ජෝන් කීල්ස් සමූහ ව්‍යාපාරය විවිධත්වය, සමානත්වය හා අන්තර්කරණය උදෙසා සිදුකළ දීර්ඝකාලීන මෙහෙවර වෙනුවෙන් සම්මානයෙන් පිදුම් ලබයි

 



 

 

ජෝන් කීල්ස් හෝල්ඩින්ස් පීඑල්සී 2023 ජූනි 17 දින පැවති Top50 විද්වත් සහ වෘත්තීය කාන්තා සම්මාන උළෙලේ (Top50 Professional and Career Women Awards) 13 වැනි අදියරේදී වසරේ විශිෂ්ටතම ලෙස විවිධත්වය හා සමානාත්මතාව ප්‍රවර්ධනය කළ ආයතනය වශයෙන් සම්මානයෙන් පිදුම් ලැබී ය.

කාන්තා කළමනාකරණ ආයතනය (Women in Management – WIM), කාන්තා වෘත්තීය ආයතනය (Women in Work), ජාත්‍යන්තර මූල්‍ය සංස්ථාව (International Finance Corporation – IFC) සහ ඕස්ට්‍රේලියා රජය එක් වී වාර්ෂිකව පවත්වනු ලබන මෙම සම්මාන උළෙලේ අරමුණ වන්නේ, රැකියා ස්ථානයේදී හා සමාජයේදී විශිෂ්ට ජයග්‍රහණ අත්පත් කරගත් වෘත්තිකයන් සහ ආයතන ඇගයීමට ලක්කිරීම ය.

විවිධත්වය සම්බන්ධයෙන් අනුගමනය කළ සුවිශේෂී ප්‍රවේශය මෙන්ම, ගෞරවය හා විශ්වාසය මූලික කරගනිමින්, සෑම කෙනෙකුටම චකිතයකින් තොරව රාජකාරි කිරීමට නිදහස ඇති විවෘත රැකියා පරිසරයක් පවත්වාගෙන යාම සඳහා දැරූ අඛණ්ඩ ප්‍රයත්නයන් වෙනුවෙන් ජෝන් කීල්ස් සමූහ ව්‍යාපාරයට මෙම සම්මානය හිමි විය. ජෝන් කීල්ස් සමූහය ජාතිකත්වය, ජනවර්ගය, ආගම, ස්ත්‍රී පුරුෂ අනන්‍යතාව, ලිංගික නැඹුරුව, වයස හෝ කායික/මානසික හැකියාව යනාදී කිසිදු භේදයකින් තොරව සියලුම දෙනාට සාධාරණ අවස්ථාවන් ලබාදෙන අතර, ආයතනය තුළ ගෞරවය හා විශ්වාසය තහවුරු කිරීම සඳහා නිරන්තරයෙන් කටයුතු කරයි. ව්‍යාපාර කටයුතුවලදී විවිධත්වය පවත්වාගැනීම සම්බන්ධයෙන් ජෝන් කීල්ස් සමූහයට පැහැදිලි අදහසක් හා අවබෝධයක් ඇති අතර, විශේෂයෙන්ම තීරණ ගැනීමේ මට්ටම් ඇතුළුව සියලුම මට්ටම්වලදී එය අර්ථවත් සංවාද හා විවාද සඳහා අවස්ථාව සලසා දෙයි.

මෙහිදී අදහස් දක්වමින් ජෝන් කීල්ස් සමූහාධිපති ක්‍රිෂාන් බාලේන්ද්‍ර මහතා මෙසේ පැවසී ය. “සමූහයක් ලෙස අපගේ ශක්තිය වන්නේ අපගේ සාමාජික සාමාජිකාවන් බව අප දන්නවා. කාටත් සමාන අවස්ථා සලසන ආයතනයක් ලෙස විවිධාකාර ආකල්ප සහිත පුද්ගලයන්ට අපගේ ආයතනය විවෘතයි. ඒ වගේම, අපගේ ව්‍යාපාරයේ සෑම අංශයකටම එක් එක් පුද්ගලයා විසින් රැගෙන එනු ලබන විවිධත්වය, නවෝත්පාදනය සහ නිර්මාණශීලිත්වය වැනි ගුණාංග අප බෙහෙවින් අගය කරනවා. මේ ආකාරයට අන්තර්කරණය හා සමානත්වය මුල්කරගත් ආයතනික සංස්කෘතියක් පවත්වාගෙන යාමට අප ගන්නා ප්‍රයත්නයන් මෙලෙස ඇගයීමට ලක්වීම අපට මහත් ගෞරවයක්. මෙවැනි සම්මාන උළෙලවල් මගින් තවතවත් සමාගම් හා ආයතන විවිධත්වය, සමානත්වය හා අන්තර්කරණය තහවුරු කිරීමට පෙළඹෙනු ඇතැයි කියා අප සිතනවා.”

