ලංකා ව්‍යාපාරික පුවත් - LBN
මෙවර ජාත්‍යන්තර කාන්තා දිනය වෙනුවෙන් තවත් සුවිශේෂී මෙහෙවරක් ක්‍රියාවට නැංවීමට Fems හි පිටුබලය ලබන H.E.R Foundation කටයුතු කළේය. ඒ මෙරට බන්ධනාගාරගතව සිටින කාන්තාවන් ඉලක්ක කරගත් විශේෂ දැනුවත් කිරීමේ වැඩසටහන් මාලාවකි. ඔසප් සෞඛ්‍යය හා සනීපාරක්ෂාව සම්බන්ධ මාතෘකා රැසක් මෙම වැඩසටහන්වලදී සාකච්ඡා කරන ලදි.
බන්ධනාගාරගතව සිටින කාන්තාවන්ට තම සනීපාරක්ෂක අවශ්‍යතා ඉටුකරගැනීම සම්බන්ධයෙන් විවිධ අභියෝගයන්ට මුහුණ දීමට සිදු වේ. ඒවා අවම කිරීමේ අරමුණින් H.E.R Foundation විසින් මෙම වැඩසටහන් මාලාව සංවිධානය කරන ලදි.
බෝගම්බර බන්ධනාගාරයෙන් ආරම්භ කරන ලද මෙම වැඩසටහන් මාලාව ඉන් අනතුරුව අඟුණුකොළපැලැස්ස, මීගමුව, කුරුවිට, අනුරාධපුර සහ වැලිකඩ යන බන්ධනාගාර 06 දී පවත්වන ලදි. මේ ඔස්සේ බන්ධනාගාරගතව සිටින කාන්තාවන් 250 කට අධික පිරිසක් දැනුවත් කිරීමට හැකි විය.
ශ්‍රී ලංකාව තුළ ඔසප් සෞඛ්‍ය සම්බන්ධයෙන් පවතින සාම්ප්‍රදායික ආකල්ප වෙනස් කිරීමට Fems දීර්ඝ කාලයක පටන් කැප වී කටයුතු කරමින් සිටී. කාන්තාවන්ට ගැටලුවකින් තොරව තම ඔසප් සෞඛ්‍ය අවශ්‍යතා ඉටුකරගැනීමට හැකි වීමට නම් මෙම ආකල්ප වෙනස් කිරීම මෙන්ම, ඔවුන්ට අවශ්‍ය පහසුකම් සපයාගැනීමට අවස්ථාව සලසා දීම අත්‍යවශ්‍යය.
“තරාතිරම කුමක් වුවත් සියලුම කාන්තාවන්ට සමාන අවස්ථා හා පහසුකම් හිමි වන සමාජයක් නිර්මාණය කිරීම සඳහා අප කැප වී සිටිනවා. බන්ධනාගාර තුළ මෙම වැඩසටහන් ක්‍රියාවට නැංවීමේදී අපගේ අරමුණ වුණේ, නිසි අධ්‍යාපනයක් සමගින් සෑම කාන්තාවකටම ලැබිය යුතු ගෞරවය නොඅඩුව හිමි වන වාතාවරණයක් ඇති කිරීමයි.” Hemas Consumer Brands සමාගමේ අලෙවි කළමනාකාරිනී (කාන්තා සනීපාරක්ෂාව) සචිනි ගමගේ මහත්මිය පැවසුවාය.
“ඔසප් සනීපාරක්ෂාව සඳහා අවශ්‍ය පහසුකම් ලබාගැනීමට සියලුම කාන්තාවන්ට අවස්ථාව තිබිය යුතුයි. එහෙත් බන්ධනාගාරවලදී එය නිතර නොතකා හරිනු ලබනවා. පසුගිය වසරේ සිටම Fems මෙරට බන්ධනාගාර පද්ධතියට මාසිකව සනීපරාක්ෂක තුවා පරිත්‍යාග කරමින් සිටින නිසා බන්ධනාගාරගතව සිටින කාන්තාවන්ට තම සනීපාරක්ෂක අවශ්‍යතා නිසි පරිදි සපුරා ගැනීමට හැකි වී තිබෙනවා. එමෙන්ම ජාත්‍යන්තර කාන්තා දිනයට සමගාමීව මෙවැනි දැනුවත් කිරීමේ වැඩසටහන් පැවැත්වීමට කටයුතු කිරීම, Fems සන්නාමයේ මෙහෙවරට අදාළ තවත් පියවරක් ලෙස හැඳින්වීමට පුළුවන්. මෙම හවුල්කාරීත්වය ඔස්සේ බන්ධනාගාර පද්ධතිය තුළ කාන්තා සෞඛ්‍යය සම්බන්ධයෙන් පැවති ප්‍රධානතම හිඩැසක් පිරවීමට හැකි වීම අපට මහත් සතුටක්.” බන්ධනාගාර දෙපාර්තමේන්තුවේ පුනරුත්ථාපන කොමසාරිස් ජගත් වීරසිංහ මහතා පැවසීය.
