ලංකා ව්‍යාපාරික පුවත් - LBN
ශ්‍රී ලංකා බැඩ්මින්ටන් ක්‍රීඩා බිමේ විශිෂ්ටතම ක්‍රීඩකයකු වන විරේන් නෙත්තසිංහ චීනයේ හැංෂුයි නුවර පැවැත්වෙන 19 වැනි ආසියානු ක්‍රීඩා උළෙලේ බැඩ්මින්ටන් ශූරතාවලියේ ඒකල තරග ඉසව්වට සහභාගි වීම සඳහා පිටත්ව ගියේය. පෙරේදා ආරම්භ වූ ආසියානු ක්‍රීඩා උළෙලේ බැඩ්මින්ටන් තරගාවලිය ලබන ඔක්තෝබර් මස 2 වැනිදා සිට 7 වැනිදා දක්වා පැවැත්වීමට නියමිතය. මෙවර ආසියානු ක්‍රීඩා උළෙලේ බැඩ්මින්ටන් තරග ඉසව්ව නියෝජනය කරන එකම ශ්‍රී ලාංකික ක්‍රීඩකයා වන විරේන් සමඟ ඔහුගේ පුහුණුකරු සහ කළමනාකරු ලෙස රොෂාන් ධම්මික මහතා ද පිටත්ව ගියේය.
ලෝක බැඩ්මින්ටන් ශ්‍රේණිගත කිරීම්වල 83 වැනි ස්ථානයේ පසුවන විරේන් නෙත්තසිංහ පසුගියදා ඉන්දුනීසියාවේ මෙඩන් හිදී පැවැති එක්ස්ෆෝරා ඉන්දුනීසියා ජාත්‍යන්තර බැඩ්මින්ටන් අභියෝගතා තරගාවලියේ පිරිමි ඒකල තරග ඉසව්වේ රිදී පදක්කම දිනාගත් අතර, ජාත්‍යන්තර බැඩ්මින්ටන් තරග බිමේදී ශ්‍රී ලංකාව වෙනුවෙන් කැපී පෙනෙන දස්කම් දැක්වූ අත්දැකීම් බහුල ක්‍රීඩකයකු ද වේ.