2015 වර්ෂයේදී ජෝන් කීල්ස් සමූහ ව්‍යාපාරය, ප්‍රතිපත්තිමය වශයෙන් සහ දැනුවත් කිරීම් ඔස්සේ LGBTIQ+ ප්‍රජාවට සමාන අවස්ථාවන් ලබාදීම සඳහා ඉදිරිපත් වූ ප්‍රථම ශ්‍රී ලාංකික සමාගම බවට පත් වූ අතර, එම සමූහය තවමත් ඒ සම්බන්ධයෙන් කැප වී කටයුතු කරයි.

2020 වර්ෂයේදී ජෝන් කීල්ස් සමූහයේ විවිධත්වය, සමානත්වය හා අන්තර්කරණය සඳහා වූ ප්‍රයත්නයන් නියෝජනය කරන සන්නාමය වශයෙන් ONE JKH ලෙස දියත් කරන ලදි. රැකියා ස්ථානය තුළ සහ ව්‍යාපාර කටයුතුවලට අදාළ අනෙකුත් ක්‍රියාවලීන් තුළ කාන්තා සහභාගීත්වය ඉහළ නැංවීම, LGBTIQ+ ප්‍රජාවන්ට සමාන අවස්ථා ලබා දීම සහ ආබාධ සහිත පුද්ගලයන්ට හිමිවන රැකියා අවස්ථාවන් වැඩි කිරීම යන අංශ තුන කෙරෙහි එහි අවධානය ප්‍රධාන වශයෙන් යොමු වේ.

වසර 5 ක් තුළ සිය කාර්ය මණ්ඩලයේ කාන්තා නියෝජනය 40% ක් දක්වා වැඩි කිරීමට ජෝන් කීල්ස් සමූහය 2021 වසරේදී විශේෂ සැලසුමක් ක්‍රියාවට නැංවී ය (එවකට එහි කාන්තා නියෝජනය 30% ක් විය). එතැන් පටන් මේ දක්වා මෙම ඉලක්කය ළඟා කර ගැනීම සඳහා සමූහය පියවර රැසක් ගෙන ඇති අතර, දරු උපතකදී මව සහ පියා යන දෙදෙනාටම දින 100 ක නිවාඩු ලබාදීම ඉන් එක් පියවරකි. (සාමාන්‍යයෙන් මාතෘ නිවාඩු ගැනීමේ ඉඩකඩ යන සාධකය නිසා ඇතැම් තනතුරුවලට කාන්තාවන් බඳවා ගැනීමට සේවායෝජකයන් පසුබට වීමේ ප්‍රවණතාව පිටුදැකීම මෙම පුරෝගාමී පියවරෙහි අරමුණ විය. එමෙන්ම මෙමගින් ජෝන් කීල්ස් සමූහයේ සාමාජිකයන්ගේ සහකාරියන්ට තම මාතෘ නිවාඩුව අවසන් වීමෙන් අනතුරුව නැවත රැකියාවට යාම පහසු වේ). මීට අමතරව ආයතනයේ සහයෝගය සහිතව දරුවන් රැකබලා ගැනීමේ පහසුකම් සැපයීම, කාන්තාවන් කේන්ද්‍ර කරගත් පුහුණු වැඩසටහන් ක්‍රියාවට නැංවීම, සාමාජිකාවන්ට උපදේශන සේවාවන් හා අනුග්‍රාහකත්වයන් සැපයීම සහ සාම්ප්‍රදායිකව කාන්තාවන් විසින් නොදරනු ලබන තනතුරු සඳහා කාන්තාවන් පත්වීමේ ඉඩකඩ වැඩිකිරීම වැනි තවත් පියවර රාශියක්ද ජෝන් කීල්ස් සමූහ ව්‍යාපාරය මගින් ගෙන තිබේ. මීට අමතරව, සමූහයේ සියලුම අංශ ආවරණය වන පරිදි, සිය සාමාජිකාවන්ට නොමිලේ සනීපාරක්ෂක තුවා ලබාදීමට සහ ඔසප් සෞඛ්‍යය සම්බන්ධයෙන් දැනුවත් කිරීම් සිදුකිරීමටද සමූහය පියවර ගෙන ඇත. ඔසප් වීම සම්බන්ධයෙන් සමාජය තුළ පවතින දුර්මත බිඳහෙළීමට දායක වීම මෙහි අරමුණයි.

