභාගි වූ මෙම පස්දින තරගාවලිය ලෝක බැඩ්මින්ටන් සම්මේලනයේ අනුමැතිය යටතේ සංවිධාන කරනු ලැබුවේ බංග්ලාදේශ බැඩ්මින්ටන් සම්මේලනය විසිනි.