සනීපාරක්ෂක සෞඛ්‍ය නිෂ්පාදන මිලදී ගැනීමට අවස්ථාව සලසා දීම මගින් පමණක් මෙරට කාන්තාවන් ඔසප් සෞඛ්‍යය සම්බන්ධයෙන් මුහුණ දෙන ගැටලු විසඳාලිය නොහැක. ඒ සඳහා කාන්තාවන් නිසි පරිදි දැනුවත් කිරීම සහ ඔවුන් තුළ ආත්ම විශ්වාසය ඇතිකරවීමද අවශ්‍ය වේ. ඔසප් සෞඛ්‍යය යනු අයිතියක් මිස වරප්‍රසාදයක් නොවන බවත්, කාන්තාවන්ගේ ජීවන තත්වය කුමක් වුවද ඔවුන්ට තම ඔසප් සෞඛ්‍ය අවශ්‍යතා සපුරා ගැනීමට අවස්ථාව තිබිය යුතු බවත් මෙම මෙහෙවර මගින් අවධාරණය කරන ලදි.
ඔසප් සෞඛ්‍යය සම්බන්ධ ගැටලු නිසා කාන්තාවන්ට නිරන්තරයෙන් විවිධ දුෂ්කරතාවන්ට මුහුණ දීමට සිදු වී තිබේ. H.E.R. Foundation මෙහෙවර හරහා එම ගැටලු හැකි තාක් අවම කිරීම Fems හි අරමුණ වී ඇත. Help, Empower සහ Rise (H.E.R.) යන ප්‍රධාන අංශ 3 යටතේ H.E.R. Foundation මෙහෙවර ක්රියාත්මක වේ. කාන්තාවන් දැනුවත් කිරීම, ඔවුන් තුළ ආත්ම විශ්වාසය ඇතිකරවීම සහ ඔවුන්ගේ ජීවන තත්වය උසස් කිරීම තුළින් අර්ථවත් හා දීර්ඝකාලීන වෙනස්කම් ඇති කළ හැකි බව Fems විශ්වාස කරයි.
Fems මෙහෙවර ජාත්‍යන්තර කාන්තා දිනය වැනි සංකේතාත්මක වශයෙන් වැදගත් අවස්ථාවන්ට පමණක් සීමා නොවේ. එය වසර පුරාම කාන්තාවන්ගේ යහපත වෙනුවෙන් කැපවුණු නිරන්තර මෙහෙවරකි.
බන්ධාගාර ඉලක්ක කරගනිමින් ක්‍රියාවට නංවන ලද මෙම වැඩසටහන යටතේ කාන්තා රැඳවියන්ට ඔසප් සෞඛ්‍ය සම්බන්ධයෙන් අවශ්‍ය සහයෝගය ලබාදීමට අමතරව වෛද්‍ය උපදෙස්ද ලබාදෙන ලදි. එහිදී තමන්ට ඇති ගැටලු සෘජුවම අදාළ වැඩසටහන මෙහෙයවූ වෛද්‍යවරයා හෝ හෙදිය සමග සාකච්ඡා කර පිළිතුරු ලබා ගැනීමට ඔවුන්ට අවස්ථාව උදා විය. බන්ධනාගාරගතව සිටින කාන්තාවන්ට මේ ආකාරයට සෘජුවම වෛද්‍ය උපදෙස් ලබාගැනීමට අවස්ථාව හිමි වන්නේ ඉතාමත් කලාතුරකිනි.
මෙරට කාන්තා රැඳවියන් මුහුණ දෙන ගැටලු හඳුනාගෙන, ඔවුන්ට තම ආත්ම ගරුත්වය ආරක්ෂා කරගනිමින් සෞඛ්‍ය අවශ්‍යතා සපුරාගත හැකි පරිසරයක් නිර්මාණය කිරීමේ අරමුණින් H.E.R Foundation විසින් මෙම වැඩසටහන ක්‍රියාවට නංවන ලදි. ඉදිරියටත් මෙවැනි වැඩසටහන් ඔස්සේ මෙරට කාන්තාවන්ට අත්වැලක් වීම H.E.R Foundation හි අරමුණ වී තිබේ.
H.E.R Foundation සහ එමගින් ක්‍රියාවට නංවන ලබන වැඩසටහන් පිළිබඳ නවතම තොරතුරු දැනගැනීම සඳහා https://herfoundation.lk/ වෙත පිවිසෙන්න.