ජෝන් කීල්ස් සමූහය දැනටමත් ආබාධ සහිත පුද්ගලයන්ට රැකියා අවස්ථා ලබාදෙන අතර, 2023 වසරේදී ඒ සම්බන්ධ විශේෂ ප්‍රතිපත්ති මාලාවක් හඳුන්වා දෙන ලදි. පියවර ගණනාවක් සහිත එම ප්‍රතිපත්ති මාලාවට, සහය ලබන රැකියා නිලධාරීන් (Supported Employment Officers) පත්කිරීම, සමූහයේ සියලුම අංශ තුළ ආබාධ සහිත පුද්ගලයන්ට නිරත විය හැකි රැකියාවන් මොනවාද යන්න හඳුනා ගැනීම, ඔවුන්ට යහපත් මට්ටමේ නවාතැන් පහසුකම් ලබාදිය හැකි ආකාරයන් හඳුනා ගැනීම සහ ඔවුන්ට බාධාවකින් තොරව රාජකාරි කිරීමට හැකි වන ආකාරයට ආයතනයේ යටිතල පහසුකම් වෙනස් කිරීම වැනි පියවර රාශියක් ඇතුළත් වී තිබේ.

කොළඹ කොටස් වෙළඳ පොළේ විශාලතම ලැයිස්තුගත සමාගමක් වන ජෝන් කීල්ස් හෝල්ඩින්ග්ස් පීඑල්සී පරිපාලිත සමාගමක්ද වේ. විවිධාංගීකෘත කර්මාන්ත අංශයන් 7ක පවතින සමාගම් 70කට වැඩි ප්‍රමාණයක් මෙහෙයවනු ලබන JKH ආයතනය සේවක සේවිකාවන් 14,000 කට අධික පිරිසකට රැකියාවන් ලබා දෙන අතර වසර 17 ක් පුරා ශ්‍රී ලංකාවේ වඩාත් ගෞරවනීය ආයතනය ලෙස LMD සඟරාව මගින් ශ්‍රේණිගත කර ඇත. ‘ට්‍රාන්ස්පේරන්සි ඉන්ටර්නැෂනල් ශ්‍රී ලංකා’ විසින් සිද කරන ලද ආයතනික වාර්තාකරණයේ විනිවිදභාවය ඇගයීමේ සමීක්ෂණයේදී ජෝන් කීල්ස් හෝල්ඩින්ග්ස් පීඑල්සී අඛණ්ඩව තුන්වන වසරටත් ප්‍රථම ස්ථානයට පත් විය. ලෝක ආර්ථික සංසදයේ පූර්ණ සාමාජිකයෙකු සහ එක්සත් ජාතීන්ගේ ගෝලීය සංයුක්තයේ සහභාගිකයෙකු වන ජෝන් කීල්ස්, ජෝන් කීල්ස් පදනම හරහා සහ සමාජ ව්‍යවසායකත්ව මුලපිරීම හරහා “බලගන්වමු දේශය හෙට දිනට” පිළිබඳ දැක්ම මෙහෙයවන අතර, Plasticcycle සමාජ ව්‍යවසායකත්ව වැඩසටහන හරහා ශ්‍රී ලංකාවේ ප්ලාස්ටික් දූෂණය සැලකිය යුතු ලෙස අඩු කිරීමේ උත්ප්‍රේරකයක් ලෙසින් ද ක්‍රියා කරයි.