ලංකා ව්‍යාපාරික පුවත් - LBN
බදු ප්‍රතිසංස්කරණය සහ රාජ්‍ය අංශයේ ප්‍රතිව්‍යුහගතකරණය කඩිනම් කරන්නැයි ඉල්ලීම්
මෙරට ප්‍රමුඛ පෙළේ තරුණ ව්‍යවසායකයන් 120 කට අධික සංඛ්‍යාවක් සාමාජිකත්වය දරන තරුණ ලාංකේය ව්‍යවසායක මණ්ඩලය මගින් සංවිධානය කරන ලද වාර්ෂික සංවාද වැඩසටහන සහ රාජ්‍ය තාන්ත්‍රික හමුව පසුගියදා උත්කර්ෂවත් අන්දමින් පැවැත්විණි. මෙහි ප්‍රධාන ආරාධිතයා ලෙස සහභාගී වූ විදේශ අමාත්‍ය අලි සබ්රි මහතා සිය දේශනයේදී, ශ්රී ලංකාවේ ආර්ථිකය නැවත ගොඩනැංවීම සඳහා ජාත්‍යන්තර සහයෝගීත්වයේ වැදගත්කම පෙන්වා දුන්නේය. එමෙන්ම තරුණ ලාංකේය ව්‍යවසායක මණ්ඩලයේ සාමාජිකත්වය දරන සමාගම් වාර්ෂිකව ශ්රී ලංකාවේ දළ දේශීය නිෂ්පාදිතයට රුපියල් බිලියන ගණනක දායකත්වයක් ලබාදෙන බව සිහිපත් කළ ඒ මහතා, ඒ වෙනුවෙන් එම මණ්ඩලයට තම ස්තූතිය පළකළේය. තරුණ ලාංකේය ව්‍යවසායක මණ්ඩලයේ සාමාජිකයින්ගෙන් බහුතරයක් රටට අත්‍යවශ්‍ය විදේශ මුදල් උපයා දෙන අපනයනකරුවන් වන අතර, රටේ ආර්ථිකයේ පුනර්ජීවනය හා ප්‍රගතිය සඳහා අතිශයින් වැදගත් වන ජාත්‍යන්තර ආයෝජන, ව්‍යාපාර සහ හවුල්කාරීත්වයන්ද ඔවුන් සතුය.
මෙරට ව්‍යවසායක ප්‍රජාව සහ රාජ්‍යතාන්ත්‍රිකයන් අතර සුහදත්වය තවදුරටත් වර්ධනය කිරීම අරමුණු කරගත් මෙම උත්සවයේ පිළිගැනීමේ කථාව සිදුකරන ලද්දේ තරුණ ලාංකේය ව්‍යවසායක මණ්ඩලයේ සභාපති දිමුත් චන්කම සිල්වා මහතා විසිනි. මණ්ඩලයේ සාමාජිකයන් අනුගමනය කරන තිරසාර හා ආචාරධාර්මික ව්‍යාපාර සම්ප්‍රදාය ප්‍රශංසාත්මකව සිහිපත් කළ ඒ මහතා, අපනයනය සහ විදේශ රටවල ආයෝජනය වෙනුවෙන් එම සාමාජිකයන් දරන උනන්දුව අගය කළේය. එම කටයුතු සඳහා මෙම උත්සවයේ ආරාධිතයන් වූ රාජ්‍ය තාන්ත්‍රික ප්‍රජාවගේ සහය අතිශයින් වැදගත් බවද ඒ මහතා පෙන්වා දුන්නේය.
උත්සවයේ ආරාධිතයන් අතරට තානාපතිවරුන්, මහකොමසාරිස්වරුන්, තානාපති කාර්යාල නියෝජිතයන් සහ ගෝලීය අරමුදල් සම්පාදන ආයතන වල නියෝජිතයන් ඇතුළු සම්භාවනීය අමුත්තන් පිරිසක් එක්ව සිටිහ. ඔවුන් අමතමින් අදහස් දැක්වූ තරුණ ලාංකේය ව්‍යවසායක මණ්ඩලයේ ජ්‍යෙෂ්ඨ උප සභාපති රසිත් වික්‍රමසිංහ මහතා, තම සංවිධානය සමග අත්වැල් බැඳගන්නා මෙන් ඔවුන්ට ආරාධනා කළේය. එවැනි හවුල්කාරීත්වයන් සඳහා තම මණ්ඩලය සෑම විටම සූදානම් බව අවධාරණය කළ ඒ මහතා, ශ්රී ලංකාව තීරණාත්මක සන්ධිස්ථානයකට පැමිණ සිටින මේ මොහොතේදී, තම මණ්ඩලයේ සාමාජිකයන් ආර්ථික අර්බුදයට සාර්ථක ලෙස මුහුණ දෙමින් අවශ්‍ය පරිදි වෙනස්කම් වලට අනුගත වීමට සමත් වී ඇති බවද පැවසීය. එමෙන්ම ආර්ථිකය තවදුරටත් බිඳවැටීම වැළැක්වීම සඳහා කඩිනම් පියවර ගැනීම පිළිබඳව ඒ මහතා තරුණ ලාංකේය ව්‍යවසායක මණ්ඩලය වෙනුවෙන් ගරු ජනාධිපති රනිල් වික්‍රමසිංහ මැතිතුමන්ට, රජයට සහ ශ්රී ලංකා මහ බැංකු අධිපති නන්දලාල් වීරසිංහ මහතාට තම ස්තූතිය පළකළේය.
තවද ආර්ථිකය යථා තත්ත්වයට පත්කිරීමේ උත්සාහයේ වැදගත් පියවරක් වශයෙන් රාජ්‍ය අංශය ප්‍රතිව්‍යුහගත කිරීම සඳහා ප්‍රමුඛත්වය දෙමින්, බදු ගෙවන්නන් මත පැටවී ඇති බර අවම කරන මෙන් තරුණ ලාංකේය ව්‍යවසායක මණ්ඩලය විසින් මෙහිදී රජයෙන් ඉල්ලීමක් කරන ලදි. බදු සහ පොලී අනුපාත ඉහළ නැංවීම කාලීන අවශ්‍යතාවක් මත ක්‍රියාත්මක කළ කෙටිකාලීන විසඳුමක් බවත්, එය වඩාත් සාධාරණ ලෙස සිදුකිරීම සඳහා අවශ්‍ය බදු ප්‍රතිසංස්කරණ මේ වනවිට සැලසුම් කෙරෙමින් පවතිනු ඇති බවත්, බදු පැහැරහැරීම අවම කරමින් බදු ආවරණ පරාසය පුළුල් කිරීම සඳහා අවශ්‍ය පියවර නොපමාව ගැනෙනු ඇති බවත් මණ්ඩලය විශ්වාසය පළකරයි.
මෙම වැඩසටහන අතිශයින් සාර්ථක වූ බවත්, ඊට සහභාගී වූ රාජ්‍යතාන්ත්‍රික ප්‍රජාව ඒ සම්බන්ධයෙන් සිය ප්‍රසාදය පළකළ බවත්, උත්සවයෙන් අනතුරුව අදහස් දැක්වූ තරුණ ලාංකේය ව්‍යවසායක මණ්ඩලයේ උප කමිටු සභාපති ඩෑන් ද සිල්වා මහතා පැවසීය.